ડભોઇમાં મીડિયાના અહેવાલની ધારદાર અસર: પરબડીથી મહુડી ભાગોળ સુધીની બે મહિના જૂની ગટર સમસ્યા 60 કલાકમાં ઉકેલાઈ સ્થાનિક રહીશોમાં રાહતની લાગણી; તંત્ર દોડતું થતાં નાગરિકોએ મીડિયાનો આભાર માન્યો
કેપિટલ મેસેજ
Capital message
ડભોઇ શહેરના પરબડી વિસ્તારથી લઈને ઐતિહાસિક મહુડી ભાગોળ સુધી છેલ્લા બે મહિનાથી ગટરના ઉભરાતા ગંદા પાણીની ગંભીર સમસ્યા વકરી હતી. રસ્તાઓ પર સતત વહેતા ગંદા અને દુર્ગંધયુક્ત પાણીને કારણે સ્થાનિક રહીશો, વેપારીઓ તેમજ રાહદારીઓનું જીવવું મુશ્કેલ બની ગયું હતું. આ મામલે વારંવારની રજૂઆતો છતાં સ્થાનિક તંત્રના પેટનું પાણી હલતું નહોતું.આ લોકપ્રશ્નને વાચા આપતા મીડિયા દ્વારા સમગ્ર પરિસ્થિતિનો સચોટ અહેવાલ પ્રસિદ્ધ કરવામાં આવ્યો હતો.
અહેવાલ પ્રસારિત થતાં જ કુંભકર્ણ નિંદ્રામાં પોઢેલું નગરપાલિકા તંત્ર તાબડતોબ હરકતમાં આવ્યું હતું મીડિયાની અસરકારકતા બે મહિનાથી જે સમસ્યાનો કોઈ ઉકેલ નહોતો આવતો, તે અહેવાલ પ્રસિદ્ધ થયાના માત્ર ૬૦ કલાકની અંદર જ ઉકેલાઈ ગઈ યુદ્ધના ધોરણે કામગીરી: આજરોજ વહેલી સવારથી જ નગરપાલિકાની ટીમ જેસીબી, સક્શન મશીન અને સફાઈ કામદારો સાથે સ્થળ પર પહોંચી હતી અને ગટર લાઇનનું સમારકામ તથા બ્લોકેજ દૂર કરવાની કામગીરી પૂર્ણ કરી હતી.
રોગચાળાનો ભય ટળ્યો: લાંબા સમયથી ભરાયેલા ગંદા પાણીના નિકાલથી વિસ્તારમાં મચ્છરોનો ઉપદ્રવ અને રોગચાળો ફેલાવાનો જે ભય હતો તે હવે દૂર થયો છે લાંબા સમયથી નર્કાગાર જેવી સ્થિતિમાં જીવવા મજબૂર બનેલા પરબડી અને મહુડી ભાગોળ વિસ્તારના સ્થાનિક લોકો તેમજ વેપારીઓએ આ સમસ્યામાંથી મુક્તિ મળતાં રાહતનો શ્વાસ લીધો છે લોકોનો અવાજ બનીને તંત્રને ઢંઢોળવા બદલ સમગ્ર વિસ્તારના રહીશોએ મીડિયાનો હૃદયપૂર્વક આભાર વ્યક્ત કર્યો હતો.
રિપોર્ટ :- ફઝલ રઝાક ખત્રી, ડભોઈ
