રૂ.1.71 કરોડના ખર્ચે સરીયદ બ્રિજનું પ્રોટેક્શન વર્ક અને બેરિંગ રિપ્લેસમેન્ટ પૂર્ણ
કાંસા-સરીયદ-સાંપ્રા-ઉંદરા માર્ગ પર બ્રિજની મજબૂતાઈ વધતાં વાહનવ્યવહાર વધુ સુરક્ષિત બનશે
કેપિટલ મેસેજ
Capital message
પાટણ : પાટણ જિલ્લામાં માર્ગ અને મકાન રાજ્ય વિભાગ હસ્તકના પાટણ પેટા વિભાગ દ્વારા કાંસા-સરીયદ-સાંપ્રા-ઉંદરા મુખ્ય જિલ્લા માર્ગ પર આવેલા સરીયદ બ્રિજની પ્રોટેક્શન વર્ક તથા બેરિંગ રિપ્લેસમેન્ટની કામગીરી પૂર્ણ કરવામાં આવી છે. રૂ.1.71 કરોડના ખર્ચે હાથ ધરાયેલી આ કામગીરી પૂર્ણ થતાં બ્રિજની મજબૂતાઈ, સ્થિરતા અને સલામતીમાં વધારો થયો છે. જેના પરિણામે આ માર્ગ પરથી પસાર થતા વાહનચાલકો તેમજ આસપાસના ગ્રામ્ય વિસ્તારોના નાગરિકોને વધુ સુરક્ષિત અને સુગમ વાહનવ્યવહારની સુવિધા મળશે.
પાટણ પેટા વિભાગ હેઠળના આ મુખ્ય જિલ્લા માર્ગની સાંકળ કિ.મી. 8/200 થી 8/800 પર આવેલા સરીયદ બ્રિજની કામગીરી માટે સરકારશ્રી દ્વારા તા.12/03/2026ના પત્રથી રૂ.171.00 લાખની વહીવટી મંજૂરી આપવામાં આવી હતી. આ પ્રોજેક્ટમાં સરીયદ ગામ નજીક આવેલા મેજર બ્રિજના પ્રોટેક્શન વર્ક તથા બેરિંગ રિપ્લેસમેન્ટની કામગીરીનો સમાવેશ કરવામાં આવ્યો હતો. માર્ગ અને મકાન વિભાગ દ્વારા ઇજારદાર રાધે બિલ્ડટેક, મહેસાણાને તા.01/05/2026ના રોજ વર્ક ઓર્ડર આપવામાં આવ્યો હતો, જે અંતર્ગત સમગ્ર કામગીરી સફળતાપૂર્વક પૂર્ણ કરવામાં આવી છે.
More Read
બ્રિજની કામગીરી દરમિયાન નાગરિકોને અવરજવરમાં મુશ્કેલી ન પડે અને વાહનવ્યવહાર અવિરત જળવાઈ રહે તે હેતુથી ચાલુ ટ્રાફિક વચ્ચે બેરિંગ રિપ્લેસમેન્ટની કામગીરી કરવામાં આવી હતી. કામગીરીના પ્રારંભે બ્રિજના હાલના બેરિંગની સ્થિતિ, ક્રેક તથા ડિસ્પ્લેસમેન્ટની તપાસ કરી જરૂરી સલામતી વ્યવસ્થા કરવામાં આવી હતી. ત્યારબાદ બ્રિજના સુપર સ્ટ્રક્ચર એટલે કે ગર્ડરને ઉપાડવા માટે પિયર કેપ અને એબટમેન્ટ ઉપર હાઈડ્રોલિક જેક મૂકવામાં આવ્યા હતા. ગર્ડરને બંને બાજુએ સમાન લેવલથી આશરે 25 થી 30 મી.મી. જેટલો ઊંચો કરવામાં આવ્યો હતો.
સુપર સ્ટ્રક્ચર જેક ઉપર આવ્યા બાદ જૂના ઘસાયેલા તથા ક્ષતિગ્રસ્ત બેરિંગને કાળજીપૂર્વક દૂર કરી પેડેસ્ટલની સફાઈ કરવામાં આવી હતી. પેડેસ્ટલ પર થયેલા ક્રેક તથા લેવલની ખામીને નોન-શ્રિંક ગ્રાઉટ અને માઈક્રો કોંક્રિટ દ્વારા રીપેર કરી લેવલમાં સુધારો કરવામાં આવ્યો હતો. ત્યારબાદ ડિઝાઈન મુજબના નવા ઈલાસ્ટોમેરીક બેરિંગને યોગ્ય સ્થાને સ્થાપિત કરી તેની દિશા તથા લેવલની ચકાસણી કરવામાં આવી હતી. હાઈડ્રોલિક જેકને ધીરે-ધીરે નીચે ઉતારી ગર્ડરનો સંપૂર્ણ લોડ નવા બેરિંગ પર ટ્રાન્સફર કરવામાં આવ્યો હતો. અંતે બેરિંગની કામગીરી, ગર્ડરનું એલાઈનમેન્ટ તથા એક્સપાન્શન જોઈન્ટની ચકાસણી કર્યા બાદ બ્રિજને વાહનવ્યવહાર માટે ખુલ્લો મુકવામાં આવ્યો હતો.
સરીયદ બ્રિજની પ્રોટેક્શન વર્ક તથા બેરિંગ રિપ્લેસમેન્ટની કામગીરી પૂર્ણ થવાથી બ્રિજની સ્થિરતા અને મજબૂતાઈમાં વધારો થયો છે. આ કામગીરીથી બ્રિજનું આયુષ્ય વધારવામાં મદદ મળશે તેમજ ચોમાસા દરમિયાન પૂરના સમયે થતા ધોવાણ સામે પણ વધુ રક્ષણ મળશે. જેના કારણે કાંસા, સરીયદ, સાંપ્રા અને ઉંદરા સહિતના ગામો વચ્ચે બારેમાસ વાહનવ્યવહાર જળવાઈ રહેશે. બ્રિજ પરથી ભારે વાહનોની અવરજવર વધુ સુગમ બનતાં ખેડૂતોને કૃષિ પેદાશોના પરિવહનમાં સરળતા રહેશે. તેમજ શાળાના વિદ્યાર્થીઓ અને 108 જેવી ઇમરજન્સી સેવાઓને પણ ઝડપી અને સુરક્ષિત પરિવહનનો લાભ મળશે.
કાંસા-સરીયદ-સાંપ્રા-ઉંદરા માર્ગ પાટણ તાલુકાના મહત્વના ગ્રામ્ય વિસ્તારોને જોડતો મુખ્ય માર્ગ હોવાથી સરીયદ બ્રિજની કામગીરી પૂર્ણ થવાથી આ વિસ્તારો વચ્ચેની કનેક્ટિવિટી વધુ મજબૂત બનશે. માર્ગ વ્યવસ્થા વધુ સુદૃઢ બનતાં સ્થાનિક રોજગાર અને આર્થિક પ્રવૃત્તિઓને પણ વેગ મળશે. આમ, રૂ.171.00 લાખના ખર્ચે પૂર્ણ થયેલી સરીયદ બ્રિજની કામગીરીથી પાટણ તાલુકાના ગ્રામ્ય વિસ્તારોના નાગરિકોને સુરક્ષિત, સુગમ અને વધુ મજબૂત માર્ગ સુવિધાનો લાભ પ્રાપ્ત થશે.
