રોઝુ માયનોર ડિસ્ટ્રી કેનાલ રિપેર કરી તાત્કાલિક ચાલુ કરવાની માંગ
રોઝુ ગામના ખેડૂતોનું રાધનપુર નર્મદા નિગમ કચેરી ખાતે આવેદનપત્ર : સમયસર કામગીરી નહીં થાય તો અમુદતના ધરણા-પ્રદર્શનની ચીમકી
કેપિટલ મેસેજ
More Read
Capital message
રાધનપુર તાલુકાના રોઝુ ગામ સહિત મઢુત્રા અને પીપરાળા વિસ્તારના ખેડૂતોએ રોઝુ માયનોર ડિસ્ટ્રી કેનાલની તાત્કાલિક મરામત કરી સિંચાઈ માટે ચાલુ કરવાની માંગ સાથે તા. 1 ઓક્ટોબરના રોજ રાધનપુર ખાતે કચ્છ બ્રાન્ચ કેનાલ વિભાગની નર્મદા નિગમ કચેરીમાં આવેદનપત્ર આપ્યું હતું.
ખેડૂતોએ આવેદનપત્રમાં જણાવ્યું હતું કે, રોઝુ ડિસ્ટ્રી કેનાલ શરૂ થયાને લાંબો સમય થયો હોવા છતાં કેનાલના પાણીનો રોઝુ ગામના ખેડૂતોને સિંચાઈ માટે યોગ્ય લાભ મળ્યો નથી. ગત વર્ષે કેનાલ તૂટી જવાથી સિંચાઈ થઈ શકી નહોતી. ચાલુ વર્ષે ચોમાસાના વરસાદી પાણીના કારણે પણ કેનાલને નુકસાન થયું હોવાનું ખેડૂતો દ્વારા જણાવાયું છે.
More Read
ખેડૂતોના જણાવ્યા મુજબ મઢુત્રા KBCથી રોઝુ ગામની સીમ સુધીની કેનાલ અનેક સ્થળોએ તૂટી ગયેલી છે. કેનાલમાંથી માટી અને કાંપ દૂર કરવામાં આવ્યા નથી તેમજ ઝાડ-ઝાંખરા પણ દૂર કરાયા નથી. વધુમાં, અગાઉ થયેલા કામની ગુણવત્તા અંગે પણ ખેડૂતો દ્વારા સવાલો ઉઠાવવામાં આવ્યા છે. જેના કારણે કેનાલમાં ફરીથી અનેક સ્થળોએ નુકસાન થયું હોવાનો આક્ષેપ કરવામાં આવ્યો છે.
ખેડૂતોએ શિયાળુ પાક માટે સિંચાઈનું પાણી મળી રહે તે માટે કેનાલની તાત્કાલિક સફાઈ કરી તૂટેલા ભાગોની મરામત કરાવી વહેલી તકે કેનાલ શરૂ કરવાની માંગ કરી છે. છેલ્લા ત્રણ વર્ષથી કેનાલ બંધ હોવાના કારણે ખેડૂતોને સિંચાઈની મુશ્કેલીનો સામનો કરવો પડી રહ્યો હોવાનો પણ આવેદનપત્રમાં ઉલ્લેખ કરવામાં આવ્યો છે.
સમયસર કામગીરી નહીં થાય તો આંદોલનની ચીમકી
રોઝુ, મઢુત્રા અને પીપરાળા ગામના ખેડૂતોના હિતમાં ટૂંક સમયમાં યોગ્ય કાર્યવાહી નહીં કરવામાં આવે તો રાધનપુર ખાતે નર્મદા નિગમની કચેરી સામે અમુદતના ધરણા-પ્રદર્શન સહિત ગાંધી ચીંધ્યા માર્ગે આંદોલન કરવાની ચીમકી ખેડૂતો દ્વારા આપવામાં આવી છે. આ અંગે યોગ્ય કાર્યવાહી કરવા માટે આવેદનપત્રની નકલ સરદાર સરોવર નર્મદા નિગમ લિમિટેડ, ગાંધીનગરના ડાયરેક્ટરને પણ મોકલવામાં આવી છે.
રિપોર્ટ. અનિલ રામાનુજ, પાટણ
