રાધનપુરની નાલંદા માધ્યમિક વિદ્યાલયનો ધો.12 સામાન્ય પ્રવાહમાં ઝળહળતો પરિણામ 99.25%
134માંથી 133 વિદ્યાર્થી સફળ – વૈભવ સથવારા 99.92 PR સાથે પ્રથમ ક્રમે
કેપિટલ મેસેજ, ન્યુઝ
Capital message
ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ દ્વારા ફેબ્રુઆરી-માર્ચ મહિનામાં લેવાયેલી ધોરણ 12 સામાન્ય પ્રવાહની બોર્ડ પરીક્ષાનું પરિણામ આજે સવારે જાહેર થતા સમગ્ર રાજ્ય સાથે પાટણ જિલ્લામાં પણ આનંદનો માહોલ છવાયો હતો. આ પરિણામોમાં રાધનપુર સ્થિત નાલંદા માધ્યમિક વિદ્યાલયે ઉત્તમ પ્રદર્શન કરી શિક્ષણ ક્ષેત્રે પોતાની આગવી ઓળખ વધુ મજબૂત બનાવી છે.
જાહેર થયેલ પરિણામ મુજબ શાળાનો કુલ પરિણામ દર 99.25 ટકા નોંધાયો છે, જે શાળાની શૈક્ષણિક ગુણવત્તા, સુવ્યવસ્થિત માર્ગદર્શન અને વિદ્યાર્થીઓની કઠોર મહેનતનું પ્રતિબિંબ છે. શાળામાં અભ્યાસ કરતા વિદ્યાર્થીઓએ શ્રેષ્ઠ પ્રદર્શન કરીને માત્ર શાળાનું જ નહીં પરંતુ સમગ્ર રાધનપુર પંથકનું નામ ગૌરવભેર ઉજાગર કર્યું છે.
આ પરીક્ષામાં કુલ 134 વિદ્યાર્થીઓ બેઠા હતા, જેમાંથી 133 વિદ્યાર્થીઓ સફળતા પ્રાપ્ત કરતા શાળાએ લગભગ શતપ્રતિશત પરિણામ નોંધાવ્યું છે. આ સિદ્ધિ એ દર્શાવે છે કે શાળાના શિક્ષકો દ્વારા આપવામાં આવતું માર્ગદર્શન અને નિયમિત શૈક્ષણિક આયોજન કેટલું અસરકારક રહ્યું છે.
શાળાના તેજસ્વી વિદ્યાર્થી વૈભવ સથવારા 99.92 PR મેળવી પ્રથમ ક્રમે રહ્યા છે. તેમના આ ઉત્કૃષ્ટ પરિણામે શાળામાં ગૌરવની લાગણી સાથે પ્રેરણાદાયક વાતાવરણ ઉભું કર્યું છે. અન્ય વિદ્યાર્થીઓએ પણ સારા ગુણ મેળવી શાળાની પ્રતિષ્ઠા વધારી છે.
ગ્રેડ મુજબના પરિણામમાં પણ શાળાએ શ્રેષ્ઠતા હાંસલ કરી છે, જેમાં A1 ગ્રેડમાં 1 વિદ્યાર્થી અને A2 ગ્રેડમાં 5 વિદ્યાર્થીઓ સ્થાન મેળવતા શાળાની ગુણવત્તાસભર શિક્ષણ પદ્ધતિ વધુ સ્પષ્ટ થાય છે.
આ શાનદાર સફળતા પાછળ શાળાના શિક્ષકોની અવિરત મહેનત, સંચાલનની સુદ્રઢ દિશા, અને વિદ્યાર્થીઓની નિષ્ઠાપૂર્વકની તૈયારી મહત્વપૂર્ણ પરિબળો રહ્યા છે. સમયસર લેવામાં આવેલ પરીક્ષાની તૈયારી, માર્ગદર્શન વર્ગો અને સતત મૂલ્યાંકન જેવી પ્રક્રિયાઓએ આ પરિણામમાં મહત્વનો ફાળો આપ્યો છે.
શાળાના સંચાલકો અને શિક્ષકમંડળે વિદ્યાર્થીઓને અભિનંદન પાઠવતા તેમના ઉજ્જવળ ભવિષ્ય માટે શુભેચ્છાઓ વ્યક્ત કરી છે. આ સાથે જ આવનારા વર્ષોમાં પણ વધુ શ્રેષ્ઠ પરિણામ મેળવવાનો સંકલ્પ વ્યક્ત કરવામાં આવ્યો છે.રાધનપુર સહિત સમગ્ર પાટણ જિલ્લામાં નાલંદા વિદ્યાલયના આ ગૌરવશાળી પરિણામે આનંદ અને ગર્વની લાગણી પ્રસરી ગઈ છે.
રિપોર્ટ : અનિલ રામાનુજ, રાધનપુર, પાટણ
