વિકસિત ભારત સંકલ્પ અભિયાન-પાટણ ખાસ લેખ
૧૨ વર્ષ વિકાસના, વિશ્વાસના અને જન કલ્યાણના
લખપતિ દીદી પહેલ: ગ્રામ્ય મહિલાઓના આર્થિક સશક્તિકરણ તરફ મજબૂત પગલું
પાટણમાં ૧૬,૪૫૪ મહિલાઓએ લખ્યો આત્મનિર્ભરતાનો નવો ઇતિહાસ: વધુ ૩૦,૯૨૭ મહિલાઓ બનશે લખપતિ દીદી
લખપતિ દીદી અભિયાન: વિકસિત ભારતના નિર્માણમાં ગ્રામ્ય મહિલાઓની વધતી ભાગીદારી
૨૦૨૮-૨૯ સુધી હજારો મહિલાઓને લખપતિ બનાવવાનો સંકલ્પ: મહિલા સમૃદ્ધિના નવા અધ્યાયની શરૂઆત
કેપિટલ મેસેજ, ન્યુઝ
Capital message
દેશના વડાપ્રધાન નરેન્દ્રભાઈ મોદીએ ૧૫ ઓગસ્ટ, ૨૦૨૩ના રોજ સ્વતંત્રતા દિવસના અવસરે ગ્રામ્ય મહિલાઓના આર્થિક સશક્તિકરણ માટે “લખપતિ દીદી” પહેલની જાહેરાત કરી હતી. આ મહત્વાકાંક્ષી પહેલનો અમલ દીનદયાળ અંત્યોદય યોજના – રાષ્ટ્રીય ગ્રામીણ આજીવિકા મિશન (DAY-NRLM) હેઠળ કરવામાં આવી રહ્યો છે.
લખપતિ દીદી પહેલનો મુખ્ય ઉદ્દેશ સ્વસહાય જૂથો (Self Help Groups) સાથે સંકળાયેલી મહિલાઓને વિવિધ આવકવર્ધક પ્રવૃત્તિઓ, કૌશલ્ય વિકાસ, નાણાકીય સશક્તિકરણ અને ઉદ્યોગસાહસિકતા દ્વારા વાર્ષિક રૂ. ૧ લાખ કે તેથી વધુ આવક મેળવવા સક્ષમ બનાવવાનો છે. આ પહેલ ગ્રામ્ય મહિલાઓને આત્મનિર્ભર બનાવી તેમના જીવનસ્તરમાં ગુણાત્મક સુધારો લાવવા માટે મહત્વપૂર્ણ સાબિત થઈ રહી છે.
પાટણ જિલ્લામાં વર્ષ ૨૦૨૪-૨૫થી ૨૦૨૬-૨૭ દરમિયાન કુલ ૪૩,૭૫૨ સ્વસહાય જૂથની મહિલાઓને લખપતિ દીદી બનાવવાનો લક્ષ્યાંક પ્રાપ્ત થયો છે. આ અંતર્ગત વર્ષ ૨૦૨૪-૨૫ દરમિયાન ૧૬,૪૫૪ મહિલાઓ સફળતાપૂર્વક લખપતિ દીદી તરીકે ઉભરી આવી છે, જે જિલ્લાની મહિલા સશક્તિકરણ યાત્રામાં એક મહત્વપૂર્ણ સિદ્ધિ છે. વર્ષ ૨૦૨૫-૨૬ની કામગીરી હાલમાં પ્રગતિમાં છે અને વધુ મહિલાઓને આર્થિક રીતે સશક્ત બનાવવા માટે વિવિધ પ્રયાસો હાથ ધરવામાં આવી રહ્યા છે.
વધુમાં, રાજ્ય અને કેન્દ્ર સરકાર દ્વારા વર્ષ ૨૦૨૬-૨૭થી ૨૦૨૮-૨૯ દરમિયાન જિલ્લામાં ૩૦,૯૨૭ મહિલાઓને લખપતિ દીદી બનાવવાનો નવો લક્ષ્યાંક ફાળવવામાં આવ્યો છે. આ લક્ષ્યાંકને સફળતાપૂર્વક સિદ્ધ કરવા માટે ચાલુ વર્ષથી જ જરૂરી આયોજન, તાલીમ, માર્ગદર્શન અને આવકવર્ધક પ્રવૃત્તિઓના અમલીકરણની કામગીરી શરૂ કરવામાં આવી છે.
લખપતિ દીદી પહેલ માત્ર એક યોજના નહીં પરંતુ ગ્રામ્ય મહિલાઓના આત્મવિશ્વાસ, સ્વાવલંબન અને આર્થિક સ્વતંત્રતાનો મજબૂત આધારસ્તંભ બની રહી છે. મહિલાઓને રોજગાર અને સ્વરોજગારની નવી તકો ઉપલબ્ધ કરાવી આ પહેલ “વિકસિત ભારત @ ૨૦૪૭”ના સંકલ્પને સાકાર કરવામાં પણ મહત્વપૂર્ણ યોગદાન આપી રહી છે.
More Read
જિલ્લા ગ્રામ વિકાસ એજન્સી તથા રાષ્ટ્રીય ગ્રામીણ આજીવિકા મિશન દ્વારા વધુમાં વધુ મહિલાઓ આ પહેલનો લાભ લઈ આર્થિક સમૃદ્ધિ તરફ આગળ વધે તે માટે સતત પ્રયાસો કરવામાં આવી રહ્યા છે.
