એકતાનગરમાં ‘એકતા પ્રકાશ પર્વ-2026’નો મુખ્યમંત્રીના હસ્તે ભવ્ય પ્રારંભ
સ્ટેચ્યુ ઓફ યુનિટી પરિસરમાં 15 જાન્યુઆરી, 2027 સુધી રોશનીના માધ્યમથી ભારતની સંસ્કૃતિ, રાષ્ટ્રીય એકતા અને આધુનિક વિકાસની ઝાંખી રજૂ કરાશે
કેપિટલ મેસેજ
More Read
Capital message
એકતાનગર: ગુજરાતના મુખ્યમંત્રી ભૂપેન્દ્રભાઈ પટેલે ભારતની સમૃદ્ધ સાંસ્કૃતિક વિરાસત, વિવિધતા, રાષ્ટ્રીય એકતા અને આધુનિક વિકાસને રોશનીની કલાત્મક અભિવ્યક્તિ દ્વારા રજૂ કરતા ‘એકતા પ્રકાશ પર્વ-2026’નો એકતાનગર ખાતે ભવ્ય પ્રારંભ કરાવ્યો હતો. વડાપ્રધાન નરેન્દ્રભાઈ મોદીની પ્રેરણાથી નિર્માણ પામેલી વિશ્વની સૌથી ઊંચી પ્રતિમા ‘સ્ટેચ્યુ ઓફ યુનિટી’ના પરિસરમાં યોજાનારો આ પ્રકાશોત્સવ પ્રવાસીઓ માટે આકર્ષણનું કેન્દ્ર બનશે.
તા. 15 જાન્યુઆરી, 2027 સુધી ચાલનારા આ પ્રકાશોત્સવમાં ભારતની સાંસ્કૃતિક વિવિધતા, ઐતિહાસિક વારસો, રાષ્ટ્રીય એકતા અને આધુનિક વિકાસની રોશનીમય ઝાંખી પ્રસ્તુત કરવામાં આવી છે. પ્રકાશ અને કલાના સમન્વયથી તૈયાર કરવામાં આવેલા આ આયોજન દ્વારા દેશની વિવિધતામાં રહેલી એકતાનો સંદેશ જન-જન સુધી પહોંચાડવાનો પ્રયાસ કરવામાં આવ્યો છે.
આ પ્રસંગે મુખ્યમંત્રી ભૂપેન્દ્રભાઈ પટેલે જણાવ્યું હતું કે, સરદાર વલ્લભભાઈ પટેલના એકતાના મંત્રને સાકાર કરવા અને વડાપ્રધાન નરેન્દ્રભાઈ મોદીના ‘એક ભારત, શ્રેષ્ઠ ભારત’ના સંકલ્પને વધુ મજબૂત બનાવવા માટે રાજ્ય સરકાર સતત પ્રયત્નશીલ છે. ‘એકતા પ્રકાશ પર્વ’ના માધ્યમથી દેશનાં વિવિધ રાજ્યોની સંસ્કૃતિ, પરંપરા અને વિશિષ્ટતાઓને એક મંચ પર લાવવાનો પ્રયાસ કરવામાં આવ્યો છે.
તેમણે વધુમાં જણાવ્યું હતું કે, આ પર્વ દેશનાં વિવિધ રાજ્યોની વિશેષતાઓને જાણવાની અને માણવાની તક પૂરી પાડશે. સાથે જ, નાગરિકોમાં રાષ્ટ્રીય એકતાની ભાવનાને વધુ મજબૂત બનાવશે અને ભારતની વિવિધતામાં રહેલી એકતાનું સુંદર પ્રતિબિંબ રજૂ કરશે.
7.6 કિલોમીટરના વિસ્તારમાં થીમ આધારિત રોશનીનું આકર્ષણ
એકતાનગરમાં આશરે 7.6 કિલોમીટરના વિસ્તારમાં થીમ આધારિત લાઇટિંગ અને ઇલ્યુમિનેશનની વિશેષ વ્યવસ્થા કરવામાં આવી છે. ઇન્ડોર અને આઉટડોર એમ બે વિભાગમાં આયોજિત આ પ્રકાશોત્સવમાં પ્રવાસીઓને ભારતની વૈવિધ્યસભર સંસ્કૃતિથી લઈને આધુનિક ટેકનોલોજી અને વિકાસ સુધીની અનોખી સફરનો અનુભવ મળશે.
રોશનીની કલાત્મક રજૂઆતો, વિવિધ થીમ આધારિત ઇલ્યુમિનેશન અને ભારતના ગૌરવશાળી વારસાની ઝાંખી દ્વારા આ ઉત્સવ એકતાનગરના પ્રવાસન આકર્ષણમાં વધુ ઉમેરો કરશે. સ્ટેચ્યુ ઓફ યુનિટીના ભવ્ય પરિસરમાં યોજાતો આ પ્રકાશોત્સવ ભારતની સાંસ્કૃતિક સમૃદ્ધિ, રાષ્ટ્રીય ગૌરવ અને એકતાના સંદેશને ઉજાગર કરવાની સાથે પ્રવાસીઓને યાદગાર અનુભવ પૂરો પાડશે.
રિપોર્ટ રાજેશ જાદવ, પાટણ
