પાટણમાં “ઓપરેશન મ્યુલ હન્ટ 2.0” હેઠળ ₹398.43 કરોડના સાયબર ક્રાઈમ રેકેટનો પર્દાફાશ,14 આરોપીઓ ઝડપાયા
(કેપિટલ મેસેજ, ન્યુઝ)
Capital message
હારીજ નાગરિક સહકારી બેંકના કરંટ ખાતાઓ ભાડે આપી દેશભરમાં ઓનલાઈન છેતરપિંડી આચરતી ગેંગ સામે કાર્યવાહી, 6 આરોપીઓ ફરાર
પાટણ જિલ્લામાં સાયબર ક્રાઈમ પોલીસ દ્વારા હાથ ધરાયેલા “ઓપરેશન મ્યુલ હન્ટ 2.0” અંતર્ગત કરોડો રૂપિયાના ઓનલાઈન છેતરપિંડીના આંતરરાજ્ય રેકેટનો પર્દાફાશ કરવામાં આવ્યો છે. તપાસ દરમિયાન હારીજ નાગરિક સહકારી બેંકમાં ખોલવામાં આવેલા કરંટ ખાતાઓ ભાડે આપી દેશભરમાં વિવિધ પ્રકારની સાયબર છેતરપિંડી આચરવામાં આવતી હોવાનું સામે આવ્યું છે.
સાયબર ક્રાઈમ પોલીસે સમગ્ર કૌભાંડમાં સંડોવાયેલા કુલ 20 આરોપીઓ સામે ગુનો નોંધ્યો છે, જેમાંથી 14 આરોપીઓની ધરપકડ કરવામાં આવી છે. જ્યારે બાકીના 6 આરોપીઓને ઝડપી પાડવા માટે પોલીસ દ્વારા સઘન તપાસ અને શોધખોળ હાથ ધરવામાં આવી છે.
તપાસમાં ખુલાસો થયો છે કે હારીજ નાગરિક સહકારી બેંકના 13 મ્યુલ એકાઉન્ટનો ઉપયોગ કરીને કુલ ₹398.43 કરોડના શંકાસ્પદ નાણાકીય વ્યવહારો કરવામાં આવ્યા હતા. આ ખાતાઓનો ઉપયોગ દેશના વિવિધ રાજ્યોમાં સાયબર ગુનાઓ માટે કરવામાં આવતો હતો. દેશભરમાંથી કુલ 228 સાયબર ફ્રોડની ફરિયાદો આ ખાતાઓ સાથે સીધી રીતે જોડાયેલી હોવાનું સામે આવ્યું છે.
પોલીસ તપાસ અનુસાર આ ગેંગ દ્વારા OTP ફ્રોડ, ડિજિટલ અરેસ્ટ, સેક્સટોર્શન, ઓનલાઈન જુગાર, સટ્ટાબાજી તેમજ અન્ય પ્રકારની ઓનલાઈન છેતરપિંડીના ગુનાઓને અંજામ આપવામાં આવતો હતો. આરોપીઓ સામાન્ય લોકોના નામે અથવા તેમના દસ્તાવેજોનો ઉપયોગ કરીને બેંક ખાતાઓ ખોલાવતા અને ત્યારબાદ તે ખાતાઓ સાયબર ગુનેગારોને ભાડે આપતા હતા. આ ખાતાઓ મારફતે છેતરપિંડીથી મેળવવામાં આવેલી રકમનું ટ્રાન્ઝેક્શન કરવામાં આવતું હતું.
સાયબર ક્રાઈમ પોલીસના જણાવ્યા મુજબ “ઓપરેશન મ્યુલ હન્ટ 2.0” અંતર્ગત સમગ્ર રાજ્યમાં મ્યુલ એકાઉન્ટ અને સાયબર ગુનાઓમાં સંડોવાયેલા તત્વો સામે વિશેષ અભિયાન ચલાવવામાં આવી રહ્યું છે. પાટણ જિલ્લામાં થયેલી આ કાર્યવાહી રાજ્યની સૌથી મોટી સાયબર ક્રાઈમ કાર્યવાહી પૈકીની એક માનવામાં આવી રહી છે.
પોલીસે જણાવ્યું છે કે ફરાર આરોપીઓને ઝડપી પાડવા માટે વિવિધ ટીમો કાર્યરત કરવામાં આવી છે અને આગામી દિવસોમાં વધુ મહત્વના ખુલાસાઓ થવાની શક્યતા છે. સમગ્ર મામલે વધુ તપાસ ચાલુ છે.
રિપોર્ટ: અનિલ રામાનુજ રાધનપુર, પાટણ
