ગાંધીધામમાંથી ચોરાયેલી મોટરસાયકલ સાથે એક આરોપીને રાધનપુર પોલીસે ઝડપી પાડી ગુનાનો ભેદ ઉકેલ્યો
કેપિટલ મેસેજ
Capital message
પાટણ જિલ્લામાં મિલકત સંબંધિત ગુનાઓનો ભેદ ઉકેલવા હાથ ધરવામાં આવેલી ઝુંબેશ અંતર્ગત રાધનપુર પોલીસે નોંધપાત્ર સફળતા મેળવી છે. પૂર્વ કચ્છ જિલ્લાના ગાંધીધામ બી ડિવિઝન પોલીસ સ્ટેશન વિસ્તારમાંથી ચોરાયેલી મોટરસાયકલ સાથે એક આરોપીને ઝડપી પાડી વણશોધાયેલ વાહનચોરીના ગુનાનો ભેદ ઉકેલી કાઢ્યો છે.
પોલીસ મહાનિરીક્ષક પરીક્ષિતા રાઠોડ, પોલીસ અધિક્ષક વી.કે. નાયી તથા નાયબ પોલીસ અધિક્ષક કુણાલસિંહ એલ. પરમારના માર્ગદર્શન અને સૂચના મુજબ જિલ્લામાં મિલકત સંબંધિત ગુનાઓ શોધી કાઢવા માટે ખાસ અભિયાન ચલાવવામાં આવી રહ્યું છે. તે અંતર્ગત પોલીસ ઇન્સ્પેક્ટર આર.બી. વાધિયાના માર્ગદર્શન હેઠળ રાધનપુર પોલીસ સ્ટાફ પેટ્રોલિંગ તથા વણશોધાયેલા ગુનાઓની તપાસમાં વ્યસ્ત હતો.
તે દરમિયાન ખાનગી બાતમી મળી હતી કે આશરે એક વર્ષ અગાઉ ગાંધીધામ બી ડિવિઝન પોલીસ સ્ટેશન વિસ્તારમાંથી ચોરાયેલી હીરો સ્પ્લેન્ડર પ્લસ મોટરસાયકલ (રજિ. નં. GJ-12-DJ-8912) સાથે એક વ્યક્તિ રાધનપુરના મોટા ઠાકોરવાસથી રેલવે સ્ટેશન તરફ જવાના માર્ગ પર આવેલી ગુલશન કોલોની નજીક હાજર છે.
બાતમીના આધારે પોલીસે તાત્કાલિક સ્થળ પર પહોંચી શંકાસ્પદ વ્યક્તિને મોટરસાયકલ સાથે ઝડપી પાડ્યો હતો. પોલીસે યુક્તિ-પ્રયુક્તિથી પૂછપરછ કરતાં આરોપીએ મોટરસાયકલ ગાંધીધામ બી ડિવિઝન પોલીસ સ્ટેશન વિસ્તારમાંથી ચોરી કરી હોવાનું કબૂલ્યું હતું. ત્યારબાદ આરોપીને બી.એન.એસ.એસ. કલમ 35(1)(ઇ) હેઠળ અટકમાં લઈ વધુ કાયદેસરની કાર્યવાહી માટે ગાંધીધામ બી ડિવિઝન પોલીસ સ્ટેશનને સોંપવાની કાર્યવાહી હાથ ધરવામાં આવી છે.
પકડાયેલા આરોપીની ઓળખ તલ્હાભાઈ રમઝાનભાઈ રાઉમા, મૂળ રહે. મેમદાવાદ, તા. રાધનપુર, હાલ રહે. ગુલશન કોલોની, રાધનપુર તરીકે થઈ છે.
પોલીસે આરોપી પાસેથી અંદાજે રૂ. 30,000 કિંમતની હીરો સ્પ્લેન્ડર પ્લસ મોટરસાયકલ (રજિ. નં. GJ-12-DJ-8912) કબજે કરી છે. તપાસ દરમિયાન આ વાહન ગાંધીધામ બી ડિવિઝન પોલીસ સ્ટેશન ખાતે નોંધાયેલા ગુના નં. 11993007261078/2026, બી.એન.એસ. કલમ 303(2) સાથે સંબંધિત હોવાનું બહાર આવ્યું છે.
આ સમગ્ર સફળ કામગીરી પોલીસ ઇન્સ્પેક્ટર આર.બી. વાધિયાના માર્ગદર્શન હેઠળ આસિસ્ટન્ટ હેડ કોન્સ્ટેબલ આશિષભાઈ વાલાભાઈ, આસિસ્ટન્ટ પોલીસ કોન્સ્ટેબલ જયદેવ ધીરજી, આસિસ્ટન્ટ પોલીસ કોન્સ્ટેબલ રાકેશભાઈ વેલાભાઈ, આસિસ્ટન્ટ પોલીસ કોન્સ્ટેબલ અજમલભાઈ સામાભાઈ, આસિસ્ટન્ટ પોલીસ કોન્સ્ટેબલ રાહુલકુમાર અમરતજી તથા આસિસ્ટન્ટ પોલીસ કોન્સ્ટેબલ ચેતનકુમાર માધવલાલે સંયુક્ત રીતે અંજામ આપી હતી. પોલીસની આ કામગીરીથી લાંબા સમયથી વણશોધાયેલ વાહનચોરીના ગુનાનો સફળ ભેદ ઉકેલાયો છે.
રિપોર્ટ. અનિલ રામાનુજ પાટણ
