હારીજ ITI ખાતે યોજાયેલા રોજગાર ભરતી મેળામાં ૪૩ ઉમેદવારોની પ્રાથમિક પસંદગી
રોજગાર ભરતી મેળાઓ રોજગાર વાંચ્છુ યુવકો માટે સોનેરી તક સમાન
કેપિટલ મેસેજ, ન્યુઝ
Capital Message
પાટણ જિલ્લાના રોજગાર વાંચ્છુ યુવક યુવતીઓને ખાનગી ક્ષેત્રમાં રોજગારીની ઉત્તમ તક ઉપલબ્ધ કરાવવા જિલ્લા રોજગાર વિનિમય કચેરી, પાટણ દ્વારા આજરોજ સવારે ૧૦:૦૦ કલાકે આઈ.ટી.આઈ. હારીજ ખાતે રોજગાર ભરતી મેળાનું સફળ આયોજન કરવામાં આવ્યું હતું.
આ ભરતી મેળામાં કવચ કાલિબ્રે ગ્લોબલ કનેક્ટ પ્રા. લી., અમદાવાદ, પાવરડ્રાઈવ, સાણંદ (અમદાવાદ), લાભમ એન્ટરપ્રાઈઝ, મહેસાણા સહિત અન્ય પ્રતિષ્ઠિત ખાનગી ક્ષેત્રના નોકરીદાતાઓ ઉપસ્થિત રહ્યા હતા. વિવિધ કંપનીઓ દ્વારા ઇલેક્ટ્રિકલ, હેલ્પર, ઓપરેટર, CNC અને VMC મશીન ઓપરેટર તેમજ મિકેનિકલ ક્ષેત્રની અનેક જગ્યાઓ માટે ઇન્ટરવ્યુ લેવામાં આવ્યા હતા. જેમાં હાજર રહેલા ૬૭ ઉમેદવારોમાંથી ૪૩ ઉમેદવારોની સ્થળ પર જ પ્રાથમિક પસંદગી કરવામાં આવી હતી.
ભરતી મેળામાં ધોરણ ૧૦ પાસ, ધોરણ ૧૨ પાસ, આઈ.ટી.આઈ. (તમામ ટ્રેડ) તેમજ ડિપ્લોમા (મિકેનિકલ) લાયકાત ધરાવતા ઉમેદવારોએ ઉત્સાહપૂર્વક ભાગ લીધો હતો. ઉમેદવારો માટે વયમર્યાદા ૧૮ થી ૩૫ વર્ષ નક્કી કરવામાં આવી હતી.
આ પ્રસંગે ઉમેદવારોએ આવા ભરતી મેળાઓના મહત્વ અંગે પોતાના વિચારો વ્યક્ત કરતાં જણાવ્યું હતું કે, “આવા રોજગાર ભરતી મેળાઓ અમારા જેવા યુવકો માટે સોનેરી તક સમાન છે. એક જ સ્થળે વિવિધ કંપનીઓ સાથે સીધી મુલાકાતનો અવસર મળે છે, જેના કારણે સમય અને ખર્ચ બંને બચી જાય છે તથા રોજગારી મેળવવાની શક્યતાઓ વધે છે.”
પસંદગી પામેલ ઉમેદવારોએ રાજ્ય સરકાર તથા જિલ્લા રોજગાર કચેરીનો આભાર વ્યક્ત કર્યો હતો અને આવા વધુ ભરતી મેળાઓનું આયોજન કરવામાં આવે તેવી અપેક્ષા વ્યક્ત કરી હતી.
