ધારપુર મેડિકલ કોલેજમાં MRI સેન્ટરનું ઈ-લોકાર્પણ, દર્દીઓને મળશે આધુનિક નિદાન સુવિધા
ખાનગી કેન્દ્રોમાં MRI તપાસ પાછળ થતો રૂ. ૩,૦૦૦થી રૂ. ૧૦,૦૦૦ સુધીનો ખર્ચ ઘટશે; ધારપુરમાં ૧.૫ ટેસ્લાનું વાઇડ-બોર MRI મશીન કાર્યરત
કેપિટલ મેસેજ
More Read
Capital message
પાટણ જિલ્લાના ધારપુર સ્થિત જી.એમ.ઈ.આર.એસ. મેડિકલ કોલેજ અને હોસ્પિટલ ખાતે આધુનિક આરોગ્ય સુવિધામાં વધારો થયો છે. રાજ્યના આરોગ્ય મંત્રી પ્રફુલ પાનસેરીયાની વર્ચ્યુઅલ ઉપસ્થિતિમાં ધારપુર અને મહેસાણા જિલ્લાના વડનગર ખાતે MRI સેન્ટરનું ઈ-લોકાર્પણ કરવામાં આવ્યું હતું. આ સુવિધા શરૂ થતાં હવે પાટણ સહિત આસપાસના વિસ્તારના દર્દીઓને MRI તપાસ માટે અમદાવાદ સહિતનાં મોટાં શહેરોમાં જવાની જરૂરિયાત ઘટશે અને સ્થાનિક સ્તરે આધુનિક નિદાન સુવિધા ઉપલબ્ધ બનશે.
રાજ્યમાં આરોગ્ય સેવાઓને વધુ સુદૃઢ બનાવવા માટે સરકાર દ્વારા વિવિધ મેડિકલ કોલેજો અને હોસ્પિટલોમાં અદ્યતન તબીબી સુવિધાઓ વિકસાવવામાં આવી રહી છે. આ અંતર્ગત રાજ્યની ૧૪ મેડિકલ કોલેજો અને હોસ્પિટલોમાં કુલ રૂ. ૧૭૮.૫૪ કરોડના ખર્ચે MRI સુવિધા વિકસાવવાના પ્રોજેક્ટ હેઠળ ધારપુર અને વડનગરમાં આ સુવિધાનો પ્રારંભ કરવામાં આવ્યો છે.
More Read
ધારપુર મેડિકલ કોલેજ ખાતે કાર્યરત કરવામાં આવેલું ૧.૫ ટેસ્લા ક્ષમતાનું વાઇડ-બોર MRI મશીન દર્દીઓ માટે વધુ અનુકૂળ રહેશે. સામાન્ય MRI મશીનની સરખામણીએ તેમાં વધુ જગ્યા હોવાથી તપાસ દરમિયાન દર્દીઓને થતી અસ્વસ્થતા ઘટાડવામાં મદદ મળશે. મગજ, બ્રેઇન સ્ટ્રોક, કરોડરજ્જુ, હાડકાં અને કમર સંબંધિત વિવિધ તકલીફોના સચોટ નિદાનમાં આ મશીન ઉપયોગી બનશે.
ખાનગી કેન્દ્રોમાં MRI તપાસ માટે અંદાજે રૂ. ૩,૦૦૦થી રૂ. ૧૦,૦૦૦ સુધીનો ખર્ચ થતો હોય છે. સરકારી હોસ્પિટલમાં આ સુવિધા ઉપલબ્ધ થતાં દર્દીઓના સમય અને નાણાંની બચત થવાની સાથે આર્થિક બોજ ઘટાડવામાં પણ મદદ મળશે. પ્રધાનમંત્રી જન આરોગ્ય યોજના (PM-JAY) હેઠળ પાત્રતા અને પ્રવર્તમાન નિયમો મુજબ લાભાર્થીઓને પણ યોજનાનો લાભ મળી શકશે. MRI તપાસના પરિણામોના આધારે તબીબોને રોગનું સચોટ નિદાન કરવામાં મદદ મળશે, જેથી દર્દીઓને સમયસર યોગ્ય સારવાર આપી શકાય.
આ કાર્યક્રમમાં જિલ્લા પંચાયત પ્રમુખ ભાવિકભાઈ પટેલ, મુખ્ય જિલ્લા આરોગ્ય અધિકારી વિષ્ણુભાઈ પટેલ, સંગઠનના હોદ્દેદાર રમેશભાઈ સિંધવ તેમજ ધારપુર મેડિકલ કોલેજ અને હોસ્પિટલના અધિકારીઓ, કર્મચારીઓ અને નાગરિકો ઉપસ્થિત રહ્યા હતા.
ધારપુર ખાતે MRI સેન્ટરની શરૂઆતથી પાટણ જિલ્લા સહિત ઉત્તર ગુજરાતના દર્દીઓ માટે આધુનિક નિદાન સુવિધા વધુ સુલભ બનશે. સ્થાનિક સ્તરે આ સુવિધા ઉપલબ્ધ થવાથી આરોગ્ય સેવાઓની ગુણવત્તા સુધારવાની સાથે દર્દીઓને મોટા શહેરો સુધી લાંબી મુસાફરી કરવાની મુશ્કેલીમાંથી પણ રાહત મળવાની આશા છે.
રિપોર્ટ. અનિલ રામાનુજ, પાટણ
