રાધનપુરના કલ્યાણપુરા ખાતે આવેલ મેંગો રિસોર્ટ બન્યું ઉનાળામાં આકર્ષણનું મુખ્ય કેન્દ્ર
500થી વધુ આંબાના વૃક્ષોની હરિયાળી વચ્ચે વોટરપાર્ક, રંગબેરંગી વોટર રાઈડ્સ, ડીજે મ્યુઝિક અને કુદરતી ઠંડકનો અનોખો આનંદ
કેપિટલ મેસેજ, ન્યુઝ
Capital message
રાધનપુર તાલુકાના કલ્યાણપુરા ખાતે આવેલ મેંગો રિસોર્ટ હાલ કાળઝાળ ગરમી વચ્ચે લોકો માટે રાહત અને મોજમજાનું સૌથી પસંદગીનું સ્થળ બની ગયું છે. ઉનાળાની રજાઓમાં પરિવાર સાથે કુદરતી વાતાવરણ વચ્ચે આનંદ માણવા માટે રોજબરોજ મોટી સંખ્યામાં લોકો અહીં ઉમટી રહ્યા છે. રાણાભાઈ આહીર અને ભોલાભાઈ પંચાલ દ્વારા આ રિસોર્ટનું સુંદર અને સુવ્યવસ્થિત આયોજન કરવામાં આવ્યું છે.
500થી વધુ આંબાના હરિયાળા વૃક્ષોની વચ્ચે વિકસાવવામાં આવેલ આ રિસોર્ટમાં પ્રવેશતા જ કુદરતી ઠંડક અને શાંતિનો અહેસાસ થાય છે. વિશાળ વોટરપાર્કમાં બાળકો તેમજ યુવાનો માટે અલગ અલગ પ્રકારની પાણીની રમતો, આકર્ષક વોટર રાઈડ્સ અને મલ્ટીકલર સ્લાઈડ્સ ખાસ આકર્ષણનું કેન્દ્ર બની છે. અહીં રંગબેરંગી ઊંચી વોટર સ્લાઈડ્સ પર બાળકો અને યુવાનો ઉત્સાહભેર મોજ માણતા જોવા મળી રહ્યા છે.
રિસોર્ટમાં બનાવવામાં આવેલ ખાસ રેઈન ડાન્સ ઝોનમાં ડીજેના ધમાકેદાર સંગીત સાથે યુવાનો અને બાળકો પાણીના ફુવારા વચ્ચે ઝૂમી ઉઠ્યા હતા. પાણીની છાંટા અને સંગીતના માહોલે સમગ્ર વાતાવરણને ઉત્સાહભર્યું બનાવી દીધું હતું. સાથે જ વિશાળ સ્વિમિંગ પૂલમાં પરિવાર સાથે લોકો ઠંડા પાણીમાં ગરમીથી રાહત મેળવી આનંદ માણી રહ્યા છે.
રિસોર્ટમાં આવનાર મહેમાનો માટે જમવાની તેમજ રહેવાની સુવિધા પણ ઉપલબ્ધ કરાવવામાં આવી છે. માત્ર 500 રૂપિયાની ટિકિટમાં સવારે 11 વાગ્યાથી સાંજે 5 વાગ્યા સુધી વોટરપાર્કની તમામ મોજમજા સાથે સ્વાદિષ્ટ જમવાનું આપવામાં આવે છે. જ્યારે બાળકો માટે 400 રૂપિયાનો વિશેષ ટિકિટ દર રાખવામાં આવ્યો છે, જેના કારણે સામાન્ય પરિવારો પણ સરળતાથી આ સ્થળનો આનંદ માણી રહ્યા છે.
ખાસ કરીને બાળકોની સુરક્ષાને ધ્યાનમાં રાખીને રિસોર્ટમાં સેફટી ગાર્ડની ટીમ સતત તૈનાત રાખવામાં આવી છે. પાણીના વિસ્તારોમાં સતત દેખરેખ રાખી કોઈ અનિચ્છનીય બનાવ ન બને તે માટે પૂરતી તકેદારી લેવામાં આવી રહી છે, જેના કારણે માતા-પિતાઓ પણ નિરાંતે પોતાના બાળકોને રમવા મૂકી આનંદ અનુભવી રહ્યા છે.
ઉનાળાની તીવ્ર ગરમી વચ્ચે મેંગો રિસોર્ટ માત્ર મોજમજાનું સ્થળ નહીં પરંતુ કુદરતની વચ્ચે ઠંડક, શાંતિ અને પરિવાર સાથે યાદગાર પળો પસાર કરવાનો અનોખો અનુભવ બની રહ્યું છે. હાલ સમગ્ર વિસ્તારમાં આ રિસોર્ટ લોકોમાં ભારે આકર્ષણનું કેન્દ્ર બન્યું છે અને રોજ મોટી સંખ્યામાં પ્રવાસીઓ અહીં પહોંચીને પોતાની ઉનાળાની રજાઓને યાદગાર બનાવી રહ્યા છે.
રિપોર્ટ. અનિલ રામાનુજ રાધનપુર, પાટણ
