ગુજરાત ATSની મોટી કાર્યવાહી : જૈશ-એ-મોહમ્મદના વધુ 5 શંકાસ્પદ આતંકીઓ ઝડપાયા
કેપિટલ મેસેજ, ન્યુઝ
Capital message
સિદ્ધપુરના ખાડિયાસણ ગામની મદ્રેસા સુધી પહોંચ્યો તપાસનો દોર, બોમ્બ વિસ્ફોટના કાવતરાની તપાસ તેજ
ગુજરાત ATS એ વધુ 5 આતંકી ઝડપ્યા- ખડીયાસણનો આતંકી ટાઈમ બૉમ્બ બનાવી કરતો હતો પ્રેક્ટિસ
આતંકીઓની પૂછપરછમા ખુલાસા – પાકિસ્તાની હેન્ડલરના સીધા સંપર્ક મા હતા
મોટુ આતંકી કાવતરું નિષ્ફળ – ATS ઍ વધૂ 5 શંકાસ્પદો ને ઝડપ્યા
પાટણ : ગુજરાત ATS દ્વારા આતંકવાદ વિરુદ્ધ વધુ એક મહત્વપૂર્ણ કાર્યવાહી હાથ ધરતાં જૈશ-એ-મોહમ્મદ સાથે કથિત રીતે સંકળાયેલા વધુ પાંચ શંકાસ્પદ આતંકીઓની ધરપકડ કરવામાં આવી છે. તપાસનો દોર હવે પાટણ જિલ્લાના સિદ્ધપુર તાલુકાના ખાડિયાસણ ગામ સુધી પહોંચ્યો છે. અગાઉ પણ આ જ મામલે ખાડિયાસણ ગામની એક મદ્રેસા સાથે જોડાયેલા ત્રણ શખ્સોની ધરપકડ કરવામાં આવી હતી.
પ્રાથમિક તપાસમાં સામે આવ્યું છે કે પકડાયેલા પાંચ પૈકી મોહમદ અયુબ કડીવાલ ખાડિયાસણ ગામ સ્થિત ‘જામિયા અબુલ હસન’ મદ્રેસામાં અભ્યાસ કરતો હતો. તપાસ એજન્સીને અગાઉ ઝડપાયેલા આરોપીઓ સાથે તેના સીધા સંપર્કના પુરાવા મળ્યા હોવાનું જાણવા મળ્યું છે.
તપાસ દરમિયાન ATSને એવી પણ માહિતી મળી છે કે આરોપીઓ વિસ્ફોટક બનાવવાનો પ્રયાસ કરી રહ્યા હતા. તપાસ મુજબ ખાડિયાસણ ગામની બહાર આવેલા ખુલ્લા ખેતરોમાં કથિત રીતે અનેક વખત બોમ્બ વિસ્ફોટના પરીક્ષણ કરવાનોz પ્રયાસ કરવામાં આવ્યો હતો, જોકે તે સફળ રહ્યો નહોતો. આ દાવાઓની તપાસ હાલ ATS દ્વારા કરવામાં આવી રહી છે.
આ કેસની તપાસના ભાગરૂપે ATSની ટીમ ખાડિયાસણ સ્થિત મદ્રેસામાં પણ પહોંચી હતી. તપાસ દરમિયાન મદ્રેસાના ટ્રસ્ટીઓ સ્થળ પર હાજર ન હોવાનું અને તેમની પૂછપરછ માટે તપાસ ચાલુ હોવાનું સૂત્રોએ જણાવ્યું છે.
પકડાયેલા મોહમદ અયુબ કડીવાલના પિતાએ મીડિયા સમક્ષ જણાવ્યું કે તેમને તેમના પુત્રની કથિત દેશવિરોધી પ્રવૃત્તિઓ અંગે કોઈ જાણકારી નહોતી. તેમણે કહ્યું કે જો તપાસમાં તેમનો પુત્ર આવા કૃત્યોમાં સંડોવાયેલો સાબિત થશે તો તેઓ તેના કૃત્યને કોઈપણ રીતે સમર્થન આપતા નથી.
ગુજરાત ATS દ્વારા ઝડપાયેલા પાંચેય આરોપીઓને કોર્ટમાં રજૂ કરી રિમાન્ડ મેળવવામાં આવ્યા હોવાનું જાણવા મળ્યું છે. હવે તપાસનો મુખ્ય કેન્દ્રબિંદુ એ છે કે કથિત રીતે વિસ્ફોટક બનાવવા માટેની સામગ્રી ક્યાંથી મેળવવામાં આવતી હતી, તેમાં અન્ય કોણ-કોણ સંકળાયેલા હતા અને સમગ્ર નેટવર્ક કેટલું વિસ્તરેલું હતું. આ તમામ મુદ્દાઓ અંગે ATS દ્વારા સઘન તપાસ ચાલી રહી છે.
રિપોર્ટ. અનિલ રામાનુજ રાધનપુર, પાટણ
