લાખોના બસ સ્ટોપ બન્યા બિનઉપયોગી:ધૂળ ખાય છે સુવિધાઓ
ડભોઇ સ્ટેચ્યુ ઓફ યુનિટી માર્ગ પર લાખોના ખર્ચે બનેલા બસ સ્ટોપ ધૂળ ખાઈ રહ્યા છે તંત્રની ઘોર બેદરકારી. ડભોઈ નાંદોદી ભાગોળ પાસે પેસેન્જરોને બદલે અસામાજિક તત્વો અને માનસિક અસ્વસ્થ લોકોનો અડ્ડો બન્યા: લાખો રૂપિયાનું આંધણ માત્ર પાણીમાં ગયું?
કેપિટલ મેસેજ, ન્યુઝ
Capital message
ડભોઇ વિશ્વની સૌથી ઊંચી પ્રતિમા ‘સ્ટેચ્યુ ઓફ યુનિટી’ (SOU) ને જોડતા ડભોઇના મુખ્ય માર્ગો પરથી રોજના હજારો પ્રવાસીઓ અને સ્થાનિક મુસાફરો પસાર થાય છે. પરંતુ ડભોઇના નાંદોદી ભાગોળ પાસે મુસાફરોની સુવિધા માટે બનાવવામાં આવેલા બે નાના એસ.ટી. બસ ડેપો (પીકઅપ સ્ટેન્ડ) હાલમાં સરકારી તંત્ર અને અધિકારીઓની ઘોર નિષ્કાળજીના કારણે સદંતર બિસ્માર હાલતમાં જોવા મળી રહ્યા છે. લાખો રૂપિયાના ખર્ચે બનેલા આ ડેપો હાલ મુસાફરો માટે આશીર્વાદ બનવાને બદલે માત્ર ધૂળ ખાઈ રહ્યા છે
સામસામે આવેલા બંને ડેપો બન્યા અસામાજિક તત્વોનું આશ્રયસ્થાન
નાંદોદી ભાગોળ પાસે રસ્તાની આમને-સામને મુસાફરોને બસની રાહ જોવા માટે શેડ સાથેના નાના ડેપો બનાવવામાં આવ્યા હતા. પરંતુ લાંબા સમયથી એસ.ટી. વિભાગ કે સ્થાનિક તંત્ર દ્વારા એની કોઈ દેખરેખ રાખવામાં આવી નથી. પરિણામે, અહીં કોઈ મુસાફરો ઊભા રહી શકતા નથી. હાલ આ જગ્યા પર દિવસ-રાત કેટલાક અસામાજિક તત્વો અને માનસિક અસ્વસ્થ લોકો બેસી રહે છે તેમજ સૂઈ જાય છે. આ બસ સ્ટેન્ડ જોઈને એવું લાગે છે કે આ મુસાફરો માટેનું સ્ટેન્ડ નથી, પરંતુ કોઈનો ખાનગી અડ્ડો હોય!
ગંદકીના ઢગલા અને સુવિધાઓનો સદંતર અભાવ સરકારે પ્રજાના ટેક્સના પૈસા વાપરીને આ ઇન્ફ્રાસ્ટ્રક્ચર ઊભું તો કરી દીધું, પણ તેમાં પ્રાથમિક સુવિધાઓની ભારે અછત છે. પૂરતી સફાઈ ન થવાના કારણે આ નાના ડેપોમાં કચરાના મોટા-મોટા ઢગલા જામ્યા છે, જેના કારણે અસહ્ય દુર્ગંધ મારી રહી છે. આવી ગંદકી અને અસામાજિક તત્વોના ડરના લીધે મહિલા મુસાફરો, વૃદ્ધો અને બાળકોને ધોમધખતા તડકામાં કે વરસાદમાં રસ્તા પર ઉભા રહીને બસની રાહ જોવાની ફરજ પડી રહી છે. સ્થાનિકોમાં ઉગ્ર રોષ છે કે પ્રજાના પૈસા આ રીતે પાણીમાં કેમ વહાવી દેવામાં આવ્યા સ્થાનિકો અને મુસાફરોની વ્યાપક માંગ જો સત્તાધીશો અને એસ.ટી. વિભાગના જવાબદાર અધિકારીઓ આ બાબતને ગંભીરતાથી લે, આ બંને બસ સ્ટેન્ડની યોગ્ય સાફ-સફાઈ કરાવે અને ત્યાંથી અનધિકૃત લોકોને હટાવીને વ્યવસ્થિત વાતાવરણ પૂરું પાડે, તો આવનારા સમયમાં પેસેન્જરો તેનો સાચો ઉપયોગ કરી શકે. સ્ટેચ્યુ ઓફ યુનિટી જેવા આંતરરાષ્ટ્રીય પર્યટન સ્થળને જોડતા માર્ગ પર આવા દ્રશ્યો ડભોઇના વિકાસની પોલ ખોલી રહ્યા છે, ત્યારે તંત્ર વહેલી તકે જાગશે કે કેમ તે જોવું રહ્યું.
રિપોર્ટ :- ફઝલ રઝાક ખત્રી, ડભોઇ
