રાધનપુરમાં RPL 2026 નાઈટ ક્રિકેટ ટુર્નામેન્ટનો રોમાંચક સમાપન…
કેશરી નંદન ઇલેવન બન્યું ચેમ્પિયન, પવનપુત્ર ઇલેવન રનર્સ-અપ…
ફાઇનલમાં 31 રનથી જીત સાથે કેશરી નંદન ઇલેવને જીત્યો ખિતાબ, ત્રીજા દિવસે ક્રિકેટપ્રેમીઓમાં ભારે ઉત્સાહ…
More Read
કેપિટલ મેસેજ, ન્યુઝ
રાધનપુરમાં શ્રી વઢિયાર વિભાગ રામાનંદી સાધુ યુવા સંગઠન દ્વારા આયોજિત RPL 2026 નાઈટ ક્રિકેટ ટુર્નામેન્ટનો ત્રીજા અને અંતિમ દિવસે રોમાંચક સમાપન થયો હતો. ત્રણ દિવસ સુધી ચાલેલા આ ક્રિકેટ મહોત્સવે સમાજ એકતા, યુવા શક્તિ અને ખેલભાવનાનો સુંદર સંદેશ આપ્યો હતો. ટુર્નામેન્ટના અંતિમ દિવસે રમાયેલી ફાઇનલ મેચમાં કેશરી નંદન ઇલેવનએ પવનપુત્ર ઇલેવન સામે 31 રનથી ભવ્ય વિજય મેળવી ચેમ્પિયન ટ્રોફી પોતાના નામે કરી હતી.
રાધનપુરમાં 3, 4 અને 5 એપ્રિલ દરમિયાન યોજાયેલા આ ટુર્નામેન્ટમાં કુલ 8 ટીમો અને 88 ખેલાડીઓએ ઉત્સાહભેર ભાગ લીધો હતો. 3 એપ્રિલે સાંજે 8 વાગ્યે ઓપનિંગ સમારોહ સાથે શરૂ થયેલી આ ક્રિકેટ સ્પર્ધાએ ત્રણ દિવસ સુધી રાધનપુરના ક્રિકેટપ્રેમીઓમાં જુસ્સો અને ઉત્સાહ જાળવી રાખ્યો હતો.
અંતિમ દિવસે રમાયેલી હાઇ-વોલ્ટેજ ફાઇનલ મેચમાં પવનપુત્ર ઇલેવન અને કેશરી નંદન ઇલેવન વચ્ચે જબરદસ્ત ટક્કર જોવા મળી હતી. બંને ટીમોના ખેલાડીઓએ મેદાન પર ઉમદા રમત, તાબડતોબ રન, ટાઇટ બોલિંગ અને તીખી ફિલ્ડિંગથી પ્રેક્ષકોને આખરી બોલ સુધી બાંધી રાખ્યા હતા. પરંતુ નિર્ણાયક ક્ષણોમાં કેશરી નંદન ઇલેવને શાનદાર પ્રદર્શન કરી મેચ પર પકડ મજબૂત બનાવી અને અંતે 31 રનની યાદગાર જીત સાથે ટુર્નામેન્ટનું ખિતાબ જીત્યું હતું.
ફાઇનલ મુકાબલામાં ગિરીશ દાદરે પોતાની ઓલરાઉન્ડ અને અસરકારક રમતના બળ પર “મેન ઓફ ધ મેચ”નો એવોર્ડ મેળવ્યો હતો. મેચ દરમિયાન તેમના પ્રદર્શનને કારણે ટીમને મજબૂત પોઝિશન મળતાં જીતનો માર્ગ સરળ બન્યો હતો.
સમગ્ર ટુર્નામેન્ટ દરમિયાન સતત શાનદાર બેટિંગ કરનાર મેહુલભાઈ અંબાડા (કેશરી નંદન ઇલેવન)ને “બેસ્ટ બેટ્સમેન ઓફ ધ ટુર્નામેન્ટ” જાહેર કરવામાં આવ્યા હતા. તેમણે ટુર્નામેન્ટ દરમિયાન અનેક મહત્વપૂર્ણ રન બનાવી પોતાની ટીમ માટે મજબૂત યોગદાન આપ્યું હતું.
જ્યારે સમગ્ર ટુર્નામેન્ટમાં ઘાતક બોલિંગ, ચોકસાઈભર્યા સ્પેલ અને વિકેટ ટેકિંગ પ્રદર્શન બદલ ગિરીશ દાદર (કેશરી નંદન ઇલેવન)ને “બેસ્ટ બોલર ઓફ ધ ટુર્નામેન્ટ” નો ખિતાબ એનાયત થયો હતો. તેમની બોલિંગ ટુર્નામેન્ટ દરમિયાન વિરોધી ટીમો માટે સતત પડકારરૂપ રહી હતી.તે ઉપરાંત ટુર્નામેન્ટમાં સર્વાંગી પ્રભાવશાળી રમત, સતત યોગદાન અને મેચ વિનિંગ પ્રદર્શન બદલ મેહુલ અંબાળાને “મેન ઓફ ધ સિરીઝ” તરીકે સન્માનિત કરવામાં આવ્યા હતા. બેટિંગમાં સ્થિરતા અને ટીમ માટેની મહત્વપૂર્ણ ઇનિંગ્સને કારણે તેઓ સમગ્ર ટુર્નામેન્ટના સૌથી અસરકારક ખેલાડી તરીકે ઉભરી આવ્યા હતા.
ફાઇનલ પૂર્ણ થયા બાદ આયોજકો દ્વારા ચેમ્પિયન કેશરી નંદન ઇલેવન તથા રનર્સ-અપ પવનપુત્ર ઇલેવનને ટ્રોફી અર્પણ કરી સન્માનિત કરવામાં આવ્યા હતા. આ સાથે બંને ટીમોના તમામ ખેલાડીઓને પણ યાદગાર સન્માન આપવામાં આવ્યું હતું. પવનપુત્ર ઇલેવનના કેપ્ટન બજરંગ જાખેલ તથા કેશરી નંદન ઇલેવનના કેપ્ટન ગિરીશના નેતૃત્વની પણ પ્રસંસા થઈ હતી.
ટુર્નામેન્ટ દરમિયાન ટ્રોફી, બોલ, મેન ઓફ ધ મેચ એવોર્ડ, મેડિકલ સુવિધા તેમજ અન્ય આયોજનાત્મક વ્યવસ્થાઓ માટે સમાજના દાતાઓએ ઉમદા સહયોગ આપ્યો હતો. અંતિમ સમારોહ દરમિયાન સમાજના અગ્રણી દાતાઓ અને સહયોગીઓને પણ સન્માનિત કરવામાં આવ્યા હતા. આયોજકો દ્વારા ખેલાડીઓ, મહેમાનો અને મોટી સંખ્યામાં ઉપસ્થિત પ્રેક્ષકો માટે નાસ્તા અને અલ્પાહારની સુંદર વ્યવસ્થા પણ કરવામાં આવી હતી.
આ સમગ્ર ટુર્નામેન્ટ માત્ર ક્રિકેટ પૂરતું મર્યાદિત ન રહી, પરંતુ તે સમાજ એકતા, યુવા સંગઠન, રમતગમત પ્રત્યેનો જુસ્સો અને ભાઈચારો મજબૂત બનાવતો ઉત્સવ બની રહ્યો હતો. ત્રણ દિવસ સુધી રાધનપુરમાં ક્રિકેટનો માહોલ જામ્યો હતો અને ખાસ કરીને ફાઇનલના દિવસે મોટી સંખ્યામાં ઉપસ્થિત પ્રેક્ષકોએ ઉત્સાહભેર ખેલાડીઓને ચીયર કરી સમગ્ર વાતાવરણને યાદગાર બનાવી દીધું હતું.RPL 2026નો આ સફળ સમાપન હવે રાધનપુરમાં આગામી વર્ષ માટે વધુ ભવ્ય અને વધુ પ્રતિસ્પર્ધાત્મક ક્રિકેટ મહોત્સવ માટેની અપેક્ષા વધુ મજબૂત બનાવે છે.
રિપોર્ટ. અનિલ રામાનુજ રાધનપુર (પાટણ )
