રાધનપુર કોલેજમાં રક્તદાન કેમ્પમાં ૫૬ બોટલ રક્ત એકત્રિત, ૧૩૬ થેલેસેમિયા ટેસ્ટ કરાયા
સ્વ.હિંમતલાલ મુલાણીની ૨૧મી પુણ્યતિથિ નિમિત્તે સેવાકીય આયોજન; રક્તદાતાઓને ભેટ અને પ્રમાણપત્ર આપી સન્માનિત કરાયા
કેપિટલ મેસેજ
More Read
Capital message
રાધનપુરના હિંમત વિદ્યાનગર સ્થિત શ્રી ત્રિકમજીભાઈ ચતવાણી આર્ટ્સ એન્ડ જે.વી. ગોકળ ટ્રસ્ટ કોમર્સ કોલેજ ખાતે સ્વ. હિંમતલાલ મુલાણીની ૨૧મી પુણ્યતિથિ નિમિત્તે તા. ૫ ઓક્ટોબર, ૨૦૨૬ના રોજ રક્તદાન કેમ્પ અને થેલેસેમિયા ટેસ્ટનું આયોજન કરવામાં આવ્યું હતું. કોલેજના આચાર્ય ડૉ. સી.એમ. ઠક્કરના માર્ગદર્શન હેઠળ યોજાયેલા આ સેવાકીય કાર્યક્રમમાં ૫૬ બોટલ રક્ત એકત્રિત કરવામાં આવ્યું હતું, જ્યારે ૧૩૬ થેલેસેમિયા ટેસ્ટ કરવામાં આવ્યા હતા.
કાર્યક્રમના ઉદ્ઘાટક તરીકે ટ્રસ્ટના વરિષ્ઠ ઉપપ્રમુખ વસંતભાઈ ઝોટા ઉપસ્થિત રહ્યા હતા અને આ સેવાકીય પહેલને શુભેચ્છાઓ પાઠવી હતી. રક્તદાન અને થેલેસેમિયા તપાસ જેવા માનવસેવાના કાર્યો દ્વારા સમાજમાં આરોગ્ય પ્રત્યે જાગૃતિ લાવવા તેમજ જરૂરિયાતમંદ દર્દીઓને મદદરૂપ થવાના હેતુથી આ આયોજન કરવામાં આવ્યું હતું.
More Read
આ પ્રસંગે ગચ્છાધિપતિ આચાર્યશ્રી વિજય અભયદેવસૂરીશ્વરજી મહારાજ, ટ્રસ્ટના પ્રમુખ ડૉ. મહેશભાઈ મુલાણી, સેક્રેટરી ડૉ. નવીનભાઈ ઠક્કર, મેનેજિંગ ટ્રસ્ટી રાયચંદભાઈ ઠક્કર, હસમુખભાઈ શાહ, ધારાસભ્ય લવિંગજી ઠાકોર, ભાવનાબેન જોશી સહિત આમંત્રિત મહેમાનો ઉપસ્થિત રહ્યા હતા. ઉપસ્થિત મહાનુભાવોએ સેવાકીય પ્રવૃત્તિની સરાહના કરી હતી અને રક્તદાતાઓને પ્રોત્સાહિત કર્યા હતા.
કેમ્પ દરમિયાન રક્તદાન કરનાર તમામ રક્તદાતાઓને કોલેજ તરફથી આકર્ષક ભેટ અને પ્રમાણપત્ર આપીને સન્માનિત કરવામાં આવ્યા હતા. કાર્યક્રમને સફળ બનાવવા માટે ડૉ. ટી.ડી. વ્યાસ, ડૉ. એસ.એન. ઓઝા, ડૉ. બી.એ. રાઠોડ તથા પ્રા. નિકુંજભાઈ પ્રજાપતિએ સમગ્ર જવાબદારી નિભાવી હતી.
આમ, સ્વ. હિંમતલાલ મુલાણીની પુણ્યતિથિ નિમિત્તે યોજાયેલ આ સેવાકીય આયોજનમાં રક્તદાન અને થેલેસેમિયા તપાસ દ્વારા માનવસેવા તથા આરોગ્ય જાગૃતિનો સંદેશ આપવામાં આવ્યો હતો. કોલેજ પરિવારની આ પહેલને ઉપસ્થિત મહેમાનો અને સેવાભાવી લોકોએ આવકારી હતી.
રિપોર્ટ. અનિલ રામાનુજ પાટણ
