રાધનપુરમાં આંતરરાષ્ટ્રીય યોગ દિવસની ઉજવણી, શેઠ કે.બી. હાઈસ્કૂલ ખાતે ભવ્ય યોગ કાર્યક્રમ યોજાયો
ધારાસભ્ય લવિંગજી ઠાકોરના અધ્યક્ષસ્થાને યોજાયેલા કાર્યક્રમમાં અધિકારીઓ, વિદ્યાર્થીઓ અને નગરજનો મોટી સંખ્યામાં જોડાયા
કેપિટલ મેસેજ, ન્યુઝ
Capital message
રાધનપુર : 12મા આંતરરાષ્ટ્રીય યોગ દિવસની ઉજવણી નિમિત્તે રાધનપુર શહેરની શેઠ કે.બી. હાઈસ્કૂલ ખાતે ભવ્ય યોગ કાર્યક્રમનું આયોજન કરવામાં આવ્યું હતું. ધારાસભ્ય લવિંગજી ઠાકોરના અધ્યક્ષસ્થાને યોજાયેલા આ કાર્યક્રમમાં વિવિધ વિભાગોના અધિકારીઓ, શિક્ષકો, વિદ્યાર્થીઓ તથા નગરજનો ઉત્સાહભેર જોડાયા હતા.
કાર્યક્રમની શરૂઆત યોગ અને પ્રાણાયામના વિવિધ આસનો સાથે કરવામાં આવી હતી. ઉપસ્થિત મહાનુભાવો અને વિદ્યાર્થીઓએ સામૂહિક રીતે યોગાભ્યાસ કરીને યોગ પ્રત્યેની જાગૃતિનો સંદેશ આપ્યો હતો. યોગ દ્વારા શરીર, મન અને આત્માના સમન્વય સાથે સ્વસ્થ જીવનશૈલી અપનાવી શકાય છે તે અંગે માર્ગદર્શન પણ આપવામાં આવ્યું હતું.
આ પ્રસંગે એસ.ટી.એમ. અધિકારી, રાધનપુર પોલીસ ઇન્સ્પેક્ટર આર.બી. વાઢીયા તથા તેમનો પોલીસ સ્ટાફ, શિક્ષકગણ, વિદ્યાર્થીઓ, નગરપાલિકા પ્રમુખ ભાવનાબેન સહિત મોટી સંખ્યામાં આગેવાનો અને નગરજનો ઉપસ્થિત રહ્યા હતા. ઉપસ્થિત મહાનુભાવોએ યોગના મહત્વ અંગે પોતાના વિચારો વ્યક્ત કરી નિયમિત યોગને જીવનનો અભિન્ન ભાગ બનાવવા અપીલ કરી હતી.
વક્તાઓએ જણાવ્યું હતું કે યોગ માત્ર શારીરિક કસરત નથી, પરંતુ માનસિક શાંતિ, આત્મવિશ્વાસ અને સકારાત્મક જીવન જીવવાનો એક અસરકારક માર્ગ છે. આજની વ્યસ્ત જીવનશૈલીમાં યોગ વ્યક્તિને તંદુરસ્ત અને તણાવમુક્ત રાખવામાં મહત્વપૂર્ણ ભૂમિકા ભજવે છે.
આંતરરાષ્ટ્રીય યોગ દિવસની ઉજવણી દરમિયાન તમામ ઉપસ્થિતોએ ઉત્સાહપૂર્વક ભાગ લીધો હતો અને નિયમિત યોગાભ્યાસ દ્વારા સ્વસ્થ, નિરોગી અને સકારાત્મક જીવન જીવવાનો સંકલ્પ વ્યક્ત કર્યો હતો. સમગ્ર કાર્યક્રમ સફળતાપૂર્વક અને ઉત્સાહપૂર્ણ વાતાવરણમાં સંપન્ન થયો હતો.
રિપોર્ટ. અનિલ રામાનુજ રાધનપુર, પાટણ
