ભારે વરસાદની આગાહીના પગલે હારીજ નગરપાલિકા સંપૂર્ણ સજ્જ
નીચાણવાળા વિસ્તારોમાં વિશેષ તકેદારી, 24×7 કંટ્રોલ રૂમ, ડી-વોટરિંગ પંપ, જેસીબી સહિત તમામ વ્યવસ્થાઓ સ્ટેન્ડબાય
કેપિટલ મેસેજ
Capital message
હવામાન વિભાગ દ્વારા રાજ્યમાં ભારે વરસાદની આગાહી જાહેર કરવામાં આવતાં જિલ્લા વહીવટી તંત્ર દ્વારા જાહેર કરાયેલા એલર્ટના અનુસંધાને પાટણ જિલ્લાના પુરવઠા અધિકારી તથા હારીજ તાલુકાના લાયઝન અધિકારી હેમાંગિનીબેન ગુર્જરના અધ્યક્ષસ્થાને હારીજ નગરપાલિકા ખાતે ઉચ્ચસ્તરીય સમીક્ષા બેઠક યોજાઈ હતી. બેઠકમાં હારીજ નગરપાલિકાના પ્રમુખ, ઉપપ્રમુખ, ચૂંટાયેલા સભ્યો, મુખ્ય અધિકારી તેમજ સંબંધિત અધિકારીઓ અને કર્મચારીઓ ઉપસ્થિત રહ્યા હતા.
બેઠકમાં ભારે વરસાદની સંભવિત પરિસ્થિતિમાં નાગરિકોની જાનમાલની સુરક્ષા, વરસાદી પાણીનો ઝડપી નિકાલ, નીચાણવાળા વિસ્તારોમાં સતત દેખરેખ તથા ત્વરિત રાહત કામગીરી અંગે વિસ્તૃત આયોજનની સમીક્ષા કરવામાં આવી હતી. અગાઉના ચોમાસામાં જ્યાં પાણી ભરાવાની સ્થિતિ સર્જાઈ હતી તેવા વિસ્તારોને પ્રાથમિકતા આપીને પૂર્વ સાવચેતીના તમામ પગલાં અમલમાં મૂકવાનો નિર્ણય લેવામાં આવ્યો હતો.
હારીજ નગરપાલિકા દ્વારા શિવવિલા સોસાયટી, હસ્તીનાપુર સોસાયટી, અંબિકાનગર સોસાયટી, ધુણીયા વિસ્તાર, ખેમાસર વિસ્તાર તથા અમૃતપુરા વિસ્તારને સંવેદનશીલ વિસ્તાર તરીકે ચિહ્નિત કરીને ત્યાં વિશેષ મોનિટરિંગ હાથ ધરવામાં આવ્યું છે. આ વિસ્તારોમાં સતત દેખરેખ રાખવા માટે સંબંધિત કર્મચારીઓ અને સ્થાનિક જનપ્રતિનિધિઓને જવાબદારીઓ સોંપવામાં આવી છે જેથી કોઈપણ પરિસ્થિતિમાં તાત્કાલિક કાર્યવાહી કરી શકાય.
વરસાદી પાણીના ઝડપી નિકાલ માટે નગરપાલિકા દ્વારા ડ્રેનેજ લાઈનો અને વરસાદી પાણીની ગટરોની સફાઈની કામગીરી પૂર્ણ કરવામાં આવી છે. ઉપરાંત નીચાણવાળા વિસ્તારોમાં પાણી ભરાય તો તેનો ત્વરિત નિકાલ થઈ શકે તે માટે ડી-વોટરિંગ પંપ મશીનો તૈયાર રાખવામાં આવ્યા છે. કાદવ-કીચડ દૂર કરવા, રસ્તાઓ અવરોધમુક્ત બનાવવા તેમજ રાહત અને બચાવ કામગીરીને વધુ અસરકારક બનાવવા માટે જેસીબી મશીનો પણ સ્ટેન્ડબાય રાખવામાં આવ્યા છે.
આપત્તિની પરિસ્થિતિમાં અસરગ્રસ્ત નાગરિકોને સલામત સ્થળે ખસેડી શકાય તે માટે સ્થળાંતરની પૂર્વ તૈયારીઓ પણ કરવામાં આવી છે. તમામ વિભાગો વચ્ચે સંકલન જળવાઈ રહે અને રાહત કામગીરીમાં કોઈ વિલંબ ન થાય તે માટે અધિકારીઓ અને કર્મચારીઓને ચોક્કસ જવાબદારીઓ સોંપવામાં આવી છે. સ્થાનિક કોર્પોરેટરોને પોતાના વોર્ડના નીચાણવાળા વિસ્તારોમાં સતત નિરીક્ષણ રાખવા અને કોઈપણ પરિસ્થિતિની જાણ તાત્કાલિક કંટ્રોલ રૂમને કરવા સૂચના આપવામાં આવી છે.
ભારે વરસાદની સ્થિતિમાં નાગરિકોને તાત્કાલિક સહાય મળી રહે તે માટે હારીજ નગરપાલિકા દ્વારા 24 કલાક કાર્યરત કંટ્રોલ રૂમ શરૂ કરવામાં આવ્યો છે. કોઈપણ પ્રકારની આપત્તિ અથવા મુશ્કેલીની સ્થિતિમાં નાગરિકો ૭૫૬૭૬ ૨૨૦૦૯ નંબર પર સંપર્ક કરીને જરૂરી મદદ મેળવી શકશે. આ હેલ્પલાઇનની માહિતી સોશિયલ મીડિયા સહિત વિવિધ માધ્યમો દ્વારા વ્યાપકપણે પ્રસારિત કરવામાં આવી રહી છે.
નગરપાલિકા દ્વારા સોશિયલ મીડિયા પ્લેટફોર્મ મારફતે વરસાદ સંબંધિત એડવાઇઝરી, સાવચેતીના પગલાં અને જરૂરી માર્ગદર્શિકા સમયાંતરે જાહેર કરવામાં આવી રહી છે જેથી નાગરિકો સુધી અધિકૃત માહિતી સમયસર પહોંચે અને તેઓ જરૂરી સાવચેતી રાખી શકે.
ચોમાસા દરમિયાન રોગચાળો ફેલાતો અટકાવવા તેમજ નાગરિકોને શુદ્ધ પીવાનું પાણી ઉપલબ્ધ રહે તે માટે પીવાના પાણીની લાઈનોનું જરૂરી સમારકામ કરવામાં આવ્યું છે. સાથે જ સમગ્ર શહેરમાં સઘન સફાઈ અભિયાન હાથ ધરી ગટર, વરસાદી પાણીના નિકાલના માર્ગો તથા જાહેર સ્થળોની સફાઈ કરવામાં આવી રહી છે.
More Read
જિલ્લા વહીવટી તંત્રના માર્ગદર્શન હેઠળ હારીજ નગરપાલિકા દ્વારા કરવામાં આવેલી આ પૂર્વ તૈયારીઓથી ભારે વરસાદની સંભવિત પરિસ્થિતિમાં અસરકારક રીતે કામગીરી કરી શકાય અને નાગરિકોની સુરક્ષા સુનિશ્ચિત કરી શકાય તે માટે તમામ જરૂરી વ્યવસ્થાઓ સજ્જ કરવામાં આવી હોવાનું બેઠકમાં જણાવવામાં આવ્યું હતું. નાગરિકોને પણ તંત્ર દ્વારા આપવામાં આવતી સૂચનાઓનું પાલન કરવા, અફવાઓથી દૂર રહેવા તથા જરૂર જણાય ત્યારે કંટ્રોલ રૂમનો સંપર્ક કરવા અપીલ કરવામાં આવી છે.
