વિકસિત ભારત@૨૦૪૭ના સંકલ્પ અભિયાન-પાટણ
વિકસિત ભારત@૨૦૪૭ના સંકલ્પને જનઆંદોલન બનાવવા પાટણમાં તૈયારીઓ તેજ
જિલ્લા કલેક્ટર પ્રશાંત જિલોવાના અધ્યક્ષસ્થાને સમીક્ષા બેઠક યોજાઈ
કેપિટલ મેસેજ, ન્યુઝ
Capital message
વડાપ્રધાનના વિકસિત ભારત@૨૦૪૭ના રાષ્ટ્રીય સંકલ્પને લોકભાગીદારી દ્વારા સાકાર કરવા તેમજ વિકસિત ગુજરાત@૨૦૪૭ના ધ્યેયને જનઆંદોલનનું સ્વરૂપ આપવા રાજ્ય સરકાર દ્વારા તા. ૦૫ જૂનથી ૨૧ જૂન, ૨૦૨૬ દરમિયાન રાજ્યભરમાં વિવિધ જનજાગૃતિ અને જનકલ્યાણલક્ષી કાર્યક્રમોનું આયોજન કરવામાં આવ્યું છે. આ કાર્યક્રમોના પાટણ જિલ્લામાં અસરકારક અને સુચારૂ આયોજન માટે જિલ્લા કલેક્ટર પ્રશાંત જિલોવાના અધ્યક્ષસ્થાને કલેક્ટર કચેરી ખાતે સમીક્ષા બેઠક યોજાઈ હતી.
બેઠકમાં જિલ્લાના વિવિધ વિભાગોના નોડલ અધિકારીઓ સાથે આગામી દિવસોમાં યોજાનારા કાર્યક્રમોની તૈયારીઓ, આયોજન વ્યવસ્થા તથા વિભાગીય સંકલન અંગે વિસ્તૃત ચર્ચા કરવામાં આવી હતી. સ્વચ્છતા અભિયાન, પ્રગતિ પથ યાત્રા, પ્રતિષ્ઠિત વ્યક્તિ સંપર્ક અભિયાન, વિકસિત ભારત સંકલ્પ સંમેલન, સરકારની સિદ્ધિઓની પ્રદર્શની, જનકલ્યાણ શિબિરો, પ્રાકૃતિક ખેતી કાર્યશાળાઓ તેમજ વિશ્વ યોગ દિવસની ઉજવણી સહિતના કાર્યક્રમોને સફળ બનાવવા જરૂરી કામગીરીની સમીક્ષા કરવામાં આવી હતી.
જિલ્લા કલેક્ટરએ દરેક કાર્યક્રમનું આયોજન સુવ્યવસ્થિત રીતે થાય, વધુમાં વધુ નાગરિકો સુધી સરકારની કલ્યાણકારી યોજનાઓની માહિતી પહોંચે અને લોકભાગીદારીને પ્રોત્સાહન મળે તે માટે અધિકારીઓને જરૂરી માર્ગદર્શન અને સૂચનો આપ્યા હતા. તેમણે નોડલ અધિકારીઓને વિભાગીય સ્તરે નિયમિત સમીક્ષા કરી કામગીરીનું સતત મોનિટરિંગ કરવા તેમજ સમયસર અહેવાલ રજૂ કરવાની સૂચના આપી હતી.
કલેક્ટરએ જણાવ્યું હતું કે વિકસિત ભારત@૨૦૪૭ અને વિકસિત ગુજરાત@૨૦૪૭ના લક્ષ્યો હાંસલ કરવા માટે સમાજના તમામ વર્ગોની સહભાગિતા અત્યંત મહત્વપૂર્ણ છે. આ અભિયાનને જનઆંદોલનનું સ્વરૂપ આપવા દરેક વિભાગે સંકલનપૂર્વક કામગીરી કરી લોકો સુધી વિકાસ અને જનકલ્યાણના સંદેશને પહોંચાડવો જોઈએ.
આ બેઠકમાં જિલ્લા વિકાસ અધિકારી સી.એલ. પટેલ, નિવાસી અધિક કલેક્ટર મેહુલ બરાસરા સહિત જિલ્લાના વિવિધ વિભાગોના ઉચ્ચ અધિકારીઓ ઉપસ્થિત રહ્યા હતા.
