વિકસિત ભારત@૨૦૪૭ સંકલ્પ અભિયાન-પાટણ
પ્લાસ્ટિક મુક્તિથી સ્વચ્છતા સુધી: પાટણ જિલ્લામાં ૭ દિવસીય વિશેષ અભિયાન
૮ જૂનથી ૧૪ જૂન, ૨૦૨૬ દરમિયાન વિશેષ સ્વચ્છતા સપ્તાહનું આયોજન
લોકભાગીદારીથી સ્વચ્છતા, સ્વચ્છતાથી વિકાસ: વિકસિત પાટણનો સંકલ્પ
સ્વચ્છ ગામ, સમૃદ્ધ પાટણ: વિકાસના નવા યુગની શરૂઆત
વિકસિત ભારત@૨૦૪૭ના સપનાને સાકાર કરવા “ગામેગામ સ્વચ્છતાનો શંખનાદ”
કેપિટલ મેસેજ, ન્યુઝ
Capital message
વડાપ્રધાન નરેન્દ્રભાઈ મોદીના વિકસિત ભારત@૨૦૪૭ના રાષ્ટ્રીય સંકલ્પને લોકભાગીદારી દ્વારા સાકાર કરવા તેમજ વિકસિત ગુજરાત@૨૦૪૭ના ધ્યેયને જનઆંદોલનનું સ્વરૂપ આપવા રાજ્ય સરકાર દ્વારા તા. ૦૫ જૂનથી ૨૧ જૂન, ૨૦૨૬ દરમિયાન રાજ્યવ્યાપી જનજાગૃતિ અને જનકલ્યાણલક્ષી કાર્યક્રમોનું આયોજન કરવામાં આવ્યું છે. તેના ભાગરૂપે પાટણ જિલ્લામાં તા. ૮ જૂનથી ૧૪ જૂન, ૨૦૨૬ દરમિયાન વિશેષ સ્વચ્છતા સપ્તાહનું આયોજન કરવામાં આવ્યું છે.
જિલ્લા વહીવટી તંત્ર, જિલ્લા ગ્રામ વિકાસ એજન્સી, તાલુકા પંચાયતો, ગ્રામ પંચાયતો, જનપ્રતિનિધિઓ, કર્મયોગીઓ તથા નાગરિકોના સહયોગથી સમગ્ર જિલ્લામાં સ્વચ્છતા અંગે વ્યાપક જનજાગૃતિ લાવવાના પ્રયાસો હાથ ધરવામાં આવ્યા છે. “સ્વચ્છ ગામ થકી સ્વચ્છ જિલ્લા, સ્વચ્છ રાજ્ય અને સ્વચ્છ દેશ”ના સંકલ્પને સાકાર કરવા માટે વિવિધ સ્વચ્છતા આધારિત પ્રવૃત્તિઓ યોજાશે.
અભિયાનના પ્રથમ દિવસે ગામોગામ સાયકલ રેલી, બાઈક રેલી અને પદયાત્રા દ્વારા સ્વચ્છતાનો સંદેશ પહોંચાડવામાં આવશે. સાથે જ સોલિડ વેસ્ટ મેનેજમેન્ટ (SWM) નિયમોના અસરકારક અમલીકરણ માટે જરૂરી કામગીરી હાથ ધરાશે. ગ્રામ્ય વિસ્તારોમાં કચરાના વૈજ્ઞાનિક નિકાલ માટે સેગ્રીગેશન શેડની ઉપલબ્ધતા અંગે સમીક્ષા પણ કરવામાં આવશે.
અભિયાન દરમિયાન “પ્લાસ્ટિક મુક્ત ગ્રામ્ય દિવસ” અંતર્ગત ગામોના મુખ્ય માર્ગો, બજારો અને જાહેર સ્થળોએ સઘન પ્લાસ્ટિક સફાઈ ઝુંબેશ યોજાશે. એકત્રિત થયેલા પ્લાસ્ટિક કચરાનું વજન નોંધવામાં આવશે અને તેના વૈજ્ઞાનિક નિકાલની વ્યવસ્થા કરવામાં આવશે.
તળાવો, નદીકિનારા, જળાશયો અને ખુલ્લા પ્લોટોમાંથી કચરો દૂર કરી સ્વચ્છતા સુનિશ્ચિત કરવામાં આવશે. પાણી ભરાઈ રહેતા સ્થળો અને હેન્ડપંપની આસપાસની સફાઈ કરીને મચ્છરજન્ય રોગચાળો અટકાવવા માટે વિશેષ કામગીરી હાથ ધરાશે. ઉપરાંત ખુલ્લી અને બંધ ગટર, વરસાદી પાણીના નિકાલની વ્યવસ્થા તેમજ ગામની શેરીઓ અને રસ્તાઓની સંપૂર્ણ સફાઈ કરવામાં આવશે.
જિલ્લાભરના સરકારી કચેરીઓ, શાળાઓ, આંગણવાડી કેન્દ્રો, ધાર્મિક સ્થળો, હાટ-બજારો અને અન્ય જાહેર સ્થળોએ વ્યાપક સ્વચ્છતા અભિયાન હાથ ધરાશે. અભિયાનના અંતિમ દિવસે નાગરિકોને સ્વચ્છતા શપથ લેવડાવવામાં આવશે તેમજ SWM Rules-2026 અંગે જાગૃતિ ફેલાવવામાં આવશે. ખાસ કરીને ઘરગથ્થુ કચરાને ભીનો, સુકો, જોખમી અને સેનેટરી એમ ચાર પ્રકારમાં અલગ કરવાની બાબતે માર્ગદર્શન આપવામાં આવશે.
જિલ્લા વહીવટી તંત્ર દ્વારા આ અભિયાનમાં માનનીય સંસદસભ્યઓ, ધારાસભ્યઓ, સ્થાનિક સ્વરાજ્ય સંસ્થાઓના પ્રતિનિધિઓ, સામાજિક સંસ્થાઓ અને સામાન્ય નાગરિકોને સક્રિય સહભાગી બનવા અનુરોધ કરવામાં આવ્યો છે. લાંબા સમયથી એકત્રિત થતા લેગસી વેસ્ટના કાયમી નિકાલ અને બસ સ્ટેન્ડ, શાકભાજી માર્કેટ યાર્ડ જેવા વધુ કચરો એકત્રિત થતા વિસ્તારોને પ્રાથમિકતા આપવામાં આવશે.
પાટણ જિલ્લામાં હાથ ધરાયેલું આ વિશેષ સ્વચ્છતા અભિયાન માત્ર સફાઈ પૂરતું મર્યાદિત નહીં રહે, પરંતુ સ્વચ્છતા, પર્યાવરણ સંરક્ષણ, આરોગ્ય અને નાગરિક જવાબદારી અંગેની જાગૃતિનું શક્તિશાળી જનઆંદોલન બની “વિકસિત પાટણ”ના નિર્માણમાં મહત્વપૂર્ણ ભૂમિકા ભજવશે. સ્વચ્છ, સ્વસ્થ, સુવ્યવસ્થિત અને પ્રગતિશીલ પાટણના નિર્માણ દ્વારા વિકસિત ગુજરાત@૨૦૪૭ અને વિકસિત ભારત@૨૦૪૭ના સ્વપ્નને સાકાર કરવાની દિશામાં જિલ્લો વધુ એક મજબૂત પગલું ભરી રહ્યો છે.
