સાંતલપુરના હથિયાર કેસમાં નાસતા ફરતા આરોપીને એસ.ઓ.જી.એ દબોચ્યો
પાટણ એસ.ઓ.જી.ની ત્વરિત કાર્યવાહી : ઉંઝા ત્રણ રસ્તા પાસેથી ઝડપાયો આરોપી, અગાઉ પણ આર્મ્સ એક્ટના ગુનામાં સંડોવણી
કેપિટલ મેસેજ, ન્યુઝ
Capital message
પાટણ જિલ્લામાં નાસતા ફરતા આરોપીઓ વિરુદ્ધ પોલીસ દ્વારા ચલાવવામાં આવી રહેલા સઘન અભિયાન હેઠળ એસ.ઓ.જી. શાખા પાટણે વધુ એક સફળ કામગીરી હાથ ધરી છે. સાંતલપુર પોલીસ સ્ટેશનમાં નોંધાયેલા હથિયારના ગુનામાં ફરાર ચાલતા આરોપીને એસ.ઓ.જી.ની ટીમે ઝડપી પાડી કાયદેસરની કાર્યવાહી હાથ ધરી છે.
માહિતી મુજબ સરહદી રેન્જ કચ્છ-ભુજના પોલીસ મહાનિરીક્ષક ચિરાગ કોરડીયા તથા પાટણ જિલ્લા પોલીસ અધિક્ષક વી.કે.નાયીના માર્ગદર્શન હેઠળ જિલ્લાભરમાં નાસતા ફરતા આરોપીઓને ઝડપી પાડવા વિશેષ અભિયાન શરૂ કરવામાં આવ્યું છે. તે અંતર્ગત એસ.ઓ.જી. શાખાના પોલીસ ઇન્સ્પેક્ટર જે.જી.સોલંકીના માર્ગદર્શન હેઠળ ટીમ પેટ્રોલિંગ અને ગુનેગારોની શોધખોળમાં હતી.
તે દરમિયાન એસ.ઓ.જી.ને ખાનગી અને વિશ્વસનીય બાતમી મળી હતી કે સાંતલપુર પોલીસ સ્ટેશનમાં નોંધાયેલા ગુનામાં ફરાર આરોપી પાટણ શહેરના ઉંઝા ત્રણ રસ્તા વિસ્તારમાં હાજર છે. બાતમીના આધારે પોલીસે તાત્કાલિક સ્થળ પર પહોંચી તપાસ હાથ ધરી હતી. તપાસ દરમિયાન આરોપી મળી આવતા પોલીસે બી.એન.એસ.એસ. કલમ ૩૫(૧)(જે) મુજબ અટકાયત કરી આગળની કાર્યવાહી માટે સાંતલપુર પોલીસ સ્ટેશનને સોંપ્યો હતો.
ઝડપાયેલ આરોપીની ઓળખ સુમાર મોડજી સિંધી, રહે. રાણીસર તા. સાંતલપુર જી. પાટણ તરીકે થઈ છે. આરોપી સામે સાંતલપુર પોલીસ સ્ટેશનમાં આર્મ્સ એક્ટ કલમ ૨૫(૧-બી)એ તથા જી.પી. એક્ટ કલમ ૧૩૫ હેઠળ ગુનો નોંધાયેલ હતો અને તે લાંબા સમયથી ફરાર હતો.
પોલીસ તપાસમાં સામે આવ્યું છે કે આરોપીનો અગાઉ પણ ગુનાહિત ઇતિહાસ રહ્યો છે. વર્ષ ૨૦૧૭માં વારાહી પોલીસ સ્ટેશનમાં આર્મ્સ એક્ટ હેઠળ ગુનો નોંધાયો હતો, જ્યારે વર્ષ ૨૦૨૪માં પણ સાંતલપુર પોલીસ સ્ટેશનમાં આર્મ્સ એક્ટ હેઠળનો ગુનો નોંધાયો હોવાનું બહાર આવ્યું છે. આરોપી સામે વારંવાર હથિયાર સંબંધિત ગુનાઓ નોંધાતા પોલીસ વધુ પૂછપરછ ચલાવી રહી છે.
આ સમગ્ર કામગીરીમાં એસ.ઓ.જી. પાટણના પોલીસ ઇન્સ્પેક્ટર જે.જી.સોલંકી, પી.એસ.આઈ. એ.પી.ઠાકોર, અ.હેડ કોન્સ્ટેબલ પ્રવિણદાન લક્ષ્મણદાન, અ.પો.કો. દિનેશકુમાર રત્નાભાઈ તથા અ.પો.કો. જગદીશકુમાર નવીનભાઈએ મહત્વપૂર્ણ ભૂમિકા ભજવી હતી.પાટણ એસ.ઓ.જી.ની આ કામગીરીને જિલ્લામાં કાયદો અને વ્યવસ્થા જાળવવા દિશામાં મહત્વપૂર્ણ સફળતા માનવામાં આવી રહી છે.
રિપોર્ટ. અનિલ રામાનુજ રાધનપુર, પાટણ
