શેઠ એમ. એન. હાઈસ્કૂલ પાટણના વિદ્યાર્થીઓનો રાજ્યકક્ષાના ગણિત મહોત્સવમાં દબદબો…
શેઠ એમ. એન. હાઇસ્કુલના પટેલ વેદે મોડલ પ્રેઝન્ટેશનમાં બીજો નંબર અને જોષી કહેરારામે રોલ પ્લેમાં ત્રીજો નંબર મેળવી શાળાને
અપાવ્યું ગૌરવ…
શેઠ એમ. એન. હાઇસ્કુલની ગણિતની પ્રતિભાઓએ રાજ્ય કક્ષાએ પાટણનું નામ રોશન કર્યું.
કેપિટલ મેસેજ
Capital message
More Read
ઓલ ઇન્ડિયા રામાનુજન મેથ્સ ક્લબ તથા શ્રી મહાવીર જૈન ચારિત્ર કલ્યાણ રત્નાશ્રમ, સોનગઢ, જિ. ભાવનગરના સંયુક્ત ઉપક્રમે તા. ૧૯ અને ૨૦ સપ્ટેમ્બર, ૨૦૨૬ દરમિયાન રાજ્ય કક્ષાનો ૨૦મો રાજ્ય ગણિત મહોત્સવ યોજાયો હતો. ગણિત ક્ષેત્રે વિદ્યાર્થીઓની સર્જનાત્મકતા, તર્કશક્તિ અને પ્રતિભાને પ્રોત્સાહન આપતા આ પ્રતિષ્ઠિત મહોત્સવમાં શેઠ એમ. એન. હાઈસ્કૂલ, પાટણના બે વિદ્યાર્થીઓએ રાજ્ય કક્ષાએ ઉત્કૃષ્ટ સિદ્ધિ મેળવી શાળાનું ગૌરવ વધાર્યું છે.
રાજ્ય કક્ષાની વિવિધ સ્પર્ધાઓમાં શાળાના વિદ્યાર્થીઓએ ઉત્સાહપૂર્વક ભાગ લીધો હતો. જેમાં પટેલ વેદ નીતિનકુમારે મોડલ પ્રેઝન્ટેશન સ્પર્ધામાં દ્વિતીય સ્થાન પ્રાપ્ત કર્યું હતું. જ્યારે જોષી કહેરારામ હીરાલાલે રોલ પ્લે સ્પર્ધામાં તૃતીય સ્થાન મેળવી શાળાનું નામ રાજ્ય કક્ષાએ ગુંજતું કર્યું હતું.
બંને વિદ્યાર્થીઓની આ સિદ્ધિ તેમની સતત મહેનત, વિષયની ઊંડી સમજ, સર્જનાત્મક અભિગમ અને અસરકારક રજૂઆતનું પરિણામ છે. ખાસ કરીને રાજ્ય કક્ષાની સ્પર્ધામાં સ્થાન પ્રાપ્ત કરીને તેમણે અન્ય વિદ્યાર્થીઓ માટે પણ નવી પ્રેરણાનું સર્જન કર્યું છે.
શાળાના આચાર્ય ડૉ. ધનરાજભાઈ ઠક્કર અને માર્ગદર્શક ડૉ. અલ્પેશભાઈ પટેલના માર્ગદર્શન હેઠળ વિદ્યાર્થીઓએ ગણિતને માત્ર પાઠ્યપુસ્તકના વિષય તરીકે નહીં, પરંતુ પ્રયોગ, સર્જનાત્મકતા અને અભિવ્યક્તિ સાથે જોડીને પોતાની પ્રતિભા રજૂ કરી હતી.
આ રાજ્ય કક્ષાના ગણિત મહોત્સવમાં ગણિત અને વિજ્ઞાન ક્ષેત્રના પ્રતિષ્ઠિત મહાનુભાવોની ઉપસ્થિતિ રહી હતી. જેમાં ડૉ. ચંદ્રમોલી જોશી, ચેરમેનશ્રી – ઓલ ઇન્ડિયા રામાનુજન મેથ્સ ક્લબ; ડૉ. જે. જે. રાવલ – સિનિયર સાયન્ટિસ્ટ; ડૉ. એકતા શાહ – યંગ સાયન્ટિસ્ટ, નાસા; મોહનજી – સાયન્ટિસ્ટ, રાજસ્થાન; ડૉ. પરેશભાઈ સરવૈયા – સિનિયર સાયન્ટિસ્ટ, ઈસરો; તથા મહેશભાઈ મહેતા – ભારત ભૂષણ સહિતના મહાનુભાવો ઉપસ્થિત રહ્યા હતા.
આવા પ્રતિષ્ઠિત મહાનુભાવોની ઉપસ્થિતિમાં શેઠ એમ. એન. હાઈસ્કૂલ પાટણના બે વિદ્યાર્થીઓએ રાજ્ય કક્ષાએ સ્થાન પ્રાપ્ત કરવું શાળા પરિવાર માટે વિશેષ ગૌરવની બાબત બની છે.
વિદ્યાર્થીઓની આ ગૌરવપૂર્ણ સિદ્ધિ બદલ શાળાના આચાર્ય ડૉ. ધનરાજભાઈ ઠક્કર, ઉત્તર ગુજરાત યુવક મંડળના પ્રમુખ ડૉ. જે. કે. પટેલ તથા મંત્રી મનસુખભાઈ પટેલે બંને વિજેતા વિદ્યાર્થીઓ તેમજ તેમના માર્ગદર્શક ડૉ. અલ્પેશકુમાર પટેલને હાર્દિક અભિનંદન પાઠવ્યા હતા અને ભવિષ્યમાં પણ આવી જ સિદ્ધિઓ પ્રાપ્ત કરે તેવી શુભેચ્છાઓ પાઠવી હતી.
