ગુજરાતથી વૈશ્વિક મંચ સુધી પાટણના કલાકારોનું ગૌરવ
યાજ્ઞિક ચૌહાણ અને ખ્યાતિ પ્રજાપતિ થાઈલેન્ડમાં ભારતની ટીમનું નેતૃત્વ કરશે
કેપિટલ મેસેજ
Capital message
More Read
ગુજરાતની સમૃદ્ધ લોકસંસ્કૃતિ, કલા અને પરંપરાને આંતરરાષ્ટ્રીય મંચ પર રજૂ કરવાની પાટણ જિલ્લાના બે કલાકારોને ગૌરવપૂર્ણ તક મળી છે. યાજ્ઞિક ચૌહાણ અને ખ્યાતિ પ્રજાપતિ થાઈલેન્ડ ખાતે યોજાનાર International Pearl UNESCO Global Network of Learning Cities – Festival 2026માં ભારતનું પ્રતિનિધિત્વ કરતી ટીમનું નેતૃત્વ કરશે.
આ આંતરરાષ્ટ્રીય મહોત્સવનું આયોજન 27 સપ્ટેમ્બરથી 3 ઑક્ટોબર 2026 દરમિયાન થાઈલેન્ડમાં કરવામાં આવ્યું છે. વિવિધ દેશોની સંસ્કૃતિ, કલા અને લોકપરંપરાઓને એક મંચ પર લાવનારા આ મહોત્સવમાં ભારત તરફથી ગુજરાતની લોકકલાની આગવી ઓળખ રજૂ કરવામાં આવશે.
યાજ્ઞિક ચૌહાણ અને ખ્યાતિ પ્રજાપતિના માર્ગદર્શન હેઠળ ભારતની ટીમ દ્વારા ગુજરાતની લોકકલા, લોકનૃત્ય, નાટ્યકલા અને વાર્તાકથનની સમૃદ્ધ પરંપરાને વૈશ્વિક મંચ પર રજૂ કરવામાં આવશે. ગુજરાતની ધરતી સાથે જોડાયેલી લોકસંસ્કૃતિના વિવિધ રંગો અને પરંપરાગત કલાઓને વિદેશી દર્શકો સમક્ષ રજૂ કરવાની આ તક પાટણ જિલ્લા માટે પણ ગૌરવની બાબત બની છે.
More Read
ગુજરાતની લોકકલા માત્ર મનોરંજન પૂરતી સીમિત નથી, પરંતુ તેમાં રાજ્યની પરંપરા, લોકજીવન, ઇતિહાસ અને સાંસ્કૃતિક વારસાની ઝલક જોવા મળે છે. આ જ સાંસ્કૃતિક વારસાને આંતરરાષ્ટ્રીય સ્તરે પહોંચાડવાના પ્રયાસરૂપે પાટણના કલાકારો ભારતની ટીમ સાથે થાઈલેન્ડમાં પોતાની કલાત્મક પ્રતિભાનું પ્રદર્શન કરશે.
પાટણ જિલ્લાના કલાકારોને મળેલી આ આંતરરાષ્ટ્રીય જવાબદારીથી સ્થાનિક કલા જગતમાં પણ ઉત્સાહનો માહોલ જોવા મળી રહ્યો છે. થાઈલેન્ડના આ વૈશ્વિક મંચ પરથી ગુજરાતની લોકસંસ્કૃતિના રંગો વિશ્વ સમક્ષ પહોંચાડાશે અને ભારતીય સાંસ્કૃતિક વૈવિધ્યની આગવી ઓળખ પ્રસ્તુત થશે.
રિપોર્ટ. અનિલ રામાનુજ, પાટણ
