પાટણ જિલ્લામાં NCC કેડેટ દ્વારા મતદાન જાગૃતિ અભિયાન સફળતાપૂર્વક પૂર્ણ
કેપિટલ મેસેજ, ન્યુઝ
લોકશાહીના મહાપર્વરૂપ સ્થાનિક સ્વરાજ્યની સંસ્થાઓની સામાન્ય ચૂંટણી-૨૦૨૬ અંતર્ગત પાટણ જિલ્લામાં મતદાન પ્રત્યે જનજાગૃતિ લાવવા માટે વિવિધ શાળાઓના NCC કેડેટ દ્વારા તા. ૦૩ એપ્રિલથી તા. ૦૮ એપ્રિલ ૨૦૨૬ દરમિયાન વિશેષ મતદાન જાગૃતિ અભિયાન યોજાયું હતું.
આ અભિયાન દરમિયાન NCC કેડેટોએ જિલ્લામાં ગામે-ગામ અને ઘરે-ઘરે જઈ મતદારોને મતદાનના મહત્વ અંગે માહિતગાર કર્યા હતા. ખાસ કરીને યુવા મતદારો, દિવ્યાંગ મતદારો, થર્ડ જેન્ડર મતદારો તેમજ ૮૫ વર્ષથી વધુ વયના મતદારો સહિત સતાયું વર્ગના મતદારો સુધી પહોંચી તેઓને મતદાન માટે પ્રોત્સાહિત કરવામાં આવ્યા હતા.
કેડેટોએ “મારો મત-મારો અધિકાર”ના સંદેશ સાથે લોકશાહી પ્રત્યે જાગૃતિ ફેલાવી અને દરેક મતદારે ફરજિયાત મતદાન કરે તે માટે અપીલ કરી હતી. આ અભિયાનથી જિલ્લામાં મતદાન પ્રત્યે જાગૃતિમાં વધારો થયો છે અને મતદારોમાં ઉત્સાહનો માહોલ જોવા મળ્યો છે.
જિલ્લા પ્રશાસન દ્વારા આ પ્રકારના જાગૃતિ કાર્યક્રમોને મહત્વ આપવામાં આવી રહ્યું છે, જેના પરિણામે વધુમાં વધુ મતદારો મતદાનમાં ભાગ લેશે તેવી આશા વ્યક્ત કરવામાં આવી છે.
