રાધનપુરમાં ફૈઝાને કાદરી ટ્રસ્ટ દ્વારા KYC કેમ્પને મળ્યુ જનસમર્થન:
વૃદ્ધ, વિધવા અને વિકલાંગ સહાય યોજનાના 147 લાભાર્થીઓને મળી માર્ગદર્શન અને સહાય
કેપિટલ મેસેજ, ન્યુઝ
Capital message
ફૈઝાને કાદરી એજ્યુકેશન એન્ડ ચેરીટેબલ ટ્રસ્ટ, રાધનપુર દ્વારા સમાજસેવાના કાર્યોને આગળ વધારતા વધુ એક સેવાકીય પ્રયાસ રૂપે બીજો KYC કેમ્પ સફળતાપૂર્વક યોજાયો હતો. ટ્રસ્ટ તથા ઘાંચી યુવા ટીમના સંયુક્ત સહયોગથી કાજીવાસ શાળામાં આયોજિત આ કેમ્પમાં વૃદ્ધ સહાય યોજના, વિધવા સહાય યોજના તેમજ વિકલાંગ સહાય યોજના અંતર્ગત લાભાર્થીઓને જરૂરી KYC પ્રક્રિયા અને ફોર્મ ભરવાની કામગીરીમાં માર્ગદર્શન અને સહાય પૂરી પાડવામાં આવી હતી.
આ કેમ્પ દરમિયાન અંદાજિત 147 જેટલા લાભાર્થીઓએ હાજરી આપી યોજનાઓનો લાભ મેળવવા જરૂરી દસ્તાવેજી પ્રક્રિયા પૂર્ણ કરી હતી. કેમ્પમાં ઉપસ્થિત લોકોને જરૂરી દસ્તાવેજોની માહિતી, ઓનલાઈન પ્રક્રિયા તેમજ સરકારની વિવિધ સહાય યોજનાઓ અંગે પણ સમજ આપવામાં આવી હતી. ખાસ કરીને વડીલો, વિધવા બહેનો અને દિવ્યાંગ લાભાર્થીઓને સરળતાથી સેવા મળી રહે તે માટે યુવાનો દ્વારા વિશેષ વ્યવસ્થા ગોઠવવામાં આવી હતી.
કેમ્પને સફળ બનાવવા માટે મુસ્લિમ સમાજના યુવાનો સવારથી જ સેવા કાર્યમાં જોડાઈ ગયા હતા. લાભાર્થીઓને લાઈનમાં વ્યવસ્થા કરાવવી, ફોર્મ ભરવામાં મદદરૂપ થવું, જરૂરી દસ્તાવેજોની તપાસ કરવી સહિતની કામગીરી ઉત્સાહપૂર્વક નિભાવી હતી. યુવાનોની નિઃસ્વાર્થ સેવા અને ટ્રસ્ટના આયોજનને સ્થાનિકોમાંથી પ્રશંસા મળી હતી.
આ પ્રસંગે ખાસ ઉપસ્થિત રહેલા પઠાણ હિદાયતુલ્લાખાન (સુપરવાઈઝર – PHC ગોતરકા), દારિફભાઈ મિર્ઝા (સામાજિક કાર્યકર) તથા ઠાકોર ભુરાભાઈ (સામાજિક કાર્યકર)નું ટ્રસ્ટ અને ઘાંચી યુવા ટીમ દ્વારા સન્માન કરી તેમની સેવાભાવનાને બિરદાવવામાં આવી હતી.
કેમ્પના અંતે ટ્રસ્ટ દ્વારા ઘાંચી યુવા ટીમ, તમામ સ્વયંસેવકો, સ્થાનિક સહયોગીઓ તથા ઉપસ્થિત મહાનુભાવોનો આભાર વ્યક્ત કરવામાં આવ્યો હતો. ટ્રસ્ટના આગેવાનો દ્વારા ભવિષ્યમાં પણ સમાજના જરૂરિયાતમંદ લોકો સુધી સરકારી યોજનાઓનો લાભ પહોંચાડવા આવા સેવાકીય કેમ્પો સતત યોજાતા રહેશે તેવી પ્રતિબદ્ધતા વ્યક્ત કરવામાં આવી હતી.
રિપોર્ટ. અનિલ રામાનુજ રાધનપુર
