SGFI અંતર્ગત સિદ્ધપુર તાલુકા કબડ્ડી સ્પર્ધા યોજાઈ
30 શાળાઓની 41 ટીમો વચ્ચે રોમાંચક મુકાબલા, વિવિધ વિભાગોમાં વિજેતા ટીમો હવે જિલ્લાકક્ષાએ રમશે
કેપિટલ મેસેજ
Capital message
સ્કૂલ ગેમ્સ ફેડરેશન ઓફ ઈન્ડિયા (SGFI) અંતર્ગત સિદ્ધપુર તાલુકા કુમાર અને કન્યા કબડ્ડી રમતોત્સવનું આયોજન ગણેશપુરા પ્રાથમિક શાળા (PM-ગુજરાત), તાલુકા સિદ્ધપુર ખાતે ઉત્સાહભેર કરવામાં આવ્યું હતું. તાલુકા કક્ષાની આ સ્પર્ધામાં વિવિધ શાળાઓના ખેલાડીઓએ રમતગમતની ભાવના સાથે જોરદાર પ્રદર્શન કરી સમગ્ર વાતાવરણને ઉત્સાહમય બનાવી દીધું હતું.
સ્પર્ધાના ઉદ્ઘાટન પ્રસંગે શાળાના આચાર્ય કપિલભાઈ શુક્લ, પાટણ જિલ્લા રમત મહામંત્રી મહેશભાઈ પટેલ, મનુભાઈ કનોડીયા, કૃષ્ણકુમાર, કબડ્ડી કોચ વિરેન્દ્રભાઈ દેસાઈ, સૂરજભાઈ ઠાકોર, રાજદીપભાઈ રાજપૂત, સંગીતાબેન ઠાકોર, જેસંગજી ઠાકોર તેમજ તાલુકાની વિવિધ શાળાઓમાંથી ઉપસ્થિત રહેલા માર્ગદર્શકો અને રમતગમત શિક્ષકોની ઉપસ્થિતિમાં કાર્યક્રમનો પ્રારંભ કરવામાં આવ્યો હતો. ઉપસ્થિત મહાનુભાવોએ ખેલાડીઓને રમતને જીત-હારથી ઉપર રાખીને શિસ્ત, રમતગમતની ભાવના અને ટીમ સ્પિરિટ સાથે રમવાની પ્રેરણા આપી હતી.
More Read
આ સ્પર્ધામાં કન્યા વિભાગમાં અંડર-14ની 5, જુનિયર વિભાગની 6 અને સિનિયર વિભાગની 2 એમ કુલ 13 ટીમોએ ભાગ લીધો હતો. જ્યારે કુમાર વિભાગમાં અંડર-14ની 10, જુનિયર વિભાગની 11 અને સિનિયર વિભાગની 7 એમ કુલ 28 ટીમો મેદાનમાં ઉતરી હતી. આમ તાલુકાની કુલ 30 શાળાઓની 41 ટીમોના ખેલાડીઓએ ઉત્સાહપૂર્વક ભાગ લઈ કબડ્ડીની રોમાંચક મેચો રમી હતી. સમગ્ર દિવસ દરમિયાન યોજાયેલી સ્પર્ધાઓમાં ખેલાડીઓએ શાનદાર રમતનું પ્રદર્શન કરી દર્શકોનું મન મોહી લીધું હતું.
સ્પર્ધાના અંતે વિવિધ વિભાગોમાં વિજેતા ટીમોની જાહેરાત કરવામાં આવી હતી. અંડર-14 કુમાર વિભાગમાં યુનિવર્સલ પબ્લિક સ્કૂલે પ્રથમ સ્થાન મેળવ્યું હતું જ્યારે ગણેશપુરા પ્રાથમિક શાળા (PM-ગુજરાત) દ્વિતીય સ્થાને રહી હતી. અંડર-14 કન્યા વિભાગમાં પુનાસણ પ્રાથમિક શાળાએ પ્રથમ અને ગાંગલાસણ પ. કેન્દ્ર (PM-ગુજરાત)એ દ્વિતીય સ્થાન મેળવ્યું હતું.
જુનિયર કુમાર વિભાગમાં ઉદય હાઈસ્કૂલ, ચંદ્રાવતીએ પ્રથમ સ્થાન હાંસલ કર્યું હતું જ્યારે એલ.એસ. હાઈસ્કૂલ, સિદ્ધપુર દ્વિતીય સ્થાને રહી હતી. જુનિયર કન્યા વિભાગમાં પુનાસણ પ્રાથમિક શાળાએ પ્રથમ સ્થાન મેળવ્યું હતું અને મુડાણા સરકારી સ્કૂલ દ્વિતીય ક્રમે રહી હતી.
સિનિયર કુમાર વિભાગમાં કલ્યાણા હાઈસ્કૂલે પ્રથમ સ્થાન મેળવ્યું હતું જ્યારે એલ.એસ. હાઈસ્કૂલ, સિદ્ધપુરે દ્વિતીય સ્થાન મેળવ્યું હતું. સિનિયર કન્યા વિભાગમાં ઉદય હાઈસ્કૂલ, ચંદ્રાવતીએ પ્રથમ સ્થાન મેળવી તાલુકા ચેમ્પિયન બનવાનો ગૌરવ પ્રાપ્ત કર્યો હતો.
સ્પર્ધાના સફળ આયોજનમાં આયોજક શાળા, રમતગમત શિક્ષકો, રેફરી મંડળ અને સ્વયંસેવકો દ્વારા નોંધપાત્ર કામગીરી કરવામાં આવી હતી. અંતે વિજેતા ખેલાડીઓ અને ટીમોને અભિનંદન પાઠવવામાં આવ્યા હતા. તાલુકા કક્ષાએ વિજેતા બનેલી તમામ ટીમો હવે જિલ્લાકક્ષાની SGFI કબડ્ડી સ્પર્ધામાં સિદ્ધપુર તાલુકાનું પ્રતિનિધિત્વ કરશે અને શ્રેષ્ઠ પ્રદર્શન કરશે તેવી શુભેચ્છા વ્યક્ત કરવામાં આવી હતી.
રિપોર્ટ. અનિલ રામાનુજ પાટણ
