દિવાળીના તહેવારો દરમિયાન ફટાકડાના સંગ્રહ અને વેચાણ માટે હંગામી પરવાના મેળવવા ૨૫ ઓક્ટોબર સુધી અરજી કરવી
કેપિટલ મેસેજ
Capital message
આગામી દિવાળીના તહેવારોને ધ્યાનમાં રાખીને રાધનપુર અને સાંતલપુર તાલુકામાં ફટાકડાના સંગ્રહ તથા વેચાણ માટે હંગામી પરવાના મેળવવા ઇચ્છુક અરજદારોએ ધી એક્સપ્લોઝિવ રૂલ્સ-૨૦૦૮ની જોગવાઈઓ મુજબ નિયત નમૂનામાં જરૂરી આધાર-પુરાવા સાથે તા. ૨૫/૧૦/૨૦૨૬ સુધીમાં સંબંધિત કચેરીમાં અરજી કરવાની રહેશે, તેમ પ્રાંત કચેરી દ્વારા જણાવાયું છે.
More Read
હંગામી પરવાના માટે અરજદારોએ નિયત ફોર્મ A.E.5માં રૂ.૩નો કોર્ટ ફી સ્ટેમ્પ લગાવી અરજી કરવાની રહેશે. સાથે ધી એક્સપ્લોઝિવ રૂલ્સ-૨૦૦૮ના નિયમ-૧૦૦ મુજબ શેડ્યૂલ-VI હેઠળ સ્ક્રુટિની ફી પેટે રૂ.૩૦૦ તથા લાયસન્સ ફી પેટે રૂ.૬૦૦, એમ કુલ રૂ.૯૦૦ની રકમ “૦૦૭૦ અધર એડીએમ” સદરે બેંક/તિજોરીમાં ચલણથી જમા કરાવી અસલ ચલણ રજૂ કરવાનું રહેશે.
અરજદારે સૂચિત ધંધાના સ્થળની ૧૫ મીટરની ત્રિજ્યામાં આવેલી અન્ય દુકાનોના ધંધાના પ્રકાર, શાળા, કોલેજ, હોસ્પિટલ, જ્વલનશીલ પદાર્થોના ગોડાઉન, પેટ્રોલ પંપ તથા રક્ષિત ઇમારતોની વિગતો દર્શાવતો નકશો રજૂ કરવાનો રહેશે. શહેરી વિસ્તાર માટે નગરપાલિકા દ્વારા અને ગ્રામ્ય વિસ્તાર માટે સંબંધિત ગ્રામ પંચાયતના તલાટી કમ મંત્રી દ્વારા પ્રમાણિત નકશો રજૂ કરવો જરૂરી છે.
આ ઉપરાંત, સ્થળની માલિકીનો પુરાવો અથવા ભાડાની દુકાન હોય તો નોટરાઇઝ્ડ કે એક્ઝિક્યુટિવ મેજિસ્ટ્રેટ સમક્ષ કરાયેલ ભાડા કરાર તથા દુકાનના માલિકનો રૂ.૫૦ના સ્ટેમ્પ પેપર પર સંમતિ જવાબ રજૂ કરવાનો રહેશે. ગ્રામ પંચાયતના તલાટી કમ મંત્રી અથવા નગરપાલિકાના ચીફ ઓફિસરની સહીવાળું ના-વાંધા પ્રમાણપત્ર (NOC), ફાયર સેફ્ટીની વ્યવસ્થા અંગે ફાયર ઓફિસરનું પ્રમાણપત્ર તથા ધંધાના સ્થળના ૬ x ૪ સાઇઝના ત્રણ ફોટોગ્રાફ પણ અરજી સાથે જોડવાના રહેશે.
More Read
અરજદાર કોઈ ગુનામાં સંડોવાયેલા નથી તેમજ તેમને કોઈ સજા કે દંડ થયેલ નથી તે અંગે સંબંધિત કાર્યક્ષેત્રના ક્ષેત્રીય પોલીસ અધિકારીનું પ્રમાણપત્ર તથા રહેઠાણ અને જન્મતારીખના પુરાવા પણ રજૂ કરવાના રહેશે.
ફટાકડાના સંગ્રહ અને વેચાણ માટે ગ્રામ પંચાયત અથવા નગરપાલિકા દ્વારા સ્થળ ફાળવવામાં આવ્યું હોય તો અરજીમાં ફાળવવામાં આવેલા સ્થળની સ્પષ્ટ વિગતો દર્શાવવાની રહેશે. આવા કિસ્સામાં ગ્રામ પંચાયત અથવા નગરપાલિકા દ્વારા નક્કી કરવામાં આવેલી સુરક્ષિત જગ્યાએ ફાળવાયેલા પ્લોટ માટે પરવાનો મેળવવાની કાર્યવાહી કરવામાં આવશે. જો સ્થાનિક સ્વરાજ્યની સંસ્થા દ્વારા સ્થળ ફાળવવામાં ન આવ્યું હોય તો અરજદારે ધી એક્સપ્લોઝિવ રૂલ્સ-૨૦૦૮ તથા સરકારશ્રીની વખતોવખતની જોગવાઈઓને અનુરૂપ પોતે નિર્ધારિત કરેલા સ્થળ માટે સંબંધિત ગ્રામ પંચાયતના તલાટી કમ મંત્રી અથવા નગરપાલિકાના ચીફ ઓફિસરનું ના-વાંધા પ્રમાણપત્ર અને ફાયર સેફ્ટી અંગેનું ફાયર ઓફિસરનું પ્રમાણપત્ર મેળવી રજૂ કરવાનું રહેશે.
હંગામી પરવાના માટેનાં અરજીપત્રકો રાધનપુર અને સાંતલપુર મામલતદાર કચેરીની એટીવીટી શાખામાંથી કચેરી સમય દરમિયાન ચાલુ દિવસોમાં મેળવી શકાશે. નિયત સમયમર્યાદામાં તમામ જરૂરી દસ્તાવેજો સાથે પૂર્ણ અરજી રજૂ કરવાની રહેશે. અધૂરી વિગતોવાળી અરજીઓ સ્વીકારવામાં આવશે નહીં તેમજ ભરવામાં આવેલી સ્ક્રુટિની ફી અને લાયસન્સ ફી પરત આપવામાં આવશે નહીં.
હંગામી પરવાનો મેળવ્યા બાદ પરવાનામાં દર્શાવેલી તમામ શરતોનું સંપૂર્ણ પાલન કરવું ફરજિયાત રહેશે. આથી રાધનપુર અને સાંતલપુર તાલુકાના સંબંધિત અરજદારોએ નિયત સમયમર્યાદામાં જરૂરી દસ્તાવેજો સાથે અરજી કરવા પ્રાંત કચેરી દ્વારા જણાવાયું છે.
રિપોર્ટ રાજેશ જાદવ, પાટણ
