બાસ્પા ખાતે વિદ્યાલયના નામકરણ અને છાત્રાપર્ણ સમારોહનુ ભવ્ય આયોજન.
ઝીલિયા ગાંધી આશ્રમ સંચાલિત શાળાને મળ્યું ‘મહર્ષિ સ્વામી સચ્ચિદાનંદ’નું નામ..
કેપિટલ મેસેજ, ન્યુઝ
More Read
સમી તાલુકાના બાસ્પા ગામે બુધવારે શિક્ષણ અને સંસ્કારને સમર્પિત એક ભવ્ય સમારોહનું આયોજન કરવામાં આવ્યું હતું. ઝીલિયા ગાંધી આશ્રમ સંચાલિત વિદ્યાલયના નામકરણ અને છાત્રાપર્ણ કાર્યક્રમમાં આધ્યાત્મિક, શૈક્ષણિક, સામાજિક અને જાહેર જીવનના અગ્રણીઓની ઉપસ્થિતિ વચ્ચે શાળાને હવે ‘મહર્ષિ સ્વામી સચ્ચિદાનંદ ઉ.બુ. માધ્યમિક શાળા (બાસ્પા)’ તરીકે સત્તાવાર રીતે ઓળખ આપવામાં આવી છે.
કાર્યક્રમ ઝીલિયા ગાંધી આશ્રમના સંચાલક પદ્મશ્રી માલજીભાઈ દેસાઈની અધ્યક્ષતામાં યોજાયો હતો. આ પ્રસંગે શૈક્ષણિક ક્ષેત્રે વિશિષ્ટ યોગદાન આપનાર પદ્મશ્રી ડો. જગદીશ ત્રિવેદી દ્વારા નિર્મિત આ વિદ્યાલય તેમની 15મી શાળા હોવાનું પણ ગૌરવપૂર્ણ રીતે નોંધાયું હતું. આ શાળા ગાંધી આશ્રમ ઝીલિયા દ્વારા સંચાલિત થાય છે, જે ગ્રામ્ય વિસ્તારના વિદ્યાર્થીઓને ગુણવત્તાયુક્ત શિક્ષણ અને સંસ્કાર આપવાના કાર્યમાં સક્રિય છે.
આ સમારોહમાં ક્રાંતિકારી સંત અને પદ્મભૂષણ મહર્ષિ સ્વામી સચ્ચિદાનંદ મહારાજ, પદ્મશ્રી શાહબુદ્દીન રાઠોડ, પદ્મશ્રી ડો. જગદીશ ત્રિવેદી, ધારાસભ્ય લવિંગજી ઠાકોર અને ગુજરાત રાજ્ય પાઠ્યપુસ્તક મંડળના અધ્યક્ષ મનુભાઈ પાવરા સહિતના મહાનુભાવો વિશેષ ઉપસ્થિત રહ્યા હતા. ઉપરાંત મુખ્ય દાતાઓ, સહયોગી દાતાઓ, ભૂતપૂર્વ વિદ્યાર્થીઓ, વિવિધ ક્ષેત્રોના આગેવાનો અને મોટી સંખ્યામાં ગ્રામજનોની ઉપસ્થિતિએ કાર્યક્રમને વિશેષ ગૌરવ અને ભવ્યતા અર્પી હતી.
કાર્યક્રમનો પ્રારંભ દીપ પ્રાગટ્ય અને પ્રાર્થના સાથે કરવામાં આવ્યો હતો, જેના કારણે સમગ્ર વાતાવરણમાં આધ્યાત્મિકતા અને સંસ્કારનું સુંદર સંમિશ્રણ સર્જાયું હતું. ત્યારબાદ પદ્મશ્રી માલજીભાઈ દેસાઈએ સ્વાગત પ્રવચન આપતાં ઝીલિયા ગાંધી આશ્રમ દ્વારા સંચાલિત શૈક્ષણિક યાત્રાની શરૂઆતથી અત્યાર સુધીની સફરનો વિગતવાર ચિતાર રજૂ કર્યો હતો. તેમણે ગ્રામ્ય સમાજમાં શિક્ષણનું મહત્વ, સંસ્કાર આધારિત કેળવણી અને સંસ્થાની સેવાભાવના પર પ્રકાશ પાડ્યો હતો.
મહર્ષિ સ્વામી સચ્ચિદાનંદ મહારાજે પોતાના આશીર્વચનમાં સમાજસેવા, શિક્ષણ અને માનવકલ્યાણ માટે કાર્યરત વ્યક્તિઓ અને સંસ્થાઓના યોગદાનને બિરદાવ્યું હતું. તેમણે ખાસ કરીને કથાકાર અને કલાકારના માધ્યમથી સમાજજાગૃતિ અને માનવસેવાના કાર્યોને ખૂબ જ મહત્વપૂર્ણ ગણાવ્યા હતા.
પદ્મશ્રી શાહબુદ્દીન રાઠોડે પોતાના ઉદ્દબોધનમાં પદ્મશ્રી ડો. જગદીશ ત્રિવેદીને રાષ્ટ્રવાદી અને માનવતાવાદી કલાકાર તરીકે ઓળખાવ્યા હતા. સાથે જ તેમની હળવી રમૂજ, જીવનમૂલ્યો અને સંસ્કારસભર વિચારો દ્વારા ઉપસ્થિત સૌને મંત્રમુગ્ધ કર્યા હતા. તેમના સંબોધને કાર્યક્રમમાં એક અલગ જ ઉર્જા અને આનંદનો માહોલ સર્જ્યો હતો.
પદ્મશ્રી ડો. જગદીશ ત્રિવેદીએ પોતાના સંબોધનમાં ઝીલિયા ગાંધી આશ્રમ સંચાલિત શૈક્ષણિક સંસ્થાઓના કાર્યોની હૃદયપૂર્વક સરાહના કરી હતી. તેમણે ગ્રામ્ય વિસ્તારમાં શિક્ષણનો દીવો પ્રગટાવી બાળકોના ભવિષ્યને ઉજ્જવળ બનાવવાના પ્રયાસોને ખૂબ જ પ્રેરણાદાયી ગણાવ્યા હતા. શિક્ષણ માત્ર ડિગ્રી પૂરતું મર્યાદિત ન રહી, પણ સંસ્કાર, માનવતા અને રાષ્ટ્રભાવના સાથે જોડાય તે સમયની માંગ હોવાનું તેમણે જણાવ્યું હતું.
More Read
સમગ્ર કાર્યક્રમ દરમિયાન વિદ્યાલય, આશ્રમ અને ગ્રામ્ય સમાજ વચ્ચેનો લાગણીસભર સંબંધ સ્પષ્ટપણે જોવા મળ્યો હતો. ભૂતપૂર્વ વિદ્યાર્થીઓ અને દાતાશ્રીઓએ પણ સંસ્થાની યાત્રાને ગૌરવપૂર્ણ ગણાવી હતી અને ભવિષ્યમાં પણ શૈક્ષણિક વિકાસ માટે સતત સહયોગ આપવાની ભાવના વ્યક્ત કરી હતી.
આ સમગ્ર સમારોહનું સફળ અને સુવ્યવસ્થિત સંચાલન ઝીલિયા ગાંધી આશ્રમના આચાર્ય જસુભાઈ દેસાઈ, પન્નાલાલ પંચાલ, લાલભાઈ દેસાઈ અને ભલાભાઈ રબારી દ્વારા કરવામાં આવ્યું હતું. કાર્યક્રમના અંતે ઉપસ્થિત મહાનુભાવો, દાતાશ્રીઓ, આગેવાનો અને ગ્રામજનોનો આભાર વ્યક્ત કરવામાં આવ્યો હતો.
બાસ્પા ગામે યોજાયેલ આ સમારોહ માત્ર શાળાના નામકરણ પૂરતો મર્યાદિત ન રહ્યો, પરંતુ ગ્રામ્ય શિક્ષણ, સંસ્કાર અને સમાજસેવાને સમર્પિત એક પ્રેરણાદાયી અને ઐતિહાસિક પ્રસંગ તરીકે યાદગાર બન્યો હતો.
રિપોર્ટ. અનિલ રામાનુજ રાધનપુર
