PMના આગમન પહેલાં ડભોઈમાં સ્વચ્છતાના નામે લીંપાપોતી!
ડભોઈ માં PMના આગમન પહેલાં તંત્રનો લીંપાપોતી ખેલ શિનોર ચોકડીથી નાંદોદી ભાગોળ સુધી ગંદકી છુપાવવા કરોડોના ખર્ચે લાગ્યા સ્વચ્છતાના બોર્ડ
કેપિટલ મેસેજ
More Read
Capital message
ડભોઈ એક તરફ ઐતિહાસિક દર્ભાવતી નગરીના સર્વાંગી વિકાસના મોટા-મોટા દાવા કરવામાં આવી રહ્યા છે, તો બીજી તરફ વાસ્તવિકતામાં શહેર ગંદકીના ઢગલાઓ નીચે દબાયેલું નજરે પડે છે. આગામી ૩૧ ઓક્ટોબરના રોજ દેશના વડાપ્રધાન નરેન્દ્ર મોદી સ્ટેચ્યુ ઓફ યુનિટી (એકતા નગર) ખાતે આવી રહ્યા છે. ત્યારે ડભોઈથી પસાર થતા આ મુખ્ય માર્ગ પરની અસહ્ય ગંદકી છુપાવવા માટે સ્થાનિક તંત્ર દ્વારા કરોડો રૂપિયાના આંધણ કરીને સ્વચ્છતાના મોટા-મોટા બોર્ડ લગાવવાની કામગીરી શરૂ કરવામાં આવી છે. ગંદકીનો કાયમી નિકાલ કરવાને બદલે માત્ર તેને બોર્ડ પાછળ સંતાડવાનો આ પ્રયાસ સ્થાનિકોમાં ભારે ચર્ચા અને આક્રોશનો વિષય બન્યો છે.
મુખ્યમંત્રીની ટકોર બાદ પણ તંત્ર કુંભકર્ણ નિંદ્રામાં થોડા સમય અગાઉ જ્યારે રાજ્યના મુખ્યમંત્રી આ જ માર્ગ પરથી પસાર થયા હતા, ત્યારે રસ્તા પર ખદબદતી ગંદકી જોઈને તેમણે જાહેરમાં અધિકારીઓનો ઉધડો લીધો હતો અને સત્વરે સફાઈ માટે કડક ટકોર કરી હતી. તેમ છતાં, તંત્રના બહેરા કાને કોઈ અસર થઈ નહોતી. હવે જ્યારે ખુદ દેશના વડાપ્રધાન આ રૂટ પરથી પસાર થવાના છે, ત્યારે અધિકારીઓ પોતાની નિષ્ફળતા અને બેદરકારી ઢાંકવા માટે ઊંધા માથે થયા છે.
More Read
ગંદકી હટાવવાને બદલે માત્ર પડદા લગાવ્યા
ડભોઈ શિનોર ચોકડીથી લઈને નાંદોદી ભાગોળ સુધી રોડની બંને બાજુએ વર્ષોથી કચરાના ઢગ જામ્યા છે. આ ગંદકી દૂર કરવા જેસીબી કે સફાઈ કર્મચારીઓ લગાવવાના બદલે, તંત્ર દ્વારા ‘સ્વચ્છતા અભિયાન’ અને ‘સ્વચ્છતા હી સેવા’ના સંદેશા આપતા મોટા આકર્ષક બોર્ડ અને પેઇન્ટિંગ્સ ઊભા કરી દેવામાં આવ્યા છે. લોકો હવે સવાલ પૂછી રહ્યા છે કે શું માત્ર આગળ બોર્ડ મારી દેવાથી પાછળ રહેલા કચરા અને દુર્ગંધથી મુક્તિ મળશે ખરી માત્ર વીવીઆઈપી મુલાકાત પૂરતી જ કેમ તંત્રને સફાઈ યાદ આવે છે જનતાના ટેક્સના લાખો-કરોડો રૂપિયા પાણીમાં
૩૧ તારીખે વડાપ્રધાનનો કાર્યક્રમ પૂર્ણ થઈ જશે અને તેમનો કાફલો પસાર થઈ જશે તે પછી આ લાખો રૂપિયાના ખર્ચે લાગેલા બોર્ડ ધૂળ ખાશે અને પરિસ્થિતિ જૈસે થે થઈ જશે. તંત્ર દ્વારા માત્ર દેખાડો કરવા માટે સરકારી તિજોરીમાંથી પ્રજાના ટેક્સના નાણાંનો જે વેડફાટ કરવામાં આવી રહ્યો છે તેના પર ગંભીર સવાલો ઊભા થયા છે નગરીજનોમાં ભારે રોષ જોવા મળી રહ્યો છે. સ્થાનિક લોકોની એક જ માંગ છે કે કાગળ પર અને બોર્ડ પર ‘સ્વચ્છતા’ બતાવવાના બદલે જમીની હકીકત બદલવામાં આવે અને આ ગંદકીનો કોઈ ચોક્કસ તથા કાયમી નિકાલ કરવામાં આવે. હવે જોવાનું એ રહે છે કે ઉચ્ચ અધિકારીઓ આ વેડફાટ અટકાવી ખરેખર સફાઈ કરાવશે કે પછી બોર્ડ પાછળ ગંદકી સડતી રહેશે.
રિપોર્ટ :- ફઝલ રઝાક ખત્રી, ડભોઈ
