રાધનપુરમાં મહિલાઓના જનઆંદોલનનો પડ્યો પ્રભાવ : નગરપાલિકાએ તાત્કાલિક શરૂ કરી વિકાસલક્ષી કામગીરી
ભૂખ હડતાળ અને ધરણા બાદ તંત્ર હરકતમાં આવ્યું, ગટર-રસ્તા-પાણી સહિતના પ્રશ્નોના નિરાકરણ માટે કામગીરીનો પ્રારંભ
કેપિટલ મેસેજ, ન્યુઝ
Capital message
રાધનપુર શહેરમાં મૂળભૂત સુવિધાઓના પ્રશ્નોને લઈને છેલ્લા કેટલાક દિવસોથી ઉગ્ર બનેલા જનઆંદોલન બાદ નગરપાલિકા તંત્ર હરકતમાં આવ્યું છે. ગટર, પીવાનું પાણી, સફાઈ, સ્ટ્રીટ લાઈટ અને ખરાબ રસ્તાઓ જેવી લાંબા સમયથી પડતર રહેલી સમસ્યાઓના નિરાકરણ માટે નગરપાલિકા દ્વારા વિવિધ વિસ્તારોમાં તાત્કાલિક ધોરણે વિકાસલક્ષી કામગીરી શરૂ કરવામાં આવી હોવાનું જાણવા મળ્યું છે.
ઉલ્લેખનીય છે કે શહેરના વોર્ડ નં. 1 થી 6ના રહીશો તેમજ મોટી સંખ્યામાં મહિલાઓએ નગરસેવિકા જયાબેન ઠાકોરના નેતૃત્વમાં નગરપાલિકા કચેરી ખાતે ધરણાં અને ભૂખ હડતાળ શરૂ કરી હતી. પ્રદર્શનકારીઓએ આક્ષેપ કર્યો હતો કે અનેક વખત રજૂઆતો કરવા છતાં તંત્ર દ્વારા કોઈ અસરકારક કાર્યવાહી કરવામાં આવતી નથી, જેના કારણે લોકોને રોજબરોજ ગંભીર મુશ્કેલીઓનો સામનો કરવો પડી રહ્યો છે.
આંદોલન દરમિયાન મહિલાઓ અને રહીશોએ સ્પષ્ટ ચેતવણી આપી હતી કે ગટર, રસ્તા, સફાઈ, સ્ટ્રીટ લાઈટ અને પાણીના પ્રશ્નોનો કાયમી ઉકેલ નહીં આવે ત્યાં સુધી તેમની લડત ચાલુ રહેશે અને જરૂર પડે તો વધુ ઉગ્ર આંદોલન કરવામાં આવશે. શહેરમાં વિકાસના દાવાઓ વચ્ચે મૂળભૂત સુવિધાઓના અભાવ સામે ઉઠેલા આ જનઆક્રોશે સમગ્ર શહેરનું ધ્યાન ખેંચ્યું હતું.
વધતા જનદબાણ વચ્ચે નગરપાલિકા પ્રમુખ દ્વારા કારોબારી ચેરમેન ઘાંચી ગુલામરસુલભાઈને આંદોલનકારીઓ સાથે ચર્ચા કરવા મોકલવામાં આવ્યા હતા. ચર્ચા દરમિયાન શહેરના નાગરિકોને પડતી ગટર, રસ્તા, સફાઈ, સ્ટ્રીટ લાઈટ અને પીવાના પાણીની સમસ્યાઓના નિરાકરણ માટે તાત્કાલિક પગલાં લેવામાં આવશે તેવી બાંહેધરી આપવામાં આવી હતી. આ ખાતરી મળ્યા બાદ દિવસભર ચાલેલું આંદોલન સમેટવામાં આવ્યું હતું.
બાંહેધરી અનુસાર હવે શહેરના વિવિધ વિસ્તારોમાં કામગીરીનો પ્રારંભ કરવામાં આવ્યો છે. કારોબારી ચેરમેન ઘાંચી ગુલામરસુલભાઈએ જણાવ્યું હતું કે નાગરિકોને પડતી મૂળભૂત સમસ્યાઓના ઉકેલ માટે તંત્ર ગંભીરતાથી કાર્ય કરી રહ્યું છે. જ્યાં લાંબા સમયથી પ્રશ્નો યથાવત હતા તે વિસ્તારોમાં પ્રાથમિકતા આધારે કામગીરી શરૂ કરવામાં આવી છે અને આગામી દિવસોમાં તેને વધુ વેગ આપવામાં આવશે.
નગરસેવિકા જયાબેન ઠાકોરે જણાવ્યું હતું કે મહિલાઓ અને રહીશોએ જનહિતના પ્રશ્નોને લઈને અવાજ ઉઠાવ્યો હતો. તંત્ર દ્વારા કામગીરી શરૂ કરવામાં આવતા લોકોની માંગણીઓને પ્રાથમિકતા મળી હોવાનું સ્પષ્ટ થયું છે. જોકે શહેરના તમામ પ્રશ્નોનું સંપૂર્ણ નિરાકરણ ન આવે ત્યાં સુધી જનહિતના મુદ્દાઓ પર સતત નજર રાખવામાં આવશે.
સ્થાનિક રહીશોમાં પણ કામગીરી શરૂ થતાં આશાનો માહોલ જોવા મળી રહ્યો છે. લાંબા સમયથી પડતર રહેલા પ્રશ્નોના ઉકેલની અપેક્ષા સાથે લોકોએ તંત્રના આ પગલાને આવકાર્યું છે. નાગરિકોના જણાવ્યા મુજબ જો શરૂ કરાયેલી કામગીરી સમયસર અને અસરકારક રીતે પૂર્ણ થશે તો શહેરમાં સુવિધાઓમાં નોંધપાત્ર સુધારો જોવા મળશે.
More Read
રાધનપુરમાં મહિલાઓ અને રહીશોના આંદોલન બાદ શરૂ થયેલી આ કામગીરીએ એક વખત ફરી સાબિત કર્યું છે કે જનહિતના પ્રશ્નો માટે ઉઠેલો લોકઅવાજ તંત્રને જવાબદારીપૂર્વક નિર્ણય લેવા અને કામગીરી કરવા માટે પ્રેરિત કરી શકે છે. હાલમાં સમગ્ર મામલો શહેરમાં ચર્ચાનો વિષય બન્યો છે અને લોકો હવે જાહેર કરાયેલી કામગીરીના પરિણામો પર નજર રાખી રહ્યા છે.
રિપોર્ટ. અનિલ રામાનુજ રાધનપુર, પાટણ
