શેઠ એમ. એન. હાઇસ્કુલ, પાટણમાં રોટરી ક્લબ અને રોટરેક્ટ ક્લબ દ્વારા બોર્ડ પરીક્ષાર્થીઓને શુભેચ્છા પાઠવાઈ
કેપિટલ મેસેજ, ન્યુઝ
રોટરી અને રોટરેક્ટ ક્લબ ઓફ પાટણ દ્વારા 300 જેટલા પરીક્ષાર્થીઓને ગુલાબ, બોલપેન અને ચોકલેટ આપી તેમનો ઉત્સાહ વધાર્યો
બોર્ડ દ્વારા લેવાતી ધોરણ 10ની પરીક્ષાના પ્રથમ દિવસે શેઠ એમ. એન. હાઇસ્કુલમાં વિદ્યાર્થીઓમાં અદમ્ય ઉત્સાહ જોવા મળ્યો
More Read
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા આયોજિત ધોરણ 10ની બોર્ડ પરીક્ષાના પ્રથમ દિવસે શેઠ એમ. એન. હાઇસ્કુલ ખાતે પ્રેરણાદાયક અને સ્નેહસભર વાતાવરણ સર્જાયું. વિદ્યાર્થીઓના જીવનના આ મહત્વપૂર્ણ તબક્કાની શરૂઆત સકારાત્મક ઉર્જા સાથે થાય તેવા શુભ આશયથી રોટરી ક્લબ ઓફ પાટણ અને રોટરેક્ટ ક્લબ ઓફ પાટણ દ્વારા અનોખો શુભેચ્છા કાર્યક્રમ યોજાયો.
આ અવસરે આશરે 300 જેટલા પરીક્ષાર્થીઓને કુમકુમ તિલક કરી શુભસંકેતરૂપે ગુલાબ, બોલપેન અને ચોકલેટ અર્પણ કરવામાં આવ્યા. “પરીક્ષા રૂપ યજ્ઞ” માટે હાર્દિક શુભકામનાઓ પાઠવી વિદ્યાર્થીઓમાં આત્મવિશ્વાસ વધારવાનો અને પરીક્ષા પ્રત્યે સકારાત્મક દૃષ્ટિકોણ વિકસાવવાનો પ્રયત્ન કરવામાં આવ્યો.
આ કાર્યક્રમમાં સમાજના આગેવાનો અને સદસ્યોનો પણ ઉષ્માભર્યો સહયોગ પ્રાપ્ત થયો હતો. સમાજની સક્રિય સહભાગિતાથી વિદ્યાર્થીઓમાં વધુ પ્રોત્સાહન અને આત્મીયતા અનુભવાઈ. શૈક્ષણિક પ્રવૃત્તિઓમાં સમાજનો સહયોગ મળે તે અત્યંત પ્રશંસનીય બાબત છે, કારણ કે આવો સહકાર વિદ્યાર્થીઓના સર્વાંગી વિકાસ માટે મજબૂત પાયો પૂરું પાડે છે.
More Read
આ પ્રસંગે શાળાના આચાર્ય ડૉ. ધનરાજભાઈ ઠક્કર સહિત રોટરી ક્લબ પાટણના પ્રમુખ ડો. રો. પરિમલભાઈ જાની, મંત્રી રો. જય દરજી તથા સભ્યઓ રો. ભગવાનભાઈ પટેલ, રો. ભાવેશભાઈ ત્રિવેદી, રો. જયરામભાઈ પટેલ, રો. અતુલભાઈ પટેલ ઉપસ્થિત રહ્યા હતા. સાથે જ રોટરેક્ટ ક્લબ ઓફ પાટણના મંત્રી અવનિશ પટેલ તથા સભ્યઓ પૃથ પટેલ, ડો. નીલ જોશી, પાર્થિવ પટેલ, ભદ્રેશ પ્રજાપતિ અને હર્ષ મોચી વગેરેએ હાજરી આપી વિદ્યાર્થીઓને શુભેચ્છા પાઠવી હતી.
પરીક્ષા જેવી મહત્વપૂર્ણ ક્ષણમાં મળેલું આ સ્નેહસભર પ્રોત્સાહન વિદ્યાર્થીઓ માટે ઉર્જાસ્રોત બની રહ્યું. તેમના ચહેરા પર દેખાતો આત્મવિશ્વાસ અને ઉત્સાહ આ પહેલની સફળતાનો જીવંત પુરાવો રહ્યો.
આ ઉજવણી માત્ર એક શુભેચ્છા કાર્યક્રમ નહીં પરંતુ સમાજ, શાળા અને સંસ્થાઓ વચ્ચેના સુમેળનું ઉત્તમ ઉદાહરણ બની. આવા પ્રેરણાદાયક પ્રયાસો વિદ્યાર્થીઓને શ્રેષ્ઠ પ્રદર્શન કરવા માટે નવી શક્તિ અને સકારાત્મક દિશા પ્રદાન કરે છે.
