પાટણ જિલ્લામાં ઓળખપત્ર વગર મોબાઈલ/સિમકાર્ડની ખરીદ-વેચ પર પ્રતિબંધ : નિયમ ભંગ કરનાર સામે કાયદેસર કાર્યવાહી
કેપિટલ મેસેજ, ન્યુઝ
Capital message
પાટણ જિલ્લામાં હાલની પ્રવર્તમાન આતંકવાદી પરિસ્થિતિ, ભૂતકાળમાં ગુજરાત રાજ્યમાં અમદાવાદ, સુરત તથા મોડાસા સહિત વિવિધ સ્થળોએ થયેલ બોમ્બ બ્લાસ્ટ જેવી આતંકવાદી પ્રવૃત્તિઓ, તેમજ ગુપ્તચર એજન્સીઓ દ્વારા મહત્વના ધાર્મિક સ્થળો, વાઇટલ ઇન્સ્ટોલેશન અને જાહેર સ્થળો ઉપર હુમલાની શક્યતા દર્શાવવામાં આવેલ હોવાને અનુલક્ષીને જાહેર સલામતી અને કાયદો-વ્યવસ્થા જળવાઈ રહે તે હેતુસર જરૂરી તકેદારી રાખવી આવશ્યક જણાય છે.
પાટણ જિલ્લામાં ઇન્ડિયન ઓઇલ કોર્પોરેશન (આઈ.ઓ.સી.) સિદ્ધપુર, શંખેશ્વર જૈન દેરાસર, વરાણા ખોડિયાર માતાજી મંદિર, રાણીની વાવ તથા રુદ્રમહાલય જેવા મહત્વના અને ઐતિહાસિક સ્થળો આવેલ છે. તપાસ દરમ્યાન એવું પણ જણાઈ આવેલ છે કે આતંકવાદી તેમજ ગુનાહિત પ્રવૃત્તિઓમાં સંડોવાયેલા ઇસમો જુના મોબાઈલ ફોન તથા સિમકાર્ડનો ઉપયોગ કરતા હોય છે અને ગુનાહિત પ્રવૃત્તિ બાદ તે વેચી દેતા અથવા બંધ કરી દેતા હોય છે. ઉપરાંત ચોરી, લૂંટ, ઘરફોડ ચોરી જેવા ગુનાઓમાં ચોરાયેલા મોબાઈલ ફોન બજારમાં વેચાઈ જતા હોવાનું પણ સામે આવેલ છે.
ઘણી વખત મોબાઈલ ટ્રેકિંગ દરમિયાન મોબાઈલ ધારક સુધી પહોંચતા જાણવા મળે છે કે મોબાઈલ અજાણી વ્યક્તિ પાસેથી ખરીદવામાં આવેલ હોય છે અને યોગ્ય ઓળખ વિગતો ઉપલબ્ધ ન હોવાને કારણે ગુનાના મૂળ સુધી પહોંચવામાં મુશ્કેલી સર્જાય છે. તેથી જુના મોબાઈલ ફોન તથા સિમકાર્ડની લે-વેચ કરતા વેપારીઓ ઉપર નિયંત્રણ રાખવું જાહેર હિતમાં આવશ્યક જણાય છે. ઉપરોક્ત પરિસ્થિતિને અનુલક્ષીને જાહેર સલામતી તથા કાયદો અને વ્યવસ્થા જાળવવા માટે નીચે મુજબ હુકમ કરવામાં આવે છે.
• પાટણ જિલ્લામાં કોઈપણ દુકાનદાર દ્વારા જુના અથવા નવા મોબાઈલ ફોનની ખરીદ-વેચાણ કરતી વખતે ગ્રાહકનું સંપૂર્ણ નામ, સરનામું તથા ઓળખ પુરાવાની નકલ ફરજિયાત મેળવવાની રહેશે.
• જુના મોબાઈલ ફોનની ખરીદ-વેચાણ કરતા વેપારીઓએ અલગ-અલગ રજીસ્ટર નિભાવવાના રહેશે.
ઉપરોક્ત તમામ રજીસ્ટર વેપારીએ ઓછામાં ઓછા પાંચ વર્ષ સુધી જાળવવાના રહેશે. કોઈપણ વ્યક્તિ દ્વારા ઓળખપત્ર વગર મોબાઈલ ફોન, સિમકાર્ડ અથવા હેન્ડસેટની લે-વેચ કરવામાં આવશે તો તે અંગે લેનાર તથા વેચનાર બંનેની અંગત જવાબદારી નક્કી કરવામાં આવશે.
આ જાહેરનામું તા.૩૦/૦૪/૨૦૨૬ થી તા.૨૮/૦૬/૨૦૨૬ સુધી (બંને દિવસો સહિત) અમલમાં રહેશે.
આ જાહેરનામાનો ભંગ કરનાર વ્યક્તિઓ સામે ભારતીય ન્યાય સંહિતા-૨૦૨૩ ની કલમ-૨૨૩ મુજબ કાર્યવાહી કરવા પાટણ જિલ્લામાં ફરજ બજાવતા પોલીસ સબ ઈન્સ્પેક્ટર તથા તેનાથી ઉપરના હોદ્દાના તમામ પોલીસ અધિકારીઓને અધિકૃત કરવામાં આવે છે.
