જાહેરનામું:
ચૂંટણી દરમિયાન પાટણ જિલ્લામાં લાઉડ સ્પીકર ઉપયોગ પર નિયંત્રણ : જિલ્લા મેજીસ્ટ્રેટનું જાહેરનામું
કેપિટલ મેસેજ, ન્યુઝ
ગુજરાત પોલીસ અધિનિયમ, ૧૯૫૧ ની કલમ-૩૩ ની પેટા કલમ-૧ (આર)(૩) હેઠળ જિલ્લા મેજીસ્ટ્રેટ દ્વારા ચૂંટણી દરમિયાન શાંતિ અને કાયદો-વ્યવસ્થા જળવાઈ રહે તે હેતુસર મહત્વપૂર્ણ જાહેરનામું બહાર પાડવામાં આવ્યું છે.
ગુજરાત રાજ્ય ચૂંટણી આયોગ દ્વારા જાહેર કરાયેલા કાર્યક્રમ મુજબ સ્થાનિક સ્વરાજ્ય સંસ્થાઓની સામાન્ય તથા પેટા ચૂંટણીઓ એપ્રિલ-૨૦૨૬ અંતર્ગત પાટણ જિલ્લામાં જિલ્લા પંચાયત, તાલુકા પંચાયતો, નગરપાલિકાઓ તેમજ રાધનપુર નગરપાલિકાના વોર્ડ નં.૨ની પેટા ચૂંટણીનું મતદાન તા. ૨૬/૦૪/૨૦૨૬ના રોજ યોજાશે, જ્યારે મતગણતરી તા. ૨૮/૦૪/૨૦૨૬ના રોજ હાથ ધરાશે.
ચૂંટણી પ્રક્રિયા દરમિયાન અવાજ પ્રદૂષણ નિયંત્રિત રાખવા તથા જાહેર આરોગ્ય અને શાંતિ જાળવવા જિલ્લા મેજીસ્ટ્રેટ દ્વારા તા. ૦૨/૦૪/૨૦૨૬ના ૦૦:૦૦ કલાકથી તા. ૩૦/૦૪/૨૦૨૬ના ૨૪:૦૦ કલાક સુધી જિલ્લામાં લાઉડ સ્પીકરના ઉપયોગ પર નિયંત્રણ મૂકવામાં આવ્યું છે.
જાહેરનામા મુજબ પરવાનગી વિના કોઈપણ ચૂંટણી સભા, સરઘસ અથવા વાહન પર માઈક/લાઉડ સ્પીકરનો ઉપયોગ કરી શકાશે નહીં. સવારના ૦૮:૦૦ થી રાત્રિના ૧૦:૦૦ દરમિયાન જ સંબંધિત તાલુકા એક્ઝિક્યુટિવ મેજીસ્ટ્રેટની પૂર્વ મંજૂરીથી તેનો ઉપયોગ કરી શકાશે. પરવાનગી માટે ઓછામાં ઓછા ૪૮ કલાક અગાઉ અરજી કરવી ફરજિયાત રહેશે.
વાહનોમાં લાઉડ સ્પીકરનો ઉપયોગ કરતા રાજકીય પક્ષો, ઉમેદવારો અથવા કાર્યકરોએ વાહનની ઓળખ તથા નોંધણી નંબર અંગે માહિતી આપી પરવાનગીપત્રમાં નોંધ કરાવવી રહેશે. લેખિત પરવાનગી વગર ઉપયોગમાં લેવાતા લાઉડ સ્પીકર અને વાહનો જપ્ત કરવામાં આવશે. ઉપરાંત ઉમેદવાર અથવા કાર્યકરે પ્રાપ્ત પરવાનગી અંગે ચૂંટણી અધિકારી તથા સ્થાનિક પોલીસને જાણ કરવી રહેશે.
મતદાન શાંતિપૂર્ણ રીતે પૂર્ણ થાય તે માટે નિર્ધારિત સમય પૂર્વેના ૪૮ કલાક દરમિયાન કોઈપણ પ્રકારના લાઉડ સ્પીકરનો ઉપયોગ કરવા પર પ્રતિબંધ મૂકવામાં આવ્યો છે.
આ જાહેરનામાનો ભંગ કરનાર સામે ગુજરાત પોલીસ અધિનિયમ, ૧૯૫૧ ની કલમ-૧૩૧ હેઠળ કાયદેસરની કાર્યવાહી હાથ ધરવામાં આવશે.
