રાધનપુરમાં ક્રિકેટ પ્રત્યે નો જુસ્સો : જીયા ક્રિકેટ એકેડમીથી યુવાઓને નેશનલ લેવલ સુધી પહોંચવાનો માર્ગ
ભાવેશ સાધુના માર્ગદર્શન હેઠળ 50થી વધુ વિદ્યાર્થીઓ તાલીમમાં, દર વર્ષે અનેક ખેલાડીઓ જિલ્લાની ટીમમાં સ્થાન મેળવે છે
કેપિટલ મેસેજ, ન્યુઝ
Capital message
રાધનપુરમાં ક્રિકેટ પ્રત્યેનો જુસ્સો દિવસેને દિવસે વધી રહ્યો છે, જેમાં જીયા ક્રિકેટ એકેડમી મહત્વપૂર્ણ ભૂમિકા ભજવી રહી છે. કોચ ભાવેશ સાધુ દ્વારા શરૂ કરાયેલ આ એકેડમી આજે સ્થાનિક યુવાનો માટે ક્રિકેટ ક્ષેત્રે આગળ વધવા માટેનું મજબૂત મંચ બની ગઈ છે.
ભારતીય ક્રિકેટના દિગ્ગજ ખેલાડીઓ સચિન તેંડુલકર અને ઝાહીર ખાનની પ્રેરણાથી લઈને શરૂ કરાયેલ આ એકેડમીમાં હાલમાં આશરે 50 જેટલા વિદ્યાર્થીઓ નિયમિત તાલીમ લઈ રહ્યા છે. અહીં ફિલ્ડિંગ, બેટિંગ, બોલિંગ અને નેટ પ્રેક્ટિસ જેવી સુવ્યવસ્થિત તાલીમ આપવામાં આવે છે, જે વિદ્યાર્થીઓને પ્રોફેશનલ ક્રિકેટ તરફ આગળ ધપાવે છે.
વિદ્યાર્થીઓના આરોગ્યને ધ્યાનમાં રાખીને એકેડમીમાં મેડિકલ સુવિધાઓ અને જરૂરી દવાઓ પણ ઉપલબ્ધ રાખવામાં આવે છે. સાથે જ 108 હેલ્પલાઇન દ્વારા એમ્બ્યુલન્સ સેવા અંગે માર્ગદર્શન આપી વિદ્યાર્થીઓમાં આપત્તિ સમયે જાગૃતિ લાવવામાં આવે છે.
આ એકેડમીની વિશેષતા એ છે કે અહીંથી દર વર્ષે 5થી 7 જેટલા ખેલાડીઓ જિલ્લા સ્તરે પસંદગી પામે છે. હાલમાં પણ 5 વિદ્યાર્થીઓનું જિલ્લા ક્રિકેટ ટીમમાં સિલેક્શન થવું એકેડમી માટે ગૌરવની વાત છે. વડોદરા અને પાટણ જિલ્લાઓમાં પણ આ એકેડમીના ખેલાડીઓએ પોતાની પ્રતિભા સાબિત કરી છે.કોચ ભાવેશ સાધુ દ્વારા જરૂરિયાત મઁદ બાળકોને ફ્રી માં એકેડમી તરફથી પૂરતું માર્ગદર્શન સાથે તાલીમ આપવામાં આવી રહી છે
એકેડમીના વિદ્યાર્થીઓમાં માત્ર રમતમાં નહીં પરંતુ નેશનલ લેવલ સુધી પહોંચવાની જબરદસ્ત લાગણી અને ઉત્સાહ જોવા મળે છે. ઘણા વિદ્યાર્થીઓ રણજી ટ્રોફી સુધી પહોંચવાનું લક્ષ્ય રાખી રહ્યા છે અને બેસ્ટ ક્રિકેટર તેમજ બેસ્ટ બોલર બનવાનું સપનું સજી રહ્યા છે.
રાધનપુરના યુવાનો હવે ક્રિકેટ જગતમાં પોતાનું સ્થાન બનાવવાની દિશામાં આગળ વધી રહ્યા છે અને શહેરનું નામ દેશભરમાં રોશન કરવાની તૈયારી દર્શાવી રહ્યા છે. જીયા ક્રિકેટ એકેડમી આ દિશામાં એક મજબૂત પાયો સાબિત થઈ રહી છે.
રિપોર્ટ. અનિલ રામાનુજ રાધનપુર
