ડભોઇના મોટા હબીપુરા માર્ગ પરથી ૧૦ ફૂટ લાંબા મહાકાય અજગરનું સફળ રેસ્ક્યુ; સ્થાનિકોએ લીધો રાહતનો શ્વાસ
કેપિટલ મેસેજ
Capital message
ડભોઇ પંથકમાં ફરી એકવાર વન્યજીવ દેખાવાની ઘટના સામે આવી છે. ડભોઇથી મોટા હબીપુરા તરફ જવાના મુખ્ય માર્ગ પર આવેલા રેલવે ગરનાળા નજીકથી એક મહાકાય અજગર મળી આવતાં સમગ્ર વિસ્તારમાં ભારે ચકચાર મચી જવા પામી હતી. જોકે, સ્થાનિક જીવદયા પ્રેમી સંસ્થાની ટીમે સમયસૂચકતા દાખવી અજગરનું સુરક્ષિત રેસ્ક્યુ કરતાં સ્થાનિક રહીશો અને વાહનચાલકોએ હાશકારો અનુભવ્યો છે.
ડભોઇ તાલુકાના મોટા હબીપુરા જવાના રસ્તે રેલવે ગરનાળા પાસે પસાર થતા રાહદારીઓની નજર અચાનક એક વિશાળકાય અજગર પર પડી હતી. માર્ગની બિલકુલ નજીક અંદાજે ૧૦ ફૂટ જેટલો લાંબો અજગર હોવાની જાણ થતાં જ આસપાસના ગ્રામજનો અને વાહનચાલકોમાં ભારે ફફડાટ વ્યાપી ગયો હતો, જેના કારણે થોડા સમય માટે ટ્રાફિક પણ પ્રભાવિત થયો હતો.સ્થાનિકો દ્વારા આ અંગે તાત્કાલિક વન્યજીવ સંરક્ષણ માટે કાર્યરત ‘નેચર સેવિંગ ફાઉન્ડેશન’ની ટીમને જાણ કરવામાં આવી હતી. માહિતી મળતાં જ રેસ્ક્યુ ટીમ જરૂરી સાધનો સાથે ગણતરીની મિનિટોમાં ઘટનાસ્થળે પહોંચી ગઈ હતી.
રેસ્ક્યુ ટીમના સભ્યોએ ભારે સાવચેતી અને જહેમત બાદ કોઈ પણ પ્રકારની ઈજા પહોંચાડ્યા વગર આ મહાકાય અજગરને સુરક્ષિત રીતે ઝડપી પાડ્યો હતો. સફળ રેસ્ક્યુ ઓપરેશન બાદ વન વિભાગના માર્ગદર્શન હેઠળ અજગરને માનવ વસ્તીથી દૂર સુરક્ષિત કુદરતી આવાસ એટલે કે ઊંડા જંગલ વિસ્તારમાં મુક્ત કરવામાં આવ્યો હતો. રેસ્ક્યુ ટીમની ત્વરિત કામગીરીને સ્થાનિકોએ બિરદાવી હતી.
રિપોર્ટ :- ફઝલ રઝાક ખત્રી, ડભોઈ
