પાટણ જિલ્લા ભાજપ કાર્યાલય ખાતે સ્થાપના દિવસની ભવ્ય ઉજવણી કરાઈ
કેપિટલ મેસેજ, ન્યુઝ
પાટણ: ભારતીય જનતા પાર્ટીના સ્થાપના દિવસ નિમિત્તે પાટણ જિલ્લા ભાજપ કાર્યાલય ખાતે ઉજવણીના કાર્યક્રમનું આયોજન કરવામાં આવ્યું હતું. પાર્ટીનો ધ્વજ ફરકાવી વંદે માતરમનું ગાન કરવામાં આવ્યું હતું.આ પ્રસંગે મુખ્ય વક્તા તરીકે ઉપસ્થિત રહેલા કિસાન મોરચાના પૂર્વ પ્રદેશ પ્રમુખ હિતેન્દ્રભાઈ પટેલે કાર્યકરોને સંબોધતા જણાવ્યું હતું કે દેશના પૂર્વ વડાપ્રધાન અટલજીએ તેમની પ્રથમ સભામાં જ ભવિષ્યવાણી કરી હતી કે “મારો મતદાર આજે ભલે ઘોડિયામાં સુવે છે, પરંતુ જેવો તે 18 વર્ષનો થશે એટલે ભારતીય જનતા પાર્ટીની સરકાર બનશે.” આજે આ શબ્દો સાચા સાબિત થયા છે અને પાર્ટી પંચાયતથી લઈને પાર્લામેન્ટ સુધી સત્તાના શિખરે પહોંચી છે.
ભારતીય જનતા પાર્ટી આજે માત્ર ભારતની જ નહીં પરંતુ વિશ્વની સૌથી મોટી રાજકીય પાર્ટી બની છે. તેમણે કાર્યકરોને આહવાન કર્યું હતું કે જેમની મનોકામનાઓ પૂર્ણ થઈ છે તેવા જન-જન સુધી પહોંચી આપણે તેમની સાથે રહેવાનું છે. આ ગૌરવપૂર્ણ અવસરે જિલ્લા પ્રભારી સત્યેન કુલાબર, જિલ્લા ભાજપ પ્રમુખ રમેશભાઈ સિંધવ,ધારાસભ્ય લવિંગજી ઠાકોર,જિલ્લા મહામંત્રી સંજયભાઈ પટેલ, બાબુજી ઠાકોર, લાલજીભાઈ રબારી તેમજ પૂર્વ પ્રમુખ મોહનભાઈ પટેલ સહિતના અનેક હોદ્દેદારો અને મોટી સંખ્યામાં કાર્યકર્તાઓ ઉપસ્થિત રહ્યા હતા.તમામ આગેવાનોએ ભાજપની વિચારધારાને ગામેગામ સુધી પહોંચાડવા અને સંગઠનલક્ષી કામગીરીને વધુ વેગ આપવા માટે સંકલ્પ કર્યો હતો.સ્થાપના દિવસની આ ઉજવણી પાટણ જિલ્લા ભાજપ પરિવાર માટે એક ઉત્સવ સમાન બની રહી હતી.કાર્યક્રમમાં સંગઠનની મજબૂતી વિશે ચર્ચા કરવામાં આવી હતી અને કાર્યકરોમાં નવો ઉત્સાહ ફૂંકવામાં આવ્યો હતો.
