શેઠ એમ. એન. હાઈસ્કૂલમાં ભૂતપૂર્વ વિદ્યાર્થી અને સફળ ઉદ્યોગપતિ બી.કે. પટેલનું થયું વિશિષ્ટ સન્માન
બી. કે. પટેલ દ્વારા માતૃસંસ્થાનું ઋણ અદા કરવાની દિશામાં સ્તુત્ય પગલું :
શાળામાં ₹8.50 લાખના દાનથી ફાયર સેફ્ટી સિસ્ટમ કાર્યરત; દાતાઓના નામની તકતીનું અનાવરણ
કેપિટલ મેસેજ
Capital message
ઉત્તર ગુજરાત યુવક મંડળ સંચાલિત શેઠ એમ. એન. હાઈસ્કૂલ, પાટણ શૈક્ષણિક તેમજ સહઅભ્યાસિક અને ઇતર પ્રવૃત્તિઓમાં સતત અગ્રેસર રહી છે. વિદ્યાર્થીઓની સલામતીને પણ શાળાની સર્વોચ્ચ પ્રાથમિકતા આપતાં શાળામાં ફાયર સેફ્ટી સિસ્ટમની જરૂરિયાત જણાતાં આચાર્ય ડૉ. ધનરાજભાઈ ઠક્કર દ્વારા શાળાના ભૂતપૂર્વ વિદ્યાર્થી, પાટણનાજ પનોતા પુત્ર અને સફળ ઉદ્યોગપતિ બી.કે. પટેલ સમક્ષ આ અંગે રજૂઆત કરી હતી.
More Read
શાળાની જરૂરિયાતને તત્કાળ સ્વીકારી બી.કે. પટેલે હકારાત્મક પ્રતિસાદ આપતાં ડાયનેમિક ફાઉન્ડેશનના બી.કે. પટેલ, રમેશભાઈ પટેલ અને દીક્ષિતભાઈ પટેલ દ્વારા આશરે ₹8.50 લાખ જેટલું માતબર દાન આપવામાં આવ્યું હતું. આ સહયોગથી શેઠ એમ. એન. હાઇસ્કુલમાં ફાયર સેફ્ટી સિસ્ટમ સ્થાપિત કરવામાં આવી છે, જે વિદ્યાર્થીઓ અને સમગ્ર શાળા પરિવારની સલામતીની દૃષ્ટિએ અત્યંત મહત્વપૂર્ણ અને પ્રશંસનીય પહેલ બની છે.
આ નિમિત્તે તા. 12 સપ્ટેમ્બર, 2026ના રોજ શાળામાં યોજાયેલા કાર્યક્રમમાં દાતા બી.કે. પટેલનું વિશિષ્ટ સન્માન કરવામાં આવ્યું હતું. સાથે જ ફાયર સેફ્ટી સિસ્ટમ માટે યોગદાન આપનાર ડાયનેમિક ફાઉન્ડેશન અમદાવાદના
બી.કે. પટેલ, રમેશભાઈ પટેલ અને દીક્ષિતભાઈ પટેલના નામની તકતીનું અનાવરણ કરવામાં આવ્યું હતું.
આ કાર્યક્રમમાં ઉત્તર ગુજરાત યુવક મંડળના પ્રમુખ ડૉ. જે. કે. પટેલ, ઉપપ્રમુખ મહેન્દ્રભાઈ કે. પટેલ, જિલ્લા શિક્ષણાધિકારી કચેરીનાં શિક્ષણ નિરીક્ષક ડૉ. મધુબેન દેસાઈ, મંડળના કારોબારી સભ્ય ભાઈ મનોજભાઈ પટેલ સહિત શાળાનો સમગ્ર સ્ટાફ તથા મોટી સંખ્યામાં વિદ્યાર્થીઓ ઉપસ્થિત રહ્યા હતા.
શાળાના આચાર્ય ડૉ. ધનરાજભાઈ ઠક્કરે સૌનું સ્વાગત કરતાં શાળાની વિવિધ શૈક્ષણિક, સહઅભ્યાસિક અને ઇતર પ્રવૃત્તિઓ તેમજ શાળાની પ્રગતિ અંગે માહિતી આપી હતી. તેમણે બી.કે. પટેલ દ્વારા શાળાના વિકાસ અને વિદ્યાર્થીઓના હિત માટે સતત આપવામાં આવી રહેલા સહયોગ બદલ આભાર વ્યક્ત કર્યો હતો.
More Read
જિલ્લા શિક્ષણાધિકારી કચેરીના શિક્ષણ નિરીક્ષક ડૉ. મધુબેન દેસાઈએ શેઠ એમ. એન. હાઈસ્કૂલની વિવિધ નવીન અને સર્જનાત્મક પ્રવૃત્તિઓની પ્રશંસા કરતાં જણાવ્યું હતું કે, અભ્યાસક્રમ આધારિત શિક્ષણની સાથે વિદ્યાર્થીઓના સર્વાંગી વિકાસ અને સુરક્ષાને પ્રાધાન્ય આપતી શાળા તરીકે શેઠ એમ. એન. હાઈસ્કૂલ પાટણમાં આગવું સ્થાન ધરાવે છે. વિદ્યાર્થીઓની સલામતી માટે ફાયર સેફ્ટી સિસ્ટમની સુવિધા ઉપલબ્ધ કરાવવી એ શાળાની જાગૃતતા અને જવાબદારીનું ઉત્તમ ઉદાહરણ હોવાનું જણાવી તેમણે આચાર્ય ડૉ. ધનરાજભાઈ ઠક્કર તથા તેમની દોરવણી હેઠળ કાર્યરત સમગ્ર ટીમ “એમ.એન.” ને અભિનંદન પાઠવ્યા હતા.
પ્રતિભાવ આપતાં બી. કે. પટેલે જણાવ્યું હતું કે, “શાળામાં ફાયર સેફ્ટી સિસ્ટમની સુવિધા ઉપલબ્ધ કરાવીને મેં શાળા પર કોઈ ઉપકાર કર્યો નથી. પોતાની માતૃસંસ્થા પ્રત્યેના લગાવ અને એક ભૂતપૂર્વ વિદ્યાર્થી તરીકેની નૈતિક જવાબદારી સમજીને આ કાર્ય કર્યું છે. વિદ્યાર્થીઓ અને શાળાના વિકાસ માટે જે કંઈ જરૂરી હોય તેમાં યથાશક્તિ સહયોગ આપવો એ હું મારી નૈતિક ફરજ માનું છું. ભવિષ્યમાં પણ વિદ્યાર્થીઓના શિક્ષણ કે શાળાના વિકાસ માટે કોઈ જરૂરિયાત હોય તો વિના સંકોચે મને જણાવશો.”
ઉપપ્રમુખ મહેન્દ્રભાઈ કે. પટેલે બી. કે. પટેલ ને અભિનંદન આપી આભાર વ્યક્ત કર્યો હતો. શાળા પરિવારને પણ અભિનંદન પાઠવ્યા હતા.
ઉત્તર ગુજરાત યુવક મંડળના પ્રમુખ ડૉ. જે. કે. પટેલે દાતા બી.કે. પટેલના સેવાભાવી અભિગમને બિરદાવતાં જણાવ્યું હતું કે, પોતાની માતૃસંસ્થા પ્રત્યેની કૃતજ્ઞતા વ્યક્ત કરી વિદ્યાર્થીઓના હિતમાં સતત યોગદાન આપવું એ અન્ય ભૂતપૂર્વ વિદ્યાર્થીઓ માટે પણ પ્રેરણારૂપ છે
અત્રે ઉલ્લેખનીય છે કે, બી.કે. પટેલે પોતાની માતૃસંસ્થાનું ઋણ અદા કરવાની ભાવનાથી આ અગાઉ પણ શેઠ એમ. એન. હાઇસ્કુલના શૈક્ષણિક વિકાસમાં નોંધપાત્ર યોગદાન આપ્યું છે. તેમના તરફથી આશરે ₹25 લાખના ખર્ચે ત્રણ વિજ્ઞાન પ્રવાહની લેબોરેટરીઓનું નવીનીકરણ, સુવિધાસભર બનાવટ અને જરૂરી સાધનોની વ્યવસ્થા કરવામાં આવી છે.
આ ઉપરાંત છેલ્લા ત્રણ વર્ષથી શાળાના ધોરણ 10 અને 12ના વિદ્યાર્થીઓને પરીક્ષાલક્ષી તૈયારીમાં મદદરૂપ થાય તે માટે દર વર્ષે આશરે ₹1 લાખના ખર્ચે અપેક્ષિત પ્રશ્નપત્રો અને એસાઈમેન્ટ આધારિત શૈક્ષણિક સામગ્રી પૂરી પાડવામાં આવી રહી છે. આ સહયોગથી વિદ્યાર્થીઓની પરીક્ષા તૈયારીને વેગ મળ્યો છે. ચાલુ વર્ષમાં ધોરણ 10નું પરિણામ આશરે 77 ટકા રહ્યું છે, જે છેલ્લા 15 વર્ષનું શાળાનું શ્રેષ્ઠ પરિણામ છે. વિદ્યાર્થીઓની મહેનત, શિક્ષકોના માર્ગદર્શન અને બી.કે. પટેલ દ્વારા આપવામાં આવેલ શૈક્ષણિક સામગ્રીના ઉપયોગથી પરિણામમાં સુધારો જોવા મળ્યો છે. આ ઉપરાંત
આધુનિક યુગમાં વિદ્યાર્થીઓ ટેકનોલોજી અને આર્ટિફિશિયલ ઇન્ટેલિજન્સના ક્ષેત્રમાં પાછળ ન રહી જાય તે માટે આચાર્ય ડૉ. ધનરાજભાઈ ઠક્કરે શાળામાં વિદ્યાર્થીઓ માટે નિઃશુલ્ક AI શિક્ષણ શરૂ કરવાની રજૂઆત બી. કે. પટેલનેકરી હતી.
શાળાના 70 ટકાથી વધુ વિદ્યાર્થીઓ ગ્રામ્ય અને સામાન્ય તથા આર્થિક રીતે નબળા પરિવારોમાંથી આવતા હોવાથી બી.કે. પટેલે આ પહેલને પણ તત્કાળ સહયોગ આપ્યો હતો. પરિણામે બી.કે. પટેલના આર્થિક સહયોગથી સમગ્ર વર્ષ દરમિયાન શેઠ એમ. એન. હાઇસ્કુલના વિદ્યાર્થીઓ માટે નિઃશુલ્ક AI વર્ગો યોજાયા હતા. વિદ્યાર્થીઓની પ્રગતિ નિહાળ્યા બાદ બી.કે. પટેલે આ વર્ગો ચાલુ વર્ષે પણ ચાલુ રાખવાની જાહેરાત કરી હતી.
શાળામાં શરૂ થયેલી આ AI શિક્ષણ પહેલની નોંધ લઈ ગુજરાતના માનનીય મુખ્યમંત્રી ભૂપેન્દ્રભાઈ પટેલ દ્વારા આચાર્ય ડૉ. ધનરાજભાઈ ઠક્કર તથા શાળા પરિવારને વિશેષ પ્રશસ્તિ પત્ર આપી સન્માનિત કરવામાં આવ્યા હતા.
આ પહેલને સાકાર કરવામાં પણ બી.કે. પટેલના વિશેષ સહયોગ બદલ આચાર્યએ તેમનો ખાસ આભાર વ્યક્ત કર્યો હતો.
આમ, વિદ્યાર્થીઓની સલામતી માટે ફાયર સેફ્ટી સિસ્ટમ હોય, વિજ્ઞાન લેબોરેટરીઓનું આધુનિકીકરણ હોય, વિદ્યાર્થીઓને પરીક્ષાલક્ષી શૈક્ષણિક સામગ્રી પૂરી પાડવાની વાત હોય કે પછી આધુનિક AI શિક્ષણની તક ઊભી કરવાની— બી.કે. પટેલ દ્વારા પોતાની માતૃસંસ્થાનું ઋણ અદા કરવાની ભાવના સાથે સતત કરવામાં આવતું યોગદાન ખરેખર પ્રશંસનીય છે. તેમનો આ સેવાભાવી અભિગમ શાળાના અન્ય ભૂતપૂર્વ વિદ્યાર્થીઓને પણ પોતાની માતૃસંસ્થા અને વિદ્યાર્થીઓના ભવિષ્ય માટે આગળ આવી યોગદાન આપવા માટે પ્રેરણા પૂરી પાડે છે. અંતે, શાળાના સુપરવાઈઝર વર્ષાબેન પટેલ દ્વારા આભારવિધિ કરવામાં આવી હતી.
