પાટણમાં વરસાદ બાદ જનજીવન ઝડપથી પૂર્વવત્ કરવા નગરપાલિકાની તાત્કાલિક કામગીરી
અસરગ્રસ્ત વિસ્તારોમાં તાત્કાલિક રાહત અને પુનઃસ્થાપન કામગીરી હાથ ધરાઈ
કેપિટલ મેસેજ, ન્યુઝ
Capital message
પાટણ શહેરમાં ગત તારીખ ૩ જુલાઈની રાત્રી દરમિયાન પડેલા ભારે વરસાદના કારણે અનેક વિસ્તારોમાં વૃક્ષો ધરાશાયી થવાની તેમજ કેટલીક સોસાયટીઓ અને નીચાણવાળા વિસ્તારોમાં વરસાદી પાણી ભરાઈ જવાની સ્થિતિ સર્જાઈ હતી.
આ પરિસ્થિતિને ધ્યાનમાં રાખીને પાટણ નગરપાલિકાના ચીફ ઓફિસરના માર્ગદર્શન હેઠળ નગરપાલિકાની વિવિધ ટીમો દ્વારા ૪ જુલાઈના રોજ સવારથી જ અસરગ્રસ્ત વિસ્તારોમાં તાત્કાલિક રાહત અને પુનઃસ્થાપન કામગીરી હાથ ધરવામાં આવી હતી.
નગરપાલિકાની ટીમ દ્વારા રસ્તાઓ પર ધરાશાયી થયેલા વૃક્ષો અને ડાળીઓ દૂર કરવાની કામગીરી યુદ્ધના ધોરણે કરવામાં આવી હતી, જેથી વાહનવ્યવહાર અને જનજીવન ઝડપથી પૂર્વવત્ થઈ શકે. ઉપરાંત, જ્યાં વરસાદી પાણી ભરાયા હતા તે વિસ્તારોમાં પાણીના ઝડપી નિકાલ માટે પમ્પિંગ સહિતની જરૂરી કાર્યવાહી હાથ ધરવામાં આવી હતી.
નગરપાલિકા દ્વારા શહેરની સ્થિતિ પર સતત નજર રાખવામાં આવી રહી છે અને વરસાદને કારણે સર્જાતી કોઈપણ સમસ્યાના તાત્કાલિક નિવારણ માટે તમામ સંબંધિત ટીમોને સતર્ક રાખવામાં આવી છે. નાગરિકોને પણ અનાવશ્યક બહાર ન નીકળવા તેમજ કોઈપણ પ્રકારની સમસ્યા જણાય તો નગરપાલિકાને જાણ કરવા અપીલ કરવામાં આવી છે.
