પાટણ જિલ્લામાં પ્રોહિબિશનના કાયદાના અમલ માટે.
પાટણ:પોલીસની મેગા ડ્રાઇવ: 260 સ્થળોએ દરોડા: રૂ.16.68 લાખથી વધુનો દારૂનો જથ્થો ઝડપાયો
54 પોલીસ ટીમોની કામગીરીમાં દેશી-વિદેશી દારૂના 110 ગુના નોંધાયા, 21 આરોપીઓ ઝડપાયા
કેપિટલ મેસેજ
Capital message
26, October, 2026
પાટણ: પાટણ જિલ્લામાં પ્રોહિબિશનની ગેરકાયદેસર પ્રવૃત્તિઓને નેસ્તનાબૂદ કરવાના હેતુથી પાટણ જિલ્લા પોલીસ દ્વારા વિશેષ ડ્રાઇવનું આયોજન કરવામાં આવ્યું હતું. આ ડ્રાઇવ દરમિયાન જિલ્લામાં કુલ 260 સ્થળોએ દરોડા પાડવામાં આવ્યા હતા, જેમાં દેશી અને વિદેશી દારૂનો કુલ રૂ. 16,68,885ની કિંમતનો મુદ્દામાલ કબજે કરવામાં આવ્યો હતો. આ કામગીરી દરમિયાન દારૂને લગતા કુલ 110 ગુના નોંધવામાં આવ્યા હતા અને 21 આરોપીઓને ઝડપી પાડવામાં આવ્યા હતા.
પ્રાપ્ત વિગતો અનુસાર, પોલીસ મહાનિરીક્ષક પરિક્ષિતા રાઠોડ, બનાસકાંઠા રેન્જ, પાલનપુર તથા પાટણના પોલીસ અધિક્ષક વી.કે. નાયીની સૂચના અને માર્ગદર્શન હેઠળ પાટણ જિલ્લામાં પ્રોહિબિશનની બદી દૂર કરવા માટે તા. 25 ઓક્ટોબર, 2026ના રોજ સવારે 6થી બપોરે 12 વાગ્યા સુધી વિશેષ ડ્રાઇવ હાથ ધરવામાં આવી હતી.
આ કામગીરી માટે એલ.સી.બી., એસ.ઓ.જી. તથા જિલ્લાના વિવિધ સ્થાનિક પોલીસ સ્ટેશનોની કુલ 54 ટીમો બનાવવામાં આવી હતી. આ ટીમોએ પાટણ જિલ્લાના તમામ પોલીસ સ્ટેશન વિસ્તારોમાં સઘન કાર્યવાહી હાથ ધરી કુલ 260 સ્થળોએ દરોડા પાડ્યા હતા.
ડ્રાઇવ દરમિયાન દેશી અને વિદેશી દારૂના જથ્થા સાથે કુલ રૂ. 16,68,885નો મુદ્દામાલ કબજે કરવામાં આવ્યો હતો. આ ઉપરાંત, દારૂને લગતા કુલ 110 ગુના દાખલ કરી 21 આરોપીઓને પકડી પાડવામાં આવ્યા હતા.
એલ.સી.બી. પાટણના ઇન્ચાર્જ પોલીસ ઇન્સ્પેક્ટર જયદીપસિંહ જી. સોલંકીના માર્ગદર્શન હેઠળ હાથ ધરાયેલી આ વિશેષ કામગીરીથી જિલ્લામાં ગેરકાયદેસર દારૂના વેચાણ અને હેરાફેરી સામે પોલીસ તંત્રએ કડક કાર્યવાહી કરી હોવાનો સંદેશ આપ્યો છે.
Rajesh Jadav, patan
