૬૫મી સુબ્રતો મુખર્જી ફૂટબોલ કપમાં રક્ષા શક્તિ સ્કૂલ વડનગરનો ભવ્ય વિજય
કેપિટલ મેસેજ, ન્યુઝ
Capital message
પાટણ : સરદાર પટેલ સંકુલ ખાતે યોજાયેલી ૬૫મી સુબ્રતો મુખર્જી ફૂટબોલ કપ સ્પર્ધામાં રક્ષા શક્તિ સ્કૂલ, વડનગરના ખેલાડીઓએ ઉત્કૃષ્ટ રમતનું પ્રદર્શન કરી અંડર-૧૫ વિભાગમાં એકતરફી જીત સાથે ચેમ્પિયનશિપ પોતાના નામે કરી હતી.
ફાઇનલ મુકાબલામાં રક્ષા શક્તિ સ્કૂલ વડનગરની ટીમે ધિણોજની ટીમ સામે શરૂઆતથી જ આક્રમક રમત અપનાવી હતી. સમગ્ર મેચ દરમિયાન શાનદાર ટીમવર્ક, ઝડપી પાસિંગ અને મજબૂત ડિફેન્સના બળે વિરોધી ટીમને કોઈ તક આપ્યા વિના ૭-૦ના જંગી અંતરથી વિજય મેળવી ચેમ્પિયન ટ્રોફી પર કબજો જમાવ્યો હતો. ખેલાડીઓના શાનદાર દેખાવને દર્શકો અને રમતપ્રેમીઓએ તાળીઓના ગડગડાટથી વધાવ્યો હતો.
સ્પર્ધાના અંડર-૧૭ વિભાગમાં સૈનિક સ્કૂલ, રાધનપુરની ટીમે પણ શ્રેષ્ઠ રમતનું પ્રદર્શન કરીને વિજેતા બનવાનો ગૌરવ પ્રાપ્ત કર્યો હતો.
સ્પર્ધા પૂર્ણ થયા બાદ યોજાયેલા પુરસ્કાર વિતરણ સમારોહમાં વિજેતા ખેલાડીઓને શ્રી વિવેકાનંદ વિકાસ મંડળના પ્રમુખ પરબતભાઈ ચૌધરી, મંત્રી દઝાભાઈ પટેલ તથા શાળા પરિવાર દ્વારા અભિનંદન પાઠવવામાં આવ્યા હતા. ખેલાડીઓના કોચ અને માર્ગદર્શકોના પ્રયત્નોની પણ પ્રશંસા કરવામાં આવી હતી.
More Read
રક્ષા શક્તિ સ્કૂલ વડનગરના ખેલાડીઓએ શિસ્ત, રમતગમત પ્રત્યેની નિષ્ઠા અને ઉત્તમ ટીમ સ્પિરિટના બળે આ યાદગાર સિદ્ધિ મેળવી છે. આ ભવ્ય વિજય સાથે ફૂટબોલના મેદાનમાં વડનગરનું વર્ચસ્વ ફરી એકવાર સાબિત થયું હોવાનું રમતપ્રેમીઓએ જણાવ્યું હતું.
રિપોર્ટ. અનિલ રામાનુજ રાધનપુર, પાટણ
