અંબાજી યાત્રાના પંથે સેવાભાવની સુગંધ
રઘુવંશી સમાજ પાટણ દ્વારા જલારામ સેવા કેમ્પનું ભવ્ય આયોજન
કેપિટલ મેસેજ
Capital message
પાટણ : ‘સેવા એ જ સાચી ભક્તિ’ના સંદેશને સાકાર કરતા રઘુવંશી સમાજ પાટણ દ્વારા અંબાજી તરફ પગપાળા યાત્રા કરી રહેલા યાત્રાળુઓની સેવા માટે પાટણ-સિદ્ધપુર રોડ પર રૂની અને હાજીપુર ગામ વચ્ચે ભવ્ય જલારામ સેવા કેમ્પનું આયોજન કરવામાં આવ્યું હતું. શુભેચ્છક હસુભાઈ ઠક્કર (નાયકા વાળા)ના સહયોગથી યોજાયેલા કેમ્પમાં સેવાભાવ, શ્રદ્ધા અને સમાજની એકતાનો સુંદર સમન્વય જોવા મળ્યો હતો.
અંબાજી દર્શન માટે પગપાળા જતા યાત્રાળુઓ માટે કેમ્પમાં ચા, પાણી, મહાપ્રસાદ સહિતની વિવિધ સેવાઓની વ્યવસ્થા કરવામાં આવી હતી. થાકેલા યાત્રિકોને આત્મીયતાથી આવકાર આપી રઘુવંશી સમાજના ભાઈ-બહેનોએ ઉત્સાહપૂર્વક સેવા કાર્યમાં ભાગ લીધો હતો.
કેમ્પ દરમિયાન ધાર્મિક અને સાંસ્કૃતિક કાર્યક્રમોનું પણ આયોજન કરવામાં આવ્યું હતું. સોમવારે સીતારામ મંડળ દ્વારા આનંદના ગરબાનું આયોજન કરવામાં આવ્યું હતું. જ્યારે મંગળવારે બપોરે ૩થી ૬ વાગ્યા દરમિયાન સુંદરકાંડ પાઠ યોજાયો હતો. ધાર્મિક કાર્યક્રમોના કારણે સમગ્ર કેમ્પ પરિસરમાં ભક્તિમય માહોલ સર્જાયો હતો.
રઘુવંશી સમાજના આગેવાનો, દાતાઓ, શુભેચ્છકો અને સેવકોના સહિયારા સહયોગથી સેવા કેમ્પ સફળ બન્યો હતો. અંબાજીની પવિત્ર યાત્રાના માર્ગે નીકળેલા યાત્રાળુઓને આરામ, ભોજન-પાણી અને આત્મીયતાનો સહારો આપી સમાજે ‘નર સેવા એ જ નારાયણ સેવા’ની ભાવનાને જીવંત કરી હતી.
રિપોર્ટ. અનિલ રામાનુજ પાટણ
