AI સમિટ અંગે રાહુલ ગાંધીના નિવેદન પર પાટણમાં ભાજપ યુવા મોરચાનો ઉગ્ર વિરોધ, પૂતળા દહનનો પ્રયાસ
કેપિટલ મેસેજ, ન્યુઝ
દિલ્હીમાં યોજાયેલી ‘ઇન્ડિયા AI ઇમ્પેક્ટ સમિટ 2026’ દરમિયાન કોંગ્રેસ નેતા રાહુલ ગાંધી દ્વારા ભારત અંગે કરવામાં આવેલી કથિત ટિપ્પણીને લઈ પાટણ શહેરમાં ભારતીય જનતા પાર્ટી યુવા મોરચા દ્વારા ઉગ્ર વિરોધ પ્રદર્શન કરવામાં આવ્યું હતું.
More Read
શહેરના ઐતિહાસિક બગવાડા દરવાજા ખાતે મોટી સંખ્યામાં યુવા કાર્યકરો તેમજ મહિલા પાંખના સભ્યો એકત્રિત થયા હતા. કાર્યકરોએ રાહુલ ગાંધી વિરુદ્ધ સૂત્રોચ્ચાર કરી વિરોધ નોંધાવ્યો હતો અને પૂતળા દહન કરવાનો પ્રયાસ કર્યો હતો. ઘટનાસ્થળે હાજર પોલીસએ તાત્કાલિક કાર્યવાહી કરી સળગતું પૂતળું કબજે કરીને પરિસ્થિતિ કાબૂમાં લીધી હતી.
જિલ્લા યુવા મોરચા પ્રમુખ મિલન પટેલે જણાવ્યું હતું કે દેશ આર્ટિફિશિયલ ઇન્ટેલિજન્સ જેવી આધુનિક ટેકનોલોજીમાં વિશ્વ સ્તરે આગળ વધી રહ્યો છે, ત્યારે આવા નિવેદનો દેશની છબીને નુકસાન પહોંચાડે છે. તેમણે આ પ્રકારની ટિપ્પણીને કરોડો ભારતીયોના અપમાન સમાન ગણાવી વિરોધ નોંધાવ્યો હતો.
More Read
ઉલ્લેખનીય છે કે દિલ્હી ખાતે યોજાયેલી આ સમિટમાં અનેક દેશોએ ભાગ લીધો હતો. ભારત ટેકનોલોજી સ્વીકારમાં સકારાત્મક પગલાં લઈ રહ્યું હોવાનું ભાજપે જણાવ્યું, જ્યારે કોંગ્રેસ તરફથી કરાયેલા નિવેદનોને ભાજપે રાષ્ટ્રહિત વિરોધી ગણાવ્યા હતા.પ્રદર્શન દરમિયાન પોલીસ અને કાર્યકરો વચ્ચે ક્ષણિક તણાવ પણ સર્જાયો હતો, પરંતુ અંતે સ્થિતિ શાંતિપૂર્ણ રીતે નિયંત્રણમાં આવી હતી.
રિપોર્ટ: અનિલ રામાનુજ રાધનપુર, પાટણ
