ભજન, ભોજન અને ભક્તિનો ત્રિવેણી સંગમ : પાટણમાં સંત કહારનાથ સમાધિ મંદિરે ઉમટ્યો ભક્તોનો મહાસાગર
ભાદરવા સુદ તેરસે સંત કહારનાથ ભગવાનની જીવંત સમાધિએ ભવ્ય લોકમેળો, 10 હજારથી વધુ શ્રદ્ધાળુઓએ મહાપ્રસાદનો લાભ લીધો
કેપિટલ મેસેજ
Capital message
પાટણના સિદ્ધિ સરોવરના કિનારે આવેલા સંત કહારનાથ ભગવાનની જીવંત સમાધિ ખાતે ભાદરવા સુદ તેરસના પાવન દિવસે ભવ્ય લોકમેળો યોજાયો હતો. દેવીપૂજક પટણી સમાજમાં સંત કહારનાથ ભગવાન આરાધ્યદેવ તરીકે પૂજાય છે. સમાજની ધાર્મિક આસ્થા સાથે જોડાયેલા આ પવિત્ર સ્થળે યોજાયેલા મેળામાં મોટી સંખ્યામાં શ્રદ્ધાળુઓ ઉમટી પડ્યા હતા. સમગ્ર દિવસ દરમિયાન ભજન, ભક્તિ અને ધાર્મિક કાર્યક્રમોથી મંદિર પરિસર ભક્તિમય બન્યું હતું.
ભાદરવા સુદ તેરસ નિમિત્તે પાટણના રેલવે સ્ટેશનથી સંત કહારનાથ ભગવાનની ભવ્ય શોભાયાત્રા નીકળી હતી. શોભાયાત્રા શહેરના વિવિધ માર્ગો પરથી પસાર થઈ સંત કહારનાથના નિજ મંદિર ખાતે પરત ફરી હતી. શોભાયાત્રામાં મોટી સંખ્યામાં ભક્તજનો અને સમાજના આગેવાનો જોડાયા હતા.
આ પ્રસંગે અમદાવાદ ન્યુ પટણી સ્પોર્ટ્સ ક્લબ તરફથી છેલ્લા 50 વર્ષથી ચાલી આવતી ભંડારાની પરંપરા પણ જાળવી રાખવામાં આવી હતી. ભક્તજનો માટે આશરે 500 કિલો પુલાવ અને 250 કિલો શીરો તૈયાર કરવામાં આવ્યો હતો. 10 હજારથી વધુ શ્રદ્ધાળુઓએ મહાપ્રસાદનો લાભ લીધો હતો. ભંડારાના આયોજનથી મેળામાં આવનાર ભક્તો માટે ભોજનની વિશેષ વ્યવસ્થા કરવામાં આવી હતી.
પટણી સમાજની ધાર્મિક આસ્થા સાથે જોડાયેલા સંત કહારનાથ ભગવાનની જીવંત સમાધિનો ઇતિહાસ આશરે 500 વર્ષ જૂનો હોવાનું સમાજના આગેવાનો જણાવી રહ્યા છે. સિદ્ધિ સરોવરના કિનારે સંત કહારનાથ ભગવાને જીવતી સમાધિ લીધી હોવાનું માનવામાં આવે છે. વર્ષો વીતી ગયા હોવા છતાં સમાધિ મંદિરનો અપેક્ષિત વિકાસ થયો નથી. મંદિરનું બાંધકામ પણ હાલ ખૂબ નાનું હોવાથી મોટી સંખ્યામાં આવતા ભક્તોને અગવડતા પડે છે.
પટણી સમાજના અગ્રણી પ્રકાશભાઈએ જણાવ્યું હતું કે સંત કહારનાથ ભગવાન દેવીપૂજક પટણી સમાજના આરાધ્યદેવ છે. તેમની પવિત્ર સમાધિ સાથે સમગ્ર સમાજની ઊંડી ધાર્મિક આસ્થા જોડાયેલી છે. વર્ષો જૂના આ ધાર્મિક સ્થળનો ઝડપથી વિકાસ થાય અને ભવ્ય મંદિરનું નિર્માણ થાય તેવી સમાજના આગેવાનો અને ભક્તોની આશા છે.
સંત કહારનાથ સમાધિ મંદિર ખાતે યોજાતો આ મેળો માત્ર ધાર્મિક મેળાવડો નહીં પરંતુ સમાજની વર્ષો જૂની પરંપરા, ભક્તિ અને એકતાનું પ્રતીક બની રહ્યો છે. ભજનના સૂર, ભક્તોની શ્રદ્ધા અને મહાપ્રસાદની વ્યવસ્થા વચ્ચે ભાદરવા સુદ તેરસે સિદ્ધિ સરોવરનો કિનારો ભક્તિમય બની ગયો હતો.
રિપોર્ટ. અનિલ રામાનુજ પાટણ
