રાધનપુરમાં ખુલ્લી ગટરો બની રહી છે મોતનો ખાડો
ઇન્દ્રપથ હોટેલ પાસે બાઈક સવાર ગટરમાં ખાબકતાં તંત્રની બેદરકારી ફરી ઉઘાડી પડી
રજૂઆતો છતાં કાર્યવાહી નહીં, નગરસેવક જયાબેન ઠાકોરે ઉઠાવ્યા તંત્ર સામે ગંભીર સવાલો
અંતે એક જ સવાલ લોકોમાં ગુંજી રહ્યો છે:- “શું તંત્ર કોઈ મોટી જાનહાનિની રાહ જોઈ રહ્યું છે?”
કેપિટલ મેસેજ, ન્યુઝ
રાધનપુર શહેરમાં ગટરની સમસ્યા ફરી એકવાર ગંભીર સ્વરૂપ ધારણ કરતી જોવા મળી રહી છે. શહેરના અનેક વિસ્તારોમાં ખુલ્લી ગટરો, તૂટેલા ઢાંકણાં, પાણી ભરાયેલા ખાડા અને બેદરકારીભરી પરિસ્થિતિના કારણે સ્થાનિક નાગરિકો તેમજ રાહદારીઓ માટે જીવલેણ સ્થિતિ સર્જાઈ રહી છે. વારંવાર રજૂઆતો છતાં કોઈ અસરકારક કામગીરી ન થતાં હવે સ્થાનિકોમાં ભારે રોષ અને અસંતોષનો માહોલ જોવા મળી રહ્યો છે.
આ સમગ્ર મામલે નગરસેવક જયાબેન ઠાકોરે સ્થાનિક તંત્રની કામગીરી પર સીધા સવાલો ઉઠાવ્યા છે. તેમણે આક્ષેપ કર્યો છે કે નગરપાલિકા હદ વિસ્તારમાં આવતાં નેશનલ હાઇવે ઓથોરિટી પાસે અનેક વખત લેખિત તેમજ મૌખિક રજૂઆતો કરવામાં આવી હોવા છતાં સમસ્યાના નિકાલ માટે કોઈ દૃઢ કાર્યવાહી કરવામાં આવી નથી. પરિણામે સામાન્ય જનતા આજે પણ અસુરક્ષિત પરિસ્થિતિમાં જીવવા મજબૂર બની રહી છે.તેમણે જણાવ્યું હતું કે શહેરમાં અનેક સ્થળોએ ગટરનાં ઢાંકણાં તૂટી ગયેલા છે, તો ઘણી જગ્યાએ ઢાંકણાં ગાયબ છે. જેના કારણે રસ્તા પર ચાલતા રાહદારીઓ, બાઈક ચાલકો તેમજ વાહનચાલકો માટે અકસ્માતનો ભય સતત યથાવત રહ્યો છે. ખાસ કરીને વરસાદી પાણી કે ગટરના પાણીના ભરાવાના કારણે રસ્તા અને ગટરના ખાડા વચ્ચેનો તફાવત દેખાતો ન હોવાથી દુર્ઘટનાનો ખતરો વધુ વધી જાય છે.
આજના દિવસે આ જ બેદરકારીનું એક ગંભીર ઉદાહરણ ઇન્દ્રપથ હોટેલ પાસે સામે આવ્યું હતું, જ્યાં એક બાઈક સવાર અચાનક ખુલ્લી ગટરમાં ખાબકી ગયો હતો. ઘટનાને પગલે આસપાસના વિસ્તારમાં એકાએક ચકચાર મચી ગઈ હતી. સદનસીબે આ ઘટનામાં કોઈ મોટી જાનહાનિ થઈ નહોતી, પરંતુ ઘટના એટલી ગંભીર હતી કે થોડો પણ વધારે ભયાનક વળાંક આવ્યો હોત તો મોટી દુર્ઘટના સર્જાઈ શકતી હતી. સ્થાનિકોનો આક્ષેપ છે કે આ માત્ર એક ઘટના નથી, પરંતુ તંત્રની લાંબા સમયથી ચાલતી ઉદાસીનતા અને બેદરકારીનું જીવતું ઉદાહરણ છે.
સ્થાનિક નાગરિકોના જણાવ્યા મુજબ શહેરમાં ગટર અને ડ્રેનેજની સમસ્યા વર્ષોથી યથાવત છે, પરંતુ તેની સામે જવાબદાર વિભાગો દ્વારા માત્ર આશ્વાસનો જ આપવામાં આવ્યા છે. જમીનસ્તરે કોઈ કડક અને કાયમી ઉકેલ લાવવામાં આવ્યો નથી. જેના કારણે લોકો રોજબરોજ જીવના જોખમે અવરજવર કરવા મજબૂર બન્યા છે. નગરપાલિકા અને સંબંધિત વિભાગો વચ્ચે સંકલનનો સ્પષ્ટ અભાવ હોવાને કારણે સામાન્ય નાગરિકોને મુશ્કેલીઓનો સામનો કરવો પડી રહ્યો છે.
નગરસેવક જયાબેન ઠાકોરે સ્પષ્ટ શબ્દોમાં જણાવ્યું છે કે, જો સમયસર ખુલ્લી ગટરો પર ઢાંકણાં મૂકવાની, તૂટેલી ગટરોનું મરામત કાર્ય કરવાની અને જોખમી વિસ્તારોમાં સુરક્ષા વ્યવસ્થા ઊભી કરવાની કામગીરી હાથ ધરવામાં નહીં આવે, તો આવનારા સમયમાં કોઈ મોટી જાનહાનિ કે ગંભીર અકસ્માત સર્જાઈ શકે છે. તેમણે તંત્રને તાત્કાલિક ધોરણે પગલાં લેવા અપીલ કરી છે.
રાધનપુર શહેરમાં સર્જાતી આવી પરિસ્થિતિએ અનેક સવાલો ઉભા કર્યા છે. શહેરના મધ્ય વિસ્તારોમાં જ જો આવી બેદરકારી હોય, તો અંદરના વિસ્તારોની સ્થિતિ કેટલી વિકટ હશે તેવો પ્રશ્ન પણ લોકોમાં ચર્ચાઈ રહ્યો છે. લોકોમાં એવી લાગણી પણ જોવા મળી રહી છે કે, તંત્ર કોઈ મોટી દુર્ઘટના કે જાનહાનિની રાહ જોઈ રહ્યું હોય તેવી સ્થિતિ ઉભી થઈ છે.
સ્થાનિકોમાં હવે માત્ર નારાજગી જ નહીં, પરંતુ ભય પણ વ્યાપી રહ્યો છે. ખાસ કરીને બાળકો, વૃદ્ધો, મહિલાઓ અને રાત્રિના સમયે પસાર થતા લોકો માટે આવી ખુલ્લી ગટરો મોટો ખતરો બની રહી છે. નગરજનો દ્વારા માંગ ઉઠી રહી છે કે, આ પ્રશ્નને હવે માત્ર રજૂઆતો સુધી મર્યાદિત ન રાખી તાત્કાલિક મેદાન પર કામગીરી શરૂ કરવી જોઈએ.
હાલમાં બનેલી આ ઘટના ફરી એકવાર એ વાત સાબિત કરે છે કે રાધનપુરમાં ગટરની સમસ્યા હવે માત્ર નાગરિક અસુવિધા નહીં, પરંતુ જાહેર સુરક્ષાનો ગંભીર પ્રશ્ન બની ગઈ છે. હવે જો તંત્ર સમયસર ચેતશે નહીં, તો આવનારા દિવસોમાં કોઈ મોટી દુર્ઘટના સર્જાય તો તેની સંપૂર્ણ જવાબદારી કોના માથે આવશે તેવો કડક સવાલ લોકો ઉઠાવી રહ્યા છે.
રિપોર્ટ. અનિલ રામાનુજ રાધનપુર, પાટણ
