શેઠ એમ.એન. હાઈસ્કૂલ, પાટણ ખાતે 80મો સ્વાતંત્ર્ય દિવસ ધામધૂમથી ઉજવાયો
“સ્વદેશી અપનાવો, વિદેશ તરફની દોટ બંધ કરો – ત્યારે જ ભારત વિશ્વગુરુ બનશે” : આચાર્ય ડૉ. ધનરાજ ઠક્કર
“યુવાનો નશો છોડે, ભારતીય સંસ્કૃતિ અપનાવે અને રાષ્ટ્રનિર્માણમાં જોડાય” : આચાર્યશ્રી ડૉ. ધનરાજ ઠક્કર
દેશપ્રેમના સ્વરમાં ગુંજી ઉઠ્યો શેઠ એમ.એન. હાઈસ્કૂલનો પ્રાંગણ
More Read
કેપિટલ મેસેજ
Capital message
પાટણ: ઉત્તર ગુજરાત યુવક મંડળ સંચાલિત, શિક્ષણ અને શિક્ષણેતર પ્રવૃત્તિઓમાં અગ્રેસર એવી શેઠ એમ.એન. હાઈસ્કૂલ, પાટણ ખાતે દેશભક્તિના ઉમંગ, ઉત્સાહ અને રાષ્ટ્રપ્રેમની લાગણી વચ્ચે 80મો સ્વાતંત્ર્ય દિવસ ભવ્ય રીતે ઉજવવામાં આવ્યો હતો. વહેલી સવારથી જ શાળા પ્રાંગણ તિરંગાના રંગોથી શોભી ઊઠ્યું હતું. વિદ્યાર્થીઓ, શિક્ષકો અને વાલીઓની ઉપસ્થિતિથી સમગ્ર વાતાવરણ રાષ્ટ્રપ્રેમથી છલકાઈ રહ્યું હતું.
કાર્યક્રમના પ્રારંભે શાળાના NCC કેડેટ્સ દ્વારા શિસ્તબદ્ધ પરેડ સાથે આચાર્ય ડૉ. ધનરાજભાઈ ઠક્કરને ધ્વજવંદન સ્થળ સુધી લઈ જવામાં આવ્યા હતા. પરંપરાગત ભારતીય વસ્ત્રોમાં સાફો ધારણ કરીને આચાર્યશ્રીએ રાષ્ટ્રધ્વજ ફરકાવ્યો હતો. ત્યારબાદ ઉપસ્થિત તમામ વિદ્યાર્થીઓ અને શિક્ષકગણ દ્વારા રાષ્ટ્રધ્વજને સન્માનપૂર્વક સલામી આપવામાં આવી હતી. પૂર્ણ “વંદે માતરમ”ના ગાન બાદ રાષ્ટ્રગીત “જન ગણ મન”ના ગૌરવપૂર્ણ સ્વરો સાથે સમગ્ર શાળા પ્રાંગણ દેશભક્તિના ભાવથી ગુંજી ઉઠ્યું હતું. “ભારત માતા કી જય”ના નાદે વિદ્યાર્થીઓના ઉત્સાહમાં અનેકગણો વધારો કર્યો હતો.
આ પ્રસંગે શાળાના આચાર્ય ડૉ. ધનરાજભાઈ ઠક્કરે શિક્ષકગણ, વાલી મિત્રો અને વિદ્યાર્થીઓને સ્વાતંત્ર્ય દિવસની હાર્દિક શુભકામનાઓ પાઠવીને રાષ્ટ્રનિર્માણનો પ્રેરણાદાયી સંદેશ આપ્યો હતો.
આચાર્યશ્રીએ પોતાના સંબોધનમાં જણાવ્યું હતું કે, “આઝાદી માત્ર અંગ્રેજોના શાસનમાંથી મુક્તિનું નામ નથી; સાચી આઝાદી ત્યારે કહેવાય જ્યારે દેશનો યુવાન સ્વાવલંબી બને, વ્યસનમુક્ત બને, પોતાની સંસ્કૃતિનું ગૌરવ જાળવે અને દેશના વિકાસમાં પોતાનું યોગદાન આપે.”
તેમણે સ્વદેશી વસ્તુઓના ઉપયોગ પર ભાર મૂકતાં જણાવ્યું હતું કે, “જો આપણે સ્વદેશી ઉત્પાદનોને પ્રોત્સાહન આપીશું અને વિદેશી વસ્તુઓ તરફની અંધદોટ ઘટાડશું, તો દેશના નાના-મોટા ઉદ્યોગોને વેગ મળશે, રોજગારીની તકો વધશે, બેરોજગારી ઘટશે અને દેશનું આર્થિક સશક્તિકરણ થશે. આત્મનિર્ભર અને સશક્ત ભારતને વિશ્વગુરુ બનતા કોઈ રોકી શકશે નહીં.”
યુવાનોને સંબોધતાં આચાર્યએ વધુમાં જણાવ્યું હતું કે, આજના યુવાનો દેશની સૌથી મોટી શક્તિ છે. જો યુવાનો નશા અને ખરાબ આદતોને ત્યજીને શિક્ષણ, કૌશલ્ય, સંશોધન, રમતગમત અને રાષ્ટ્રસેવામાં પોતાની ઊર્જાનો ઉપયોગ કરશે તો ભારતની પ્રગતિને કોઈ રોકી શકશે નહીં. તેમણે પશ્ચિમી સંસ્કૃતિનું અંધાનુકરણ કરવાને બદલે ભારતીય સંસ્કૃતિ, સંસ્કાર, પરંપરા, પરિવારભાવ અને સહઅસ્તિત્વના મૂલ્યોને જીવનમાં ઉતારવા વિદ્યાર્થીઓને આહ્વાન કર્યું હતું.
શાળાના NCC ઓફિસર વિરમજી ઠાકોર તથા ડૉ. ગાયત્રીબેન રાવલના માર્ગદર્શન હેઠળ NCC કેડેટ્સ દ્વારા શિસ્તબદ્ધ અને આકર્ષક પરેડ રજૂ કરવામાં આવી હતી. કેડેટ્સની પરેડે ઉપસ્થિત સૌમાં દેશભક્તિ અને રાષ્ટ્રસેવાની ભાવનાને વધુ પ્રબળ બનાવી હતી.સ્વાતંત્ર્ય દિવસની ઉજવણીને વધુ રંગીન અને આકર્ષક બનાવવા શાળાની વિદ્યાર્થિનીઓ તથા શિક્ષિકા બહેનો દ્વારા વિવિધ રંગોની સુંદર રંગોળીઓ તૈયાર કરવામાં આવી હતી. તિરંગા અને દેશભક્તિના વિવિધ સંદેશાઓ સાથેની રંગોળીઓએ સમગ્ર શાળા પ્રાંગણને રાષ્ટ્રપ્રેમના રંગે રંગી દીધું હતું. સમગ્ર કાર્યક્રમનું સંચાલન શાળાના વ્યાયામ શિક્ષક શ્રી નરેશભાઈ પટેલ દ્વારા કરવામાં આવ્યું હતું.
આ પ્રસંગે શાળાની ભગિની સંસ્થા એન.જી. પટેલ પ્રાથમિક શાળાના આચાર્યશ્રી વસંતભાઈ પટેલ તથા સમગ્ર સ્ટાફની પણ ઉપસ્થિતિ રહી હતી. તેમની ઉપસ્થિતિએ બંને સંસ્થાઓ વચ્ચેના સ્નેહ અને સંકલનને વધુ મજબૂત બનાવ્યું હતું.
કાર્યક્રમના અંતે ઉપસ્થિત સૌને મોં મીઠું કરાવવામાં આવ્યું હતું. વિદ્યાર્થીઓ, શિક્ષકો અને વાલીઓએ સાથે મળીને ભારત માતાને નમન કરી દેશની એકતા, અખંડિતતા અને પ્રગતિ માટેની પોતાની પ્રતિબદ્ધતા વ્યક્ત કરી હતી.
