સમી તાલુકાના માંડવી સીમમાં નીલગાયોના શિકારથી ખળભળાટ – 3 નીલગાયના શિકાર બાદ શિકારીઓ ફરાર
બંદૂકના ફાયરિંગ બાદ સ્થાનિકો દોડી આવ્યા, શિકારીઓ કાર મૂકી ફરાર, વનવિભાગએ તપાસ શરૂ કરી
કેપિટલ મેસેજ, ન્યુઝ
Capital message
પાટણ જિલ્લાના સમી તાલુકાના માંડવી ગામની સીમમાં મધરાતે નીલગાયોના શિકારની ચોંકાવનારી ઘટના સામે આવતા સમગ્ર પંથકમાં ભારે ખળભળાટ મચી ગયો છે. મળતી માહિતી મુજબ મધરાતે અંદાજે બે વાગ્યાના સમયે શિકારીઓએ બંદૂક વડે ત્રણ નીલગાયોને નિશાન બનાવી શિકાર કર્યો હતો. ઘટનાના પગલે વિસ્તારમાં ભારે ચકચાર ફેલાઈ ગઈ હતી.સ્થાનિક ખેડૂતો અને ખેતર આસપાસ રહેતા લોકોને મધરાતે અચાનક બંદૂકના ફાયરિંગનો અવાજ સંભળાતા તેઓ તાત્કાલિક ઘટનાસ્થળ તરફ દોડી આવ્યા હતા. શંકાસ્પદ હલચલ જોતા સ્થાનિકોએ તરત જ 112 ઈમરજન્સી સેવા પર પોલીસને જાણ કરી હતી.
માહિતી મળતા જ પોલીસની ટીમ ઘટનાસ્થળે પહોંચી હતી. જોકે પોલીસની ગાડી આવતા જ શિકારીઓ અંધારાનો લાભ લઈ સ્થળ પરથી ફરાર થઈ ગયા હતા. ઘટનાસ્થળેથી બે બ્લેક કલરની સેન્ટ્રો કાર હોવાની વિગતો સામે આવી છે, જેમાંથી એક કાર શિકારીઓ સ્થળ પર જ મૂકી ભાગી ગયા હોવાનું જાણવા મળ્યું છે.ઘટનાની જાણ થતાં વન વિભાગની ટીમ પણ તાત્કાલિક સ્થળ પર પહોંચી હતી અને સમગ્ર મામલે તપાસ હાથ ધરી હતી. તપાસ દરમિયાન એક નીલગાયનું માસ કટીંગ કરીને ગાડીમાં ભરેલું મળી આવ્યું હતું, જ્યારે અન્ય બે નીલગાયોના મૃતદેહ પણ સ્થળ પરથી મળી આવ્યા હતા. ઘટનાની ગંભીરતાને ધ્યાનમાં રાખી વન વિભાગે મૃત નીલગાયોના પોસ્ટમોર્ટમ અને વધુ કાર્યવાહી માટે 1962ની ટીમને જાણ કરી હતી.
વન વિભાગના અધિકારી ડી.એસ. સિંધવે ઘટનાની પુષ્ટિ કરતાં જણાવ્યું હતું કે, “સવારે વહેલી તકે એક જાગૃત નાગરિક દ્વારા વન વિભાગને જાણ કરવામાં આવી હતી. ત્યારબાદ સામાજિક વનીકરણ વિભાગના સ્ટાફ સાથે તાત્કાલિક સ્થળ પર પહોંચી તપાસ હાથ ધરવામાં આવી હતી. સ્થળ પરથી બે મૃતદેહ અને કંકાલ મળી આવ્યા હતા જેને કબજે લેવામાં આવ્યા છે. ઉપરાંત એક સેન્ટ્રો કાર પણ કબજે લેવામાં આવી છે અને સમગ્ર મામલે ધોરણસર આગળની કાર્યવાહી હાથ ધરવામાં આવી રહી છે.”
નીલગાય જેવા વન્ય પ્રાણીઓના ગેરકાયદે શિકારની ઘટનાએ વન્યજીવ સુરક્ષા સામે ગંભીર સવાલો ઉભા કર્યા છે. વિસ્તારમાં સતત વધી રહેલી શિકારની પ્રવૃત્તિઓને લઈને સ્થાનિકોમાં પણ ચિંતા જોવા મળી રહી છે. હાલ વન વિભાગ અને પોલીસ દ્વારા ફરાર શિકારીઓને શોધવા માટે તપાસનો ધમધમાટ શરૂ કરવામાં આવ્યો છે.
રિપોર્ટ. અનિલ રામાનુજ રાધનપુર, પાટણ
