ડભોઇ તાલુકાના કડોદરા ગામના ૫૫ વર્ષીય આધેડ ગતરોજથી લાપતા: દેવ-ઢાઢર નદીના બ્રિજ નીચેથી કપડાં મળતાં ડૂબ્યા હોવાની આશંકાએ શોધખોળ તેજ
કેપિટલ મેસેજ
Capital message
ડભોઇ તાલુકાના કડોદરા ગામે રહેતા એક ૫૫ વર્ષીય આધેડ ગતરોજથી રહસ્યમય સંજોગોમાં ગુમ થતાં સમગ્ર પંથકમાં ચકચાર મચી જવા પામી છે. કડોદરા-ગોજાલી બ્રિજ નીચેથી આધેડના કપડાં મળી આવતાં તેઓ નદીમાં ડૂબી ગયા હોવાની પ્રબળ આશંકા સાથે સ્થાનિક પોલીસ અને ફાયર વિભાગની ટીમે મોટા પાયે શોધખોળ શરૂ કરી છે
More Read
ડભોઇ તાલુકાના કડોદરા ગામના બારીયા ફળિયામાં રહેતા ૫૫ વર્ષીય મકબુલભાઈ મહંમદભાઈ ગરાસીયા ગતરોજ અચાનક પોતાના ઘરેથી ગુમ થઈ ગયા હતા. પરિવારજનો દ્વારા તેમની શોધખોળ હાથ ધરવામાં આવી હતી, પરંતુ તેમનો કોઈ અત્તોપત્તો મળ્યો નહોતો.દરમિયાન, કડોદરા-ગોજાલી બ્રિજ નીચેથી પસાર થતી દેવ-ઢાઢર નદીના કિનારેથી મકબુલભાઈના કપડાં મળી આવ્યા હતા. કપડાં મળતાં જ પરિજનો અને ગ્રામજનોમાં ફફડાટ વ્યાપી ગયો હતો અને તેઓ નદીના પાણીમાં ડૂબી ગયા હોવાની આશંકા વ્યક્ત કરવામાં આવી હતી.
ઘટનાની જાણ તાત્કાલિક સ્થાનિક પોલીસ તેમજ ડભોઇ ફાયર બ્રિગેડને કરવામાં આવતાં બંને ટીમો તાબડતોબ ઘટનાસ્થળે દોડી આવી હતી. ફાયર વિભાગના જવાનો દ્વારા બોટ અને ખાસ સાધનોની મદદથી દેવ-ઢાઢર નદીના ઊંડા પાણીમાં આધેડની શોધખોળ માટે રેસ્ક્યુ ઓપરેશન શરૂ કરવામાં આવ્યું છે. બીજી તરફ, આધેડે કોઈ અગમ્ય કારણોસર નદીમાં ઝંપલાવ્યું છે કે પછી નહાવા જતાં ડૂબી ગયા છે તે દિશામાં પોલીસે તપાસનો દોર લંબાવ્યો છે. ઘટનાને પગલે નદી કિનારે ગ્રામજનોના ટોળેટોળાં એકઠા થઈ ગયાં હતાં.
More Read
રિપોર્ટ :- ફઝલ રઝાક ખત્રી, ડભોઈ
