મીડિયાના અહેવાલનો ધારદાર પડઘો ડભોઈ-વેગા માર્ગ પર ‘સફેદ પટ્ટા’ દોરવાનું ભૂલેલું તંત્ર માત્ર ૧૦૦ કલાકમાં દોડતું થયું
કેપિટલ મેસેજ
Capital message
27, October, 2026
ડભોઇ તાલુકાના ફરતીકૂઈથી વેગા સુધીના અત્યંત મહત્વપૂર્ણ માર્ગ પર મીડિયાના અહેવાલની જબરદસ્ત અસર જોવા મળી છે. નવો રોડ તૈયાર થઈ ગયા બાદ તેના પર ટ્રાફિક અને સુરક્ષા માટે અનિવાર્ય એવા સફેદ પટ્ટા (રોડ માર્કિંગ) મારવાનું તંત્ર સાવ ભૂલી ગયું હતું. આ ગંભીર બેદરકારી સામે મીડિયા દ્વારા અહેવાલ પ્રસારિત કરવામાં આવતા જ નિંદ્રાધીન તંત્ર સફાળું જાગ્યું છે અને માત્ર ૧૦૦ કલાકની અંદર યુદ્ધના ધોરણે કામગીરી શરૂ કરી દેવામાં આવી છે સ્ટેચ્યુ ઓફ યુનિટી જતા પ્રવાસીઓ માટે મહત્વનો માર્ગ
વિશ્વપ્રસિદ્ધ ‘સ્ટેચ્યુ ઓફ યુનિટી’ તરફ જતા આ મુખ્ય માર્ગનું નવીનીકરણ ઘણા સમય પહેલાં પૂર્ણ કરી દેવામાં આવ્યું હતું. નવો ડામર રોડ તો બની ગયો, પરંતુ રાત્રિના સમયે વાહનચાલકોની સુરક્ષા માટે અત્યંત જરૂરી એવા સફેદ પટ્ટા મારવાનું માર્ગ અને મકાન વિભાગના અધિકારીઓ સાવ ભૂલી ગયા હતા. જેના કારણે ખાસ કરીને રાત્રિના સમયે અને ધુમ્મસભર્યા વાતાવરણમાંવાહનચાલકોને અકસ્માતનો ભારે ભય સતાવી રહ્યો હતો.
મીડિયાના અહેવાલ બાદ ૧૦૦ કલાકમાં કામગીરી શરૂ સ્થાનિક લોકો અને પ્રવાસીઓની આ સમસ્યાને વાચા આપતો અહેવાલ ત્રણ દિવસ પહેલાં મીડિયા દ્વારા પ્રમુખતાથી રજૂ કરવામાં આવ્યો હતો. અહેવાલ પ્રસિદ્ધ થતાં જ ઉચ્ચ સ્તરે દોડધામ મચી ગઈ હતી અને તેની સીધી અસર ગણતરીના કલાકોમાં જોવા મળી. તંત્ર દ્વારા તાબડતોબ મશીનરી અને કર્મચારીઓને સ્થળ પર ઉતારીને માર્ગ પર સફેદ પટ્ટા લગાવવાની કામગીરી પૂરજોશમાં શરૂ કરી દેવામાં આવી છે.તંત્રની કાર્યપદ્ધતિ સામે જનતામાં સવાલો
જોકે આ કામગીરી શરૂ થતાં સ્થાનિક લોકો અને વાહનચાલકોમાં રાહતની લાગણી તો પ્રસરી છે, પરંતુ સાથે સાથે એક મોટો સવાલ પણ ઊભો થયો છે કે, શું સરકારી તંત્ર સામાન્ય જનતાની મુશ્કેલીઓને પોતાની મેળે જોઈ શકતું નથી? જ્યારે મીડિયામાં અહેવાલ આવે અથવા કોઈ મોટી દુર્ઘટના બને ત્યારે જ કેમ તંત્ર સફાળું જાગે છે?સફેદ પટ્ટા લાગી જતાં હવે રાત્રિના સમયે વાહન ચલાવવું સુરક્ષિત બન્યું છે, જેને પગલે સ્ટેચ્યુ ઓફ યુનિટી તરફ જતા પ્રવાસીઓ તેમજ રોજેરોજ અપડાઉન કરતા સ્થાનિક વાહનચાલકોએ મીડિયાનો હૃદયપૂર્વક આભાર માન્યો હતો.
રિપોર્ટ :- ફઝલ રઝાક ખત્રી, ડભોઈ
