રોટરી ભવનના નિર્માણ માટે હાસ્યની મોજ : ‘પ્રેમમાં પડ્યા ને સાસુ નડ્યા’ નાટકે નગરજનોને હસાવ્યા, સેવા કાર્ય માટે દાનની સરવાણી
કેપિટલ મેસેજ, ન્યુઝ
રાધનપુર શહેરમાં સામાજિક સેવા અને સાંસ્કૃતિક કાર્યક્રમનો સુંદર સંગમ જોવા મળ્યો, જ્યાં રોટરી ક્લબ ઓફ રાધનપુર અને રોટરી ચેરીટેબલ ટ્રસ્ટ દ્વારા રોટરી–આસ્થા–આઈ.એમ.એ. સર્વોદય ભવનના નિર્માણ માટે ભવ્ય હાસ્ય નાટ્ય કાર્યક્રમનું આયોજન કરવામાં આવ્યું હતું. આ કાર્યક્રમ માત્ર મનોરંજન પૂરતો મર્યાદિત ન રહી, પરંતુ એક ઉમદા હેતુ માટે લોકોમાં સેવાભાવ જગાડતો બન્યો હતો.
રોટરી પબ્લિક ઇમેજ કાર્યક્રમ અંતર્ગત વિવેક શાહ પ્રોડક્શન દ્વારા રજૂ કરવામાં આવેલું લોકપ્રિય હાસ્ય નાટક ‘પ્રેમમાં પડ્યા ને સાસુ નડ્યા’ મંચ પર આવતાં જ પ્રેક્ષકોમાં હાસ્યની લહેર ફરી વળી હતી. કલાકારોના જીવંત અભિનય, સમયોચિત સંવાદો અને રસપ્રદ પ્રસ્તુતિએ નગરજનોને પેટ પકડીને હસાવ્યા હતા. સમગ્ર કાર્યક્રમ દરમિયાન હોલમાં હાસ્ય અને તાળીઓના ગડગડાટ વચ્ચે ઉત્સાહપૂર્ણ માહોલ સર્જાયો હતો.
આ પ્રસંગે મુખ્ય દાતા તરીકે રમેશભાઈ ભરવાડે ઉપસ્થિત રહી સેવા કાર્યમાં પોતાનો સહયોગ આપ્યો હતો, જ્યારે મહેમાન વિશેષ તરીકે ડૉ. નવીનભાઈ અને રાયચંદભાઈએ હાજરી આપી કાર્યક્રમને ગૌરવ આપ્યું હતું.
કાર્યક્રમનું આયોજન રોટરીના સ્થાપક ડૉ. મહેશભાઈ મુલાણી, પ્રમુખ ડૉ. પરેશભાઈ દરજી, મંત્રી કાંતિભાઈ નાઈ તેમજ રોટરીના સક્રિય સભ્યોના સંયુક્ત પ્રયાસોથી સફળતાપૂર્વક પૂર્ણ થયું હતું. આયોજનમાં રમેશભાઈ ગોકલાણી, ડૉ. પ્રવિણભાઈ ઓઝા, ડૉ. દિનેશભાઈ ઠક્કર, ડૉ. સી.એમ. ઠક્કર અને મધુબેન ઓઝાએ માર્ગદર્શન આપી મહત્વપૂર્ણ ભૂમિકા ભજવી હતી.
કાર્યક્રમના ઉદઘોષક તરીકે ડૉ. સુરેશ ઓઝાએ પોતાની અનોખી અને આકર્ષક શૈલીમાં સંચાલન કરી પ્રેક્ષકોને અંત સુધી જોડાયેલા રાખ્યા હતા, જે કાર્યક્રમની વિશેષતા બની રહી હતી.
રોટરી ભવનના નિર્માણ જેવા સમાજોપયોગી કાર્ય માટે શહેરના અનેક દાતાશ્રીઓએ ઉદાર હાથે દાન આપીને સેવા ભાવના દર્શાવી હતી. રોટરી પરિવાર દ્વારા તમામ દાતાશ્રીઓનો આભાર વ્યક્ત કરવામાં આવ્યો હતો અને ભવિષ્યમાં પણ આવા સેવા કાર્યો માટે સહયોગ આપવા અપીલ કરવામાં આવી હતી.
આ સમગ્ર કાર્યક્રમને સફળ બનાવવા માટે રોટેરિયન મિત્રોએ ભારે જહેમત ઉઠાવી હતી. શહેરના અગ્રણીઓ, સમાજસેવકો અને મોટી સંખ્યામાં નગરજનોએ ઉપસ્થિત રહી કાર્યક્રમને યાદગાર બનાવ્યો હતો.રાધનપુરમાં યોજાયેલો આ કાર્યક્રમ એક તરફ મનોરંજનથી ભરપૂર રહ્યો, તો બીજી તરફ સમાજ સેવા માટે પ્રેરણા પૂરું પાડતો એક ઉત્તમ ઉદાહરણ બની રહ્યો છે.
રિપોર્ટ: અનિલ રામાનુજ રાધનપુર, પાટણ
