રાધનપુરમાં ટ્રાફિક સમસ્યાના નિવારણ માટે પોલીસનું મેગા ટ્રાફિક ડ્રાઇવ-
PI આર.બી. વાઘીયાના આગમન બાદ શહેરમાં કડક ટ્રાફિક અમલવારી, વેપારીઓ અને રાહદારીઓમાં રાહતની લાગણી
નડતરરૂપ વાહનો ડિટેઈન કરતા ટ્રાફિક વ્યવસ્થામાં નોંધપાત્ર સુધારો…
કેપિટલ મેસેજ, ન્યુઝ
Capital message
પાટણ જિલ્લાના રાધનપુર શહેરમાં છેલ્લા ઘણા સમયથી વિકરાળ બનેલી ટ્રાફિક સમસ્યાને લઈ લોકો ભારે પરેશાનીનો સામનો કરી રહ્યા હતા. મુખ્ય બજાર, હાઈવે અને વ્યસ્ત માર્ગો પર રોજબરોજ સર્જાતી વાહનોની લાંબી કતારો, આડેધડ પાર્કિંગ અને અવ્યવસ્થિત ટ્રાફિકને કારણે વેપારીઓ, રાહદારીઓ તેમજ વાહનચાલકો ત્રાહિમામ પોકારી ઉઠ્યા હતા. ખાસ કરીને હાલ ચાલી રહેલી લગ્ન સિઝનને કારણે શહેરમાં વાહનોની અવરજવર વધતા સમસ્યા વધુ ગંભીર બની હતી.
More Read
આ દરમિયાન રાધનપુરમાં નવા PI આર.બી. વાઘીયાએ ચાર્જ સંભાળતા જ ટ્રાફિક સમસ્યાને પ્રાથમિકતા આપીને કડક કાર્યવાહી હાથ ધરી છે. PI વાઘીયા ખુદ 43 ડિગ્રી ધગધગતા તાપમાન વચ્ચે પોલીસ સ્ટાફ સાથે રોડ પર ઉતરી મેગા ટ્રાફિક ડ્રાઇવ ચલાવતા જોવા મળ્યા હતા. પોલીસ દ્વારા શહેરના મુખ્ય બજાર સહિત હાઈવે વિસ્તારના અનેક પોઈન્ટ પર ચેકિંગ હાથ ધરાયું હતું.
હેપ્પી મોલથી પટણી ગેટ સુધી પોલીસનો કડક બંદોબસ્ત:નડતરરૂપ વાહનો ડિટેઈન કરતા ટ્રાફિક વ્યવસ્થામાં નોંધપાત્ર સુધારો- પોલીસે હેપ્પી મોલ સામે ગંજ બજાર રોડ, બસ સ્ટેન્ડ વિસ્તાર, વિશ્રામ ગૃહ રોડ તેમજ પટણી ગેટ નજીક બેંક ઓફ બરોડા પાસે ખાસ ડ્રાઇવ યોજી હતી. આ દરમિયાન રોડ વચ્ચે આડેધડ પાર્ક કરાયેલા, ટ્રાફિકમાં અવરોધરૂપ બનતા તેમજ કાળા કાચવાળા વાહનો સામે કાર્યવાહી કરવામાં આવી હતી. અનેક વાહનોને ડિટેઈન કરી નિયમભંગ કરનારાઓને કડક ચેતવણી આપવામાં આવી હતી.
પોલીસની આ સતત અને અસરકારક કામગીરીને કારણે શહેરના મુખ્ય માર્ગો પર ટ્રાફિક હળવો બનતા લોકોમાં રાહતની લાગણી ફેલાઈ હતી. વર્ષો બાદ બજારમાં ટ્રાફિક વ્યવસ્થિત જોવા મળતા વેપારીઓએ પણ પોલીસની કામગીરીને બિરદાવી હતી. સ્થાનિક વેપારીઓએ જણાવ્યું હતું કે, “ખરા બપોરે 43 ડિગ્રી તાપમાં પોલીસ રોડ પર ઉભી રહી કામગીરી કરી રહી છે, તે ખરેખર પ્રશંસનીય છે. હવે બજારમાં વાહન વ્યવહાર સરળ બન્યો છે.”
રાધનપુર પોલીસ દ્વારા શરૂ કરાયેલી આ મેગા ટ્રાફિક ડ્રાઇવથી ટ્રાફિકની સમસ્યામાં નોંધપાત્ર ઘટાડો જોવા મળી રહ્યો છે. PI આર.બી. વાઘીયાના માર્ગદર્શન હેઠળ પોલીસ ટીમ સતત એક્શન મોડમાં રહેતા શહેરમાં કાયદો અને ટ્રાફિક વ્યવસ્થા વધુ મજબૂત બનશે તેવી લોકોમાં આશા વ્યક્ત કરવામાં આવી રહી છે.
રિપોર્ટ : અનિલ રામાનુજ, રાધનપુર, પાટણ
