સમીમાં ફરજ પર જતાં GRD જવાન પર જીવલેણ હુમલો, છરીના ઘા ઝીંક્યાં,ત્રણ સામે ફરિયાદ
મામલતદાર કચેરીએ ડ્યૂટી માટે નીકળેલા GRD જવાનને રોકી હુમલો, એટ્રોસિટી એક્ટ સહિત ગુનો નોંધાયો.
કેપિટલ મેસેજ, ન્યુઝ
સમી પોલીસ સ્ટેશનમાં GRD જવાન તરીકે ફરજ બજાવતા એક યુવાન પર ગત તા. 1/04/2026 ની મોડી રાત્રે ફરજ પર જતાં સમયે છરી વડે હુમલો થતાં સમી વિસ્તારમાં ચકચાર મચી ગઈ છે. ફરજ માટે મામલતદાર કચેરી ખાતે જઈ રહેલા GRD જવાનને રસ્તામાં બુમ મારી ઉભો રાખ્યા બાદ ત્રણ ઈસમોએ હુમલો કર્યો હોવાનું સામે આવ્યું છે. હુમલામાં GRD જવાનને બગલના ભાગે ઈજા પહોંચતાં તેમને તાત્કાલિક સારવાર માટે ખસેડવામાં આવ્યા હતા.
મળતી માહિતી મુજબ સમી પોલીસ સ્ટેશનમાં GRD જવાન તરીકે ફરજ બજાવતા હરેશકુમાર બાબુભાઈ પરમાર રાત્રિના સમયે ફરજના ભાગરૂપે તેમને સોંપાયેલા પોઈન્ટ મામલતદાર કચેરી ખાતે જવા નીકળ્યા હતા. આ દરમિયાન તેઓ બસ સ્ટેશનથી આગળ વેપારી વાસના નાકા પાસે પહોંચ્યા ત્યારે કોઈ વ્યક્તિએ બુમ મારી તેમને ઉભા રહેવા કહ્યું હતું. બાઈક ઉભું રાખતાં જ ત્રણ ઈસમો તેમની નજીક આવ્યા હતા. જેમાં એક નામજોગ આરોપીએ પોતાના ફેટામાંથી છરી કાઢી તેમની ઉપર હુમલો કર્યો હતો.
હુમલાખોરે GRD જવાનના બગલના ભાગે છરીનો ઘા ઝીંકતાં તેઓ લોહીલુહાણ હાલતમાં નીચે ઢળી પડ્યા હતા. ઘટનાના પગલે અન્ય GRD જવાનોની મદદથી ઈજાગ્રસ્ત હરેશકુમાર પરમારને તાત્કાલિક સમી સામુહિક આરોગ્ય કેન્દ્ર ખાતે સારવાર માટે ખસેડવામાં આવ્યા હતા. ત્યાં ફરજ પરના તબીબે ઈજાગ્રસ્તને ત્રણ ટાંકા લઈને પ્રાથમિક સારવાર આપી રજા આપી હતી.
More Read
જોકે બાદમાં ઘરે પહોંચ્યા પછી ફરીથી દુખાવો વધતાં તેમને વધુ સારવાર માટે ધારપુર હોસ્પિટલ ખાતે ખસેડવામાં આવ્યા હતા. ઘટનાને લઈને ઈજાગ્રસ્ત GRD જવાને સમી પોલીસ મથકે એક નામજોગ આરોપી સૈયદ અસ્લમ ઈદ્રીશભાઈ તેમજ અન્ય બે અજાણ્યા ઈસમો વિરુદ્ધ સત્તાવાર ફરિયાદ નોંધાવી છે.
ફરિયાદના આધારે સમી પોલીસે ગુનાની ગંભીરતા ધ્યાનમાં લઈને એટ્રોસિટી એક્ટ સહિતની વિવિધ કલમો હેઠળ ગુનો નોંધી વધુ તપાસ હાથ ધરી છે. પ્રાથમિક દ્રષ્ટિએ ફરજ પર જતાં જવાનને નિશાન બનાવી હુમલો કરાયો હોવાને કારણે સમગ્ર મામલો વધુ ગંભીર બન્યો છે. કાયદો-વ્યવસ્થા જાળવતા કર્મચારી પર જ આ પ્રકારનો હુમલો થતાં પોલીસ તંત્ર પણ સજાગ બન્યું છે અને આરોપીઓને ઝડપી પાડવા ચક્રો ગતિમાન કર્યા છે.
આ બનાવને પગલે સમી વિસ્તારમાં ચકચાર ફેલાઈ છે અને ફરજ બજાવતા જવાનોની સુરક્ષા અંગે પણ પ્રશ્નો ઊભા થયા છે. તો બીજી તરફ મળતી વિગતો મુજબ Sc st સેલ ના DYSPની નિગરાની માં સમગ્ર મામલા ની તપાસ ચાલી રહી છે. પોલીસ હાલ આરોપીઓની શોધખોળ કરી રહી છે.
રિપોર્ટ. અનિલ રામાનુજ રાધનપુર, પાટણ
